ការចេញសេចក្ដីថ្លែងការណ៍នេះ គឺបន្ទាប់ពីក្រុមជ្រុលនិយមថៃ ទាំងនោះ បាននាំគ្នាធ្វើបាតុកម្មនៅខាងក្រៅបរិវេណការិយាល័យអង្គការសហប្រជាជាតិប្រចាំនៅទីក្រុងបាងកក និងមួយក្រុមធំទៀត បាននាំគ្នាយកព្រះពុទ្ធបដិមាទៅដាក់នៅលើកំពូលភ្នំទ្រព្យ ដោយចូលជ្រៅទៅក្នុងតំបន់ហាមឃាត់មិនឱ្យមានកងទ័ពបណ្ដោះអាសន្ន នៃតំបន់ជម្លោះព្រំដែនជិតប្រាសាទព្រះវិហាររបស់ខ្មែរនោះ។
សេចក្តីថ្លែងការណ៍បានចាត់ទុកសកម្មភាពរបស់ក្រុមជ្រុលនិយមថៃនោះថា គឺជាអំពើបង្កហេតុក្នុងការប៉ុនប៉ងឱ្យជម្លោះព្រំដែនកម្ពុជា-ថៃ មានភាពតានតឹងសាជាថ្មី។
មេបញ្ជាការយោធាខ្មែរដែលគ្រប់គ្រងកងកម្លាំងការពារព្រំដែនជុំវិញប្រាសាទព្រះវិហារក្នុងស្រុកជាំក្សាន្ត ខេត្តព្រះវិហារ បានឱ្យដឹងថា ប្រជាពលរដ្ឋថៃមួយក្រុមនៅតែបន្តចេញចូលទៅក្នុងតំបន់ហាមឃាត់នៃទឹកដីជម្លោះព្រំដែនលើកំពូលភ្នំទ្រព្យ ដោយមិនស្តាប់ការហាមឃាត់របស់កងទាហានខ្មែរទេ។ ចំណែកឯទាហានថៃ ដែលនៅទល់មុខគ្នានោះ ក៏តែងលួចជីកលេណដ្ឋានជាបន្តបន្ទាប់នៅពេលយប់ដែរ។
លោកឧត្ដមសេនីយ៍ឯក ស្រី ឌឹក ជាមេបញ្ជាការកងយោធពលខេមរភូមិន្ទនៃកងពលធំអន្តរាគមន៍លេខ៣។ លោកបានមានប្រសាសន៍កាលពីរសៀលថ្ងៃសុក្រ ទី១៣ ខែមករា ថា ទាហាន និងប្រជាពលរដ្ឋថៃ ទាំងនោះ កំពុងប្រព្រឹត្តល្មើស ដោយរំលោភទៅលើសេចក្ដីសម្រេចរបស់តុលាការអន្តរជាតិស្ដីអំពីតំបន់ដែលហាមឃាត់មិនឱ្យមានកងទ័ពជាបណ្ដោះអាសន្ននោះ។
លោកឧត្តមសេនីយ៍ ស្រី ឌឹក បានមានប្រសាសន៍ថា ក្នុងនាមកងទ័ពកម្ពុជា បានព្យាយាមអត់ធ្មត់ចំពោះសកម្មភាពទាំងនោះ ហើយបានធ្វើរបាយការណ៍ដាក់ជូនទៅរដ្ឋាភិបាល និងក្រសួងការបរទេសកាលពីពេលថ្មីៗ៖ «ថៃគាត់មិនស្តាប់ គាត់នៅតែលួចធ្វើ លួចដាក់ព្រះ តាំងពីខែតុលា (ឆ្នាំ២០១១) មក ហើយយប់ៗលួចធ្វើលេណដ្ឋាន ហើយមកដល់បច្ចុប្បន្ននេះ ក៏នៅតែចេញចូលៗ ជញ្ជូនទាំងលោកសង្ឃ យាយជី តាជី មកបង្កតែរឿង»។
អាជ្ញាធរជាតិព្រះវិហារ និងគណៈកម្មាធិការជាតិបេតិកភណ្ឌពិភពលោក បានសំដែងការព្រួយបារម្ភចំពោះអំពើរបស់ជនជាតិថៃ មួយក្រុមនោះ ដោយថា សកម្មភាពដែលប្រើប្រាស់ចលនាប្រជាពលរដ្ឋ និងសាសនានោះ ត្រូវបានគេមើលឃើញថា ជាអំពើបង្កហេតុ និងការប៉ុនប៉ងបង្កើតភាពតានតឹង ព្រមទាំងជាការរារាំងដល់ការអភិរក្សប្រាសាទព្រះវិហារដ៏មានតម្លៃ ដែលជាសម្បត្តិបេតិភណ្ឌពិភពលោក និងជាសម្បត្តិបេតិកភណ្ឌរបស់មនុស្សជាតិទាំងអស់ផង។
លោក កុយ គួង អ្នកនាំពាក្យក្រសួងការបរទេសកម្ពុជា។ លោកបានមានប្រសាសន៍ថា ក្រសួងការបរទេសកម្ពុជា នឹងធ្វើកំណត់ទូតតវ៉ាបញ្ជូនទៅខាងភាគីថៃ នៅពេលឆាប់ៗខាងមុខ អំពីការរំលោភបំពានពីសំណាក់ប្រជាពលរដ្ឋថៃ ទៅលើតំបន់ហាមឃាត់មិនឱ្យមានកងទ័ពជាបណ្ដោះអាសន្ន ដែលធ្វើឡើងដោយសេចក្ដីសម្រេចរបស់តុលាការអន្តរជាតិនោះ។
លោក កុយ គួង៖ «ហើយយើងក៏នឹងចម្លងជូននូវកំណត់ទូតតវ៉ានេះទៅឱ្យតុលាការអន្តរជាតិ (ICJ) ផងដែរ ដើម្បីឱ្យតុលាការបានជ្រាបអំពីសកម្មភាពនេះ»។
កាលពីថ្ងៃទី១៨ ខែកក្កដា ឆ្នាំ២០១១ កន្លងទៅ តុលាការអន្តរជាតិ បានចេញសេចក្តីសំរេចរបស់ខ្លួនមួយ ដោយបង្កើតនូវតំបន់ដែលគ្មានកងទ័ពជាបណ្ដោះអាសន្ននៅតាមតំបន់ប្រឈមមុខគ្នាក្នុងរឿងជម្លោះព្រំដែនជិតប្រាសាទព្រះវិហារ បន្ទាប់ពីកងទ័ពកម្ពុជា-ថៃ បានប្រយុទ្ធគ្នាជាច្រើនលើក ដោយសារជម្លោះព្រំដែន។
ក្នុងការជួបប្រជុំគ្នារបស់គណៈកម្មការព្រំដែនទូទៅនៃក្រសួងការពារជាតិកម្ពុជា និងថៃ កន្លងទៅ គឺគណៈកម្មការនោះបានចេញសេចក្ដីថ្លែងការណ៍មួយរួមគ្នាថា ភាគីទាំង២ បានព្រមព្រៀងគ្នាអនុវត្តទៅតាមដីកាសម្រេចរបស់តុលាការយុត្តិធម៌អន្តរជាតិ ដែលបង្កើតនូវតំបន់គ្មានកងទ័ពជាបណ្ដោះអាសន្ន ប្រកបដោយតម្លាភាព និងស្មើភាពគ្នា៕