លោកថ្លែងបែបនេះនៅក្នុងទិវាជនពិការកម្ពុជាលើកទី១១ និងទិវាជនពិការអន្តរជាតិលើកទី២៧ នៅឯវិទ្យាស្ថានជាតិអប់រំ។
លោកនាយករដ្ឋមន្រ្តី ហ៊ុន សែន បានទទួលស្គាល់ថា ជនពិការក៏កំពុងតែជួបប្រទះនូវឧបសគ្គជាច្រើន។ ក៏ប៉ុន្តែរាជរដ្ឋាភិបាលក៏កំពុងជំរុញការទប់ស្កាត់និងកាត់បន្ថយនូវអត្រាពិការភាព ដោយមានវិធានការមួយចំនួន ដូចតទៅ៖ ប្រើវ៉ាក់សាំងចៀសវាងជំងឺគ្រុនស្វិតដៃជើង, ការកាត់បន្ថយជនពិការដោយគ្រាប់មីននិងយុទ្ធភណ្ឌមិនទាន់ផ្ទុះ និងពង្រឹងការអនុវត្តច្បាប់ចៀសវាងការពិការដោយគ្រោះថ្នាក់ចរាចរណ៍ជាដើម។
លោកនាយករដ្ឋមន្ត្រីបានថ្លែងថា ៖ «ត្រូវបន្តពង្រឹងពង្រីកវិធានការទប់ស្កាត់ពិការភាពឲ្យមានប្រសិទ្ធភាពថែមទៀត តាមរយៈការកាត់បន្ថយភាពរងគ្រោះក្នុងសង្គម, ការកាត់បន្ថយអំពើហិង្សា គ្រោះថ្នាក់ចរាចរណ៍ គ្រោះថ្នាក់ការងារ, ការពង្រឹងប្រព័ន្ធសុខាភិបាល, ការដោះមីននិងយុទ្ធភណ្ឌមិនទាន់ផ្ទុះ, ការពង្រឹងសេវាស្តារលទ្ធភាពពលកម្ម, ការអប់រំផ្សព្វផ្សាយ, ការបង្ការពិការភាពឲ្យបានទូលំទូលាយ។ ត្រូវជំរុញការអនុវត្តច្បាប់ស្តីអំពីកិច្ចការពារនិងលើកកម្ពស់ជនពិការឲ្យមានប្រសិទ្ធភាព។ រដ្ឋបាលថ្នាក់ក្រោមជាតិគ្រប់លំដាប់ថ្នាក់ត្រូវយកចិត្តទុកដាក់ការងារជនពិការ ត្រូវបញ្ចូលការងារជនពិការក្នុងផែនការសកម្មភាពនៃរដ្ឋបាលគ្រប់ថ្នាក់ និងជំរុញការអនុវត្តឲ្យមានប្រសិទ្ធភាព»។
គោលបំណងនៃកិច្ចប្រជុំគឺជំរុញឲ្យមនុស្សចូលរួមក្នុងការអនុវត្តច្បាប់ស្តីពីកិច្ចការពារនិងលើកកម្ពស់សិទ្ធិជនពិការ។
លោក អ៊ិត សំហេង រដ្ឋមន្រ្តីក្រសួងសង្គមកិច្ច អតីតយុទ្ធជននិងយុវនីតិសម្បទា បានថ្លែងថា ការប្រារព្ធទិវានេះឡើងដើម្បីបង្កើននូវការផ្សព្វផ្សាយ និងការលើកកម្ពស់ការយល់ដឹងអំពីពិការភាព ដើម្បីប្រមូលនូវការគាំទ្រនិងរួមចំណែកធ្វើសមាហរណកម្មជនពិការទៅក្នុងការអភិវឌ្ឍសង្គម។
នាយកប្រតិបត្តិអង្គការជនពិការកម្ពុជា (CDPO) លោក ងិន សៅរ័ត្ន មានប្រសាសន៍ថា យើងទាំងអស់គ្នាគួរតែចូលរួមជំរុញការអនុវត្តច្បាប់នៅប្រទេសកម្ពុជាឲ្យប្រសើរឡើង។ លោកបន្តថា ធ្វើយ៉ាងណាលុបបំបាត់ការរើសអើងដល់ជនពិការនិងផ្តល់ឱកាសដល់ជនពិការ ធ្វើបែបនេះដើម្បីធានាជនពិការអាចមានសមត្ថភាពចូលរួមបម្រើសង្គមបានដូចជាអ្នកធម្មតាដែរ។
តាមលទ្ធផលជំរឿនចុងក្រោយធ្វើឡើងនៅឆ្នាំ២០០៨ បានបង្ហាញឲ្យឃើញថា ជនពិការនៅកម្ពុជាមានចំនួន ១,៤%នៃចំនួនប្រជាជនសរុប គឺប្រមាណជិត ២សែននាក់។ អត្រាជនពិការបានថយចុះពី ២% នៃឆ្នាំ ១៩៩៨ មកនៅ ១,៤% នៃឆ្នាំ ២០០៨។ រីឯច្បាប់ស្តីពីកិច្ចការពារនិងលើកកម្ពស់សិទ្ធិជនពិការ ត្រូវបានអនុម័តនិងបានប្រកាសឲ្យប្រើជាផ្លូវការ នាថ្ងៃទី៣ ខែកក្កដា ឆ្នាំ២០០៩នេះ៕