អ្នកលក់សាច់ត្រី សាច់គោមួយចំនួននៅតាមផ្សាររាជធានីភ្នំពេញបានឲ្យដឹងថាតម្លៃសាច់ទាំងនោះ បានកើនឡើងធៀបនិងពីរ បីខែមុនក្នុងឆ្នាំ២០១១នេះ។
អ្នកលក់សាច់គោនៅផ្សារអូរឫស្សី លោកមាន សយបានឲ្យដឹងថាតម្លៃសាច់គោដែលគាត់លក់រាល់ថ្ងៃ មានតម្លៃប្រមាន៣ម៉ឺនរៀលក្នុងមួយគីឡូក្រាម សំរាប់សាច់ល្អ និងសាច់ធម្មតាមានតម្លៃ២៨០០០រៀល។ បើប្រៀបធៀបជាមួយ ២ឬ៣ខែមុន តម្លៃសាច់នេះ មានការកើនឡើងជាងមុន។
ដោយឡែកសម្រាប់ស្ត្រីឈ្មោះ ថាច់ ស្រីម៉ៅ អ្នកលក់ត្រីនៅផ្សារទួលទំពូង បានឲ្យដឹងថាតម្លៃត្រីមិនបានកើនឡើងទេនៅពេលនេះដែលក្នុងមួយគីឡូក្រាមថ្លៃមួយគីឡូ១៤០០០រៀល សម្រាប់ត្រីស្រស់ ដែលតម្លៃនេះថយចុះធៀបនិងពីរបីខែមុន។
ការអង្កេតរបស់វិទ្យាស្ថានសេដ្ឋកិច្ចកម្ពុជានៅ ក្នុងខែធ្នូឆ្នាំ២០១១ នេះ បានឲ្យដឹងថាតម្លៃទំនិញប្រើប្រាស់មួយចំនួននៅទីក្រុងភ្នំពេញបានឡើងថ្លៃធៀបនិងឆ្នាំមុន ប៉ុន្តែមានទំនិញមួយចំនួនមិនឡើងថ្លៃទេ។ ការអង្កេតទាំងនោះបានបង្ហាញថា ប្រេងសាំងមានតម្លៃ ៥០០០រៀល ក្នុងមួយលីត្រ កើនឡើងជាង ៩% ធៀបនិងរយៈពេលដូចគ្នា ជាមួយឆ្នាំមុន។ ចំណែកឯអង្ករកើនឡើងជាង ៩% សាច់គោកើនឡើងជាង ៣១% សាច់ជ្រូកកើនឡើងជាង២១% និងសាច់មាន់កើនឡើងជាង ៩% ធៀបនិងឆ្នាំមុន។ ប៉ុន្តែតម្លៃត្រីថយចុះជាង ១% ក្នុងខែធ្នូនេះធៀបនិងឆ្នាំមុន។
មិនត្រឹមតែប្រភេទសាច់សត្វទេដែលឡើងថ្លៃ កសិផលមួយចំនួនក៏ឡើងថ្លៃដែរនាពេលចុងឆ្នាំនេះ។
អ្នកទិញពោតនៅកំពង់ចាម លោក ហេង បានឲ្យដឹងថាតម្លៃពោតនាពេលនេះបានឡើងថ្លៃនៅពេលចុងឆ្នាំ ដោយលោកបានបញ្ជាក់ថាពោតស្ងួតមួយគីឡូក្រាម មានតម្លៃប្រមាណ ១៣០០០រៀល និងតម្លៃពោតសើមមានតម្លៃប្រមាណ ៩៥០០រៀល។
ស្ថិតិចុងក្រោយត្រឹមខែវិច្ឆិកា ២០១១នេះ តម្លៃកសិផលកសិកម្មមួយចំនួនបានកើនឡើងខ្ពស់មានដូចជាម្រេចបានកើនឡើងជាង ៧៣% តម្លៃដំឡូងមីកើនឡើង ២៤% តម្លៃពោតកើនជាង ១១% តម្លៃល្ងកើនឡើង ៩% និងតម្លៃសណ្ដែកសៀងកើនឡើង ២៥% តែដោយឡែកតម្លៃស្រូវកើនឡើងតែជាង ១% ប៉ុណ្ណោះ នេះបើយោងតាមតម្លៃទីផ្សារកសិផលនៅភ្នំពេញ និងកំពង់ចាម។
អ្នកស្រាវជ្រាវនៃវិទ្យាស្ថានសេដ្ឋកិច្ចកម្ពុជា លោក ឃិន ពីសី បានឲ្យដឹងថា អតិផរណាទំនិញក្នុងឆ្នាំ២០១១ នេះ មានប្រមាណជាង ៦%។ លោកបញ្ជាក់ទៀតថា អតិផរណាប្រចាំខែក្នុងឆ្នាំនេះមានប្រមាណ ៥ទៅ៦% ដែរ។
លោក ពិសី បញ្ជាក់ទៀតថា អត្រាកំណើនអតិផរណា ៦% មិនជះឥទ្ធិពលអ្វីទេដល់អ្នកប្រើប្រាស់ទេ។ ប៉ុន្តែបើអត្រាអតិផរណានេះឡើងចាប់ពី ១០% នោះ វាផ្ដល់ផលប៉ះពាល់ដល់ប្រជាជនទូទៅ ជាពិសេសអ្នកក្រីក្រ៕