ប្រជាពលរដ្ឋខ្មែររូបនោះត្រូវបានបញ្ជូនទៅទទួលការព្យាបាលនៅក្នុងមន្ទីរពេទ្យក្នុងប្រទេសវៀតណាមកាលពីថ្ងៃសុក្រថ្មីៗនេះ។
លោក ផាន់ ឈៀន អាយុ៤៤ឆ្នាំ រស់នៅក្នុងឃុំដូង ស្រុករមាសហែក ខេត្តស្វាយរៀង និងជាអ្នកជិតខាងរបស់គ្រួសាររងគ្រោះខាងលើនេះ បានថែ្លងប្រាប់វិទ្យុអាស៊ីសេរីថា ប្រជាពលរដ្ឋខែ្មររូបនោះបានទទួលរងរបួសយ៉ាងធ្ងន់ធ្ងរដោយសារការវាយដំនិងចាក់ដោយច្បូកពីសំណាក់គ្រួសារវៀតណាមកាលពីពេលថ្មីៗនេះ។
លោក ផាន់ ឈៀន បានឲ្យដឹងថា ៖ «ម្សិលមិញខាងកម្លាំងប៉ូលិសព្រំដែនវៀតណាមគេមកសួរសុខទុក្ខ។ គ្នាគេមក៦នាក់ បើបូកសរុបទាំងប៉ូលិសយើងអីជាង១០នាក់។ ប៉ូលិសព្រំដែនយើង ប៉ូលិសរដ្ឋបាលអី មកជុំគ្នាទាំងអស់។ ផ្ដល់យោបល់ឲ្យយើងទៅដេកនៅពេទ្យវៀតណាម មិនឲ្យយើងមកដេកផ្ទះអ៊ីចឹង ខ្លាចរបួសយើងអាចជាតែខាងក្រៅ ហើយខាងក្នុងវាដំបៅរើ»។
លោក នាង សំមាន ជាមេឃុំដូង ស្រុករមាសហែក ខេត្តស្វាយរៀង បានមានប្រសាសន៍ថា ៖ «សួរសុខទុក្ខដល់កន្លែងប្រជាពលរដ្ឋយើងនៅសម្រាកព្យាបាលនៅពេទ្យវៀតណាម។ អាជ្ញាធរកម្ពុជាខាងខ្ញុំបានឧបត្ថម្ភអង្ករចំនួន២០០គីឡូ។ អាហ្នឹងគ្រាន់តែទទួលជំនួយជាបន្ទាប់បន្សំសិនទេ ថ្ងៃក្រោយអាចទទួលទៀត»។
ការយកចិត្តទុកដាក់របស់អាជ្ញាធរនគរបាលព្រំដែនវៀតណាមជាប់នឹងព្រំដែនកម្ពុជាវៀតណាម ជាមួយនឹងអាជ្ញាធរមូលដ្ឋានរបស់កម្ពុជានៅទីនោះ គេកត់សម្គាល់ឃើញថា គឺជាបង្ហាញកាយវិការនិងសញ្ញាវិជ្ជមានមួយនៅក្នុងការដោះស្រាយរឿងវិវាទនានារវាងប្រជាពលរដ្ឋកម្ពុជានិងប្រជាពលរដ្ឋវៀតណាម នៅតាមបណ្តោយព្រំដែននៃប្រទេសទាំងពីរនោះ។
លោក ង៉ែត ណារ៉ា ជាមន្រ្តីសម្របសម្រួលនៃអង្គការការពារសិទ្ធិមនុស្សក្រៅរដ្ឋាភិបាលមួយ ហៅកាត់ថា អាដហុក នៅក្នុងខេត្តស្វាយរៀង បានមានប្រសាសន៍អត្ថាធិប្បាយថា ៖ «ជាពិសេសដើម្បីជាគំរូមួយទៅជំនាន់ក្រោយៗទៀតដើម្បីកុំឲ្យមានបញ្ហានេះកើតឡើង»។
សូមជម្រាបថា ប្រជាពលរដ្ឋខែ្មរម្នាក់ឈ្មោះ ព្រំ ទឹង បានរងការវាយដំចំក្បាលនិងចាក់ដោយច្បូកធ្លាយកំភួនជើងដោយជនជាតិវៀតណាមជាច្រើននាក់ កាលពីថៃ្ងទី៨ ខែតុលាកន្លងទៅនេះ ក្រោមកិច្ចការពារដោយក្រុមប្រដាប់អាវុធជនជាតិវៀតណាមចំនួនប្រមាណ៧នាក់ ក្រោយពីគ្រួសារវៀតណាមមួយបានព្យាយាមដេញវាយកុមារខែ្មរម្នាក់ អាយុ១២ឆ្នាំ ក្រោមការចោទថាបានលួចកាច់ដើមអំពៅរបស់គ្រួសារវៀតណាមនោះ។
ប្រជាពលរដ្ឋខែ្មរឈ្មោះ ព្រំ ទឹង ដែលរងការវាយដំនិងចាក់ដោយច្បូកនោះ ដោយសារតែគាត់បានព្យាយាមហាមឃាត់មិនឲ្យគ្រួសារជនជាតិវៀតណាមដេញវាយកុមារកម្ពុជានោះ។
កន្លងមកគេតែងតែលេចឮសេចក្តីរាយការណ៍ពីប្រជាពលរដ្ឋខ្មែរនិងសកម្មជនការពារសិទ្ធិមនុស្សក្រៅរដ្ឋាភិបាលមួយចំនួនអំពីរឿងជម្លោះនានារវាងប្រជាពលរដ្ឋខែ្មរនិងប្រជាពលរដ្ឋវៀតណាមនៅតាមបណ្ដោយព្រំដែននៃប្រទេសទាំងពីរ។ គេមិនសូវឃើញមានកិច្ចអន្តរាគមន៍ដោះស្រាយទេ ប៉ុន្តែករណីខាងលើនេះគឺជាសញ្ញាវិជ្ជាមានមួយ៕