ប្រធានអង្គការការពារបរិស្ថាន និងការពារសិទ្ធិកម្ពុជា លោក ចក់ សាខន មានប្រសាសន៍ថា ផលប៉ះពាល់ផ្នែកបរិស្ថាន និងធនធានធម្មជាតិ មានរ៉ែមាស ទឹកទន្លេ ដីព្រៃភ្នំ កំពុងកើតមាននៅតំបន់រុករកមាសអនាធិបតេយ្យនោះ។
លោក ចក់ សាខន បានបញ្ជាក់ថា ៖ «បើអាជ្ញាធរធ្វើម៉េចក៏មិនដឹងថា គេមកធ្វើរុករានអ៊ីចឹង! ខាងវៀតណាម អាណិកជនវៀតណាមក៏ចូលមកធ្វើដែរ វៀតណាមស្រុកយើងក៏មាន វៀតណាមខាងគេក៏មាន ដូច្នេះវាទៅជាអនាធិបតេយ្យ!»។
ប្រភពប្រជាពលរដ្ឋ និងមន្ត្រីអាជ្ញាធរមូលដ្ឋានស្រុកអូរយ៉ាដាវ និងស្រុកអណ្ដូងមាស ឲ្យដឹងថា តំបន់ធ្វើរ៉ែមាសអនាធិបតេយ្យនោះឋិតនៅភូមិតាំងសេ ឃុំញ៉ាង ស្រុកអណ្ដូងមាស ជាតំបន់ជាប់ព្រំប្រទល់ឃុំសេសាន ស្រុកអូរយ៉ាដាវ ចម្ងាយប្រមាណ ៥គីឡូម៉ែត្រ ទៅ ១០គីឡូម៉ែត្រប៉ុណ្ណោះ ពីតំបន់ព្រំដែនប្រទេសវៀតណាម។ ទីតាំងនោះមានប្រើម៉ាស៊ីនរែងមាស ៤គ្រឿង ដាក់ជួលឲ្យកម្មករអ្នកភូមិមកពីស្រុកអណ្ដូងមាស ស្រុកអូរយ៉ាដាវ និងពលរដ្ឋឆ្លងដែនពីភូមិស្រុកនៃប្រទេសវៀតណាម មកជីកកកាយរកមាសរាប់រយនាក់នៅតំបន់នោះ តាំងពីដើមឆ្នាំ២០១០ រហូតមកទល់នឹងថ្ងៃព្រហស្បតិ៍ ទី២៥ ខែមិថុនានេះ។
អ្នកភូមិរស់នៅភូមិភិ ឃុំសេសាន សុំមិនឲ្យបញ្ចេញឈ្មោះ មានប្រសាសន៍ឲ្យដឹងថា ទីតាំងនោះមានសមត្ថកិច្ចពាក់ព័ន្ធគ្រប់ផ្នែក និងមន្ត្រីអាជ្ញាធរមូលដ្ឋានចេញចូលទៅពិនិត្យមើលជាច្រើនលើក ក៏ប៉ុន្តែក្រៅពីទៅទារជំរិតយកប្រាក់ពីក្រុមអ្នកធ្វើអាជីវកម្មរ៉ែមាសនោះ ពួកគេមិនបានបង្ក្រាបទេ ហើយបើអ្នករុករករ៉ែមាសមិនបង់ប្រាក់ឲ្យពួកគេនោះ ក្រុមសមត្ថកិច្ចទាំងនោះធ្វើការរឹបអូសគ្រឿងសម្ភារៈម៉ាស៊ីនរែងមាស ឬដុតបំផ្លាញចោលនូវឧបករណ៍ និងរោងស្នាក់នៅរបស់ក្រុមអ្នកមកជីកមាសទាំងនោះ ៖ «បើថាយើងឲ្យលុយ គេទារមួយគ្រឿងពីរបីរយ(ដុល្លារ)ណា៎!»។
អភិបាលស្រុកអូរយ៉ាដាវ លោក ដក ស មានប្រសាសន៍ថា តំបន់នោះឋិតក្រោមការគ្រប់គ្រងរដ្ឋបាលនៃស្រុកអណ្ដូងមាស។ ចំណែកអភិបាលស្រុកអណ្ដូងមាស លោក នង ដារិទ្ធ មានប្រសាសន៍ថា តំបន់នោះឋិតក្នុងដីរដ្ឋបាលស្រុកអូរយ៉ាដាវទៅវិញ។ លោកបន្តថា មានអំពើពុករលួយច្រើនទាក់ទិនករណីនេះ ហើយលោកបានផ្ដល់របាយការណ៍ជូនអាជ្ញាធរខេត្តហើយ។
លោក នង ដារិទ្ធ បានឲ្យដឹងថា ៖ «រឿងអូរយ៉ាដាវ ហើយឥឡូវខ្ញុំវាអស់លទ្ធភាពដែរ ខ្ញុំខ្ជិល ខ្ញុំហត់ណាស់ និយាយត្រង់តែម្ដង! បើទៅរលួយៗ ឲ្យខ្ញុំធ្វើម៉េច!»។
វិទ្យុអាស៊ីសេរីមិនអាចទាក់ទងអភិបាល និងអភិបាលរងខេត្តរតនគិរី ដើម្បីអធិប្បាយពីបញ្ហានេះបានទេ នៅថ្ងៃសុក្រ ទី២៥ ខែមិថុនានេះ។
យ៉ាងនេះក្ដី ប្រធានមន្ទីរឧស្សាហកម្ម រ៉ែ និងថាមពល ខេត្តរតនគិរី លោក ហែម វ៉ាន់ថន មានប្រសាសន៍ថា លោកមិនបានដឹងរឿងនេះទេ។ លោកបន្តថា កន្លងទៅនេះមន្ទីរបានធ្វើការជូនដំណឹងដល់អាជ្ញាធរមូលដ្ឋានគ្រប់ស្រុក ឲ្យចាត់វិធានការបង្ក្រាបមិនឲ្យមានទីតាំងធ្វើអាជីវកម្មរ៉ែអនាធិបតេយ្យណាមួយឡើយ៕