នាយកប្រចាំប្រទេសកម្ពុជានៃអង្គការអម្រឹតាសិល្បៈ លោក សួន ប៊ុនរិទ្ធ បានមានប្រសាសន៍ថា ការសម្ដែងល្ខោនរ៉កអូប៉េរ៉ាដែលចាប់ផ្ដើមកាលពីថ្ងៃទី២៨ ខែវិច្ឆិកា ឆ្នាំ២០០៨កន្លងទៅ បាននាំមកនូវការគាំទ្រពីសំណាក់អ្នកទស្សនាគ្រប់ស្រទាប់វណ្ណៈ។
លោក សួន ប៊ុនរិទ្ធ បានឲ្យដឹងថា ៖ «ពេញទាំងអស់កៅអីនៅរោងចេនឡា ដោយសារលើកនេះយើងធ្វើឆាកបន្ថែម យើងយកកៅអីខ្លះចេញ ដល់អ៊ីចឹងកៅអីអត់បានគ្រប់៦០០ បានប្រហែលជា៥០០ អ៊ីចឹងយើងថែមកៅអីបន្ថែមទៀត។ ហើយយើងសម្ដែងថ្ងៃទីមួយ ថ្ងៃទី២៨ហ្នឹង គឺបានល្អមែនទែន»។
លោក សួន ប៊ុនរិទ្ធ បានបន្តថារឿង"ទីដំរីយំ" ឬហៅតាមភាសាអង់គ្លេសថា Where Elephants Weep ត្រូវបានផ្ដួចផ្ដើមឡើងដោយលោក John Burt ជាអ្នកដែលមានចិត្តស្រឡាញ់និងអារម្មណ៍ដិតជាប់ជាមួយសិល្បៈខ្មែរ រីឯសាច់រឿងនិពន្ធដោយលោកស្រី Cathrine Filloux ចំណែកឯតន្ត្រីត្រូវបាននិពន្ធឡើងដោយលោកបណ្ឌិត ហ៊ឹម សុភី ក្រោមការឧបត្ថម្ភពីអង្គការសិល្បៈខ្មែរអមតៈដែលជាគម្រោងនៃអង្គការអប់រំពិភពលោក រួមជាមួយកិច្ចសហការពីសំណាក់អង្គការអម្រឹតាសិល្បៈ ដោយមានការចូលរួមសម្ដែងពីសំណាក់សិល្បករចម្រុះជាតិសាសន៍ មានសិល្បករខ្មែរនិងបរទេស ជាពិសេសសិល្បករអាមេរិកាំងដើមកំណើតអាស៊ី។
សាស្ត្រាចារ្យនៃសាកលវិទ្យាល័យភូមិន្ទវិចិត្រសិល្បៈ អ្នកស្រី ឆុន ស៊ីណា ដែលបានអញ្ជើញចូលរួមទស្សនាល្ខោនខ្មែររ៉កអូប៉េរ៉ា បានកោតស្ញប់ស្ញែងចំពោះការសម្ដែងនេះ។
អ្នកស្រី ឆុន ស៊ីណា បានមានប្រសាសន៍ថា ៖ «ចំពោះខ្ញុំដែលជាសិល្បករខ្ញុំគិតថា វាជាភាពមួយដ៏អស្ចារ្យដែលយើងខាងសិល្បៈរៀនរាប់ឆ្នាំហើយ យើងមិនអាចធ្វើបាន»។
ប្រធានសមាគមសិល្បករខ្មែរ លោក អៀង ស៊ីធុល បានសម្ដែងនូវចំណាប់អារម្មណ៍ចំពោះការច្នៃប្រឌិតផ្នែកសិល្បៈក្នុងល្ខោនខ្មែរអូប៉េរ៉ា។
លោក អៀង ស៊ីធុល បានបញ្ជាក់ថា ៖ «សំខាន់បំផុតគឺក្នុងតួអង្គសាច់រឿង គឺអ្នកនិពន្ធបានធ្វើឲ្យភាសាពីរ ជាតិពីរ វប្បធម៌ពីរ ក្លាយទៅជាសម្លមួយមុខដែលធ្វើឲ្យទស្សនិកជនទទួលបាន»។
ទោះបីជាខ្មែររ៉ក់អូប៉េរ៉ាមានលក្ខណៈសកលភាវូបនីយកម្មមែនពិត តែបំណងរបស់ក្រុមអ្នកផលិតគឺសំដៅជំរុញយុវជនឲ្យបង្កើតសិល្បៈថ្មីជាមួយឫសគល់នៃវប្បធម៌ដើមរបស់ពួកគេ ខណៈដែលឥទ្ធិពលនៃតន្ត្រីបស្ចិមប្រទេសបានគ្របដណ្ដប់ទូទាំងពិភពលោក។
សូមជម្រាបថា ការសម្ដែងល្ខោនខ្មែររ៉កអូប៉េរ៉ាមានតែ៦លើកប៉ុណ្ណោះដែលការសម្ដែងបីលើកដំបូងចាប់ផ្ដើមពីថ្ងៃទី២៨ ដល់ថ្ងៃទី៣០ ខែវិច្ឆិកា ហើយការសម្ដែងបីលើកបន្ទាប់នឹងចាប់ផ្ដើមពីថ្ងៃទី៥ ដល់ថ្ងៃទី៧ ខែធ្នូ ឆ្នាំ២០០៨ នៅមហោស្រពចេនឡាដដែល។
ចំណែកសំបុត្រចូលទស្សនាមានតម្លៃ១២ ដុល្លារសម្រាប់កៅអីថ្នាក់ពិសេស ៥ដុល្លារសម្រាប់កៅអីថ្នាក់មធ្យម និង២ដុល្លារសម្រាប់កៅអីថ្នាក់ធម្មតា។ តែលោក សួន ប៊ុនរិទ្ធ បានឲ្យដឹងថា សំបុត្រចូលទស្សនាត្រូវបានគេជាវអស់ហើយ៕