ក្រុមប្រជាពលរដ្ឋរងគ្រោះនៅក្នុងរបបខ្មែរក្រហមជាក្រុមចុងក្រោយចំនួន ៥៥០នាក់ មកពីខេត្តកំពត និងខេត្តកំពង់ចាម នៅថ្ងៃទី៣០ ខែធ្នូ ឆ្នាំ២០១០នេះ បានមកទស្សនាសាលាក្ដីខ្មែរក្រហម សារមន្ទីរប្រល័យពូជសាសន៍គុកទួលស្លែង និងវាលពិឃាដបឹងជើងឯក ដើម្បីស្វែងយល់ និងឃើញដោយផ្ទាល់ភ្នែក អំពីភស្តុតាង និងដំណើរការកាត់ទោសមេគុកទួលស្លែង ឈ្មោះ ឌុច ក្នុងសំណុំរឿង០០១ ក្នុងឆ្នាំ២០១០ កន្លងមក និងការត្រៀមកាត់ទោសសំណុំរឿង០០២ ឆ្នាំ២០១១ ខាងមុខ។
ការមកទស្សនាក្រុមប្រជាពលរដ្ឋរងគ្រោះចុងក្រោយនេះ បាននាំឲ្យចំនួនប្រជាពលរដ្ឋមកទស្សនាកើនឡើងចំនួន ៦៧.០០០នាក់ នៅឆ្នាំ២០១០នេះ ដែលជាចំនួនគាំទ្រលើសសាលាក្ដីឧក្រិដ្ឋកម្មនានានៅលើពិភពលោក ដូចជាសាលាក្ដីនៅក្នុងប្រទេសសារ៉ាលីអូន ជាដើម។
ប្រធានស្ដីទីនៃរដ្ឋបាលសាលាក្ដីខ្មែរក្រហម លោក ក្រាញ់ តូនី បានមានប្រសាសន៍ទៅកាន់ប្រជាពលរដ្ឋដែលមកទស្សនានៅក្នុងសាលសវនាការនៃសាលាក្ដីខ្មែរក្រហម នៅថ្ងៃទី៣០ ខែធ្នូនេះថា សាលាក្ដីនេះគឺជាការស្វែងរកយុត្តិធម៌ជូនគ្រួសាររងគ្រោះនៅក្នុងរបបខ្មែរក្រហម។
លោកបន្ថែមថា ៖ «ចំនួនដ៏ធំធេងនេះ មានន័យថា តុលាការនេះធ្វើឡើងសម្រាប់ផ្ដល់ជនរងគ្រោះទាំងមូល មិនមែនជាតុលាការធ្វើឡើងសម្រាប់អ្នកឯកទេសច្បាប់ជាតិ និងអន្តរជាតិទេ»។
ក្រុមប្រជាពលរដ្ឋចំនួនជាង ៥០០នាក់នេះ គឺភាគច្រើនជាជនជាតិខ្មែរឥស្លាម នៅក្នុងខេត្តកំពត និងខេត្តកំពង់ចាម ក្រោមការជួយសម្រួលដឹកជញ្ជូនដោយសាលាក្ដីខ្មែរក្រហម។
ប្រជាពលរដ្ឋឈ្មោះ ហេន ហម អាយុ ៦០ឆ្នាំ នៅក្នុងភូមិពាម ក្នុងឃុំព្រែកកាបៅ ស្រុកកងមាស ខេត្តកំពង់ចាម ដែលមានសមាជិកគ្រួសារចំនួន ២២នាក់បានស្លាប់នៅក្នុងរបបខ្មែរក្រហម បានថ្លែងថា លោកចង់ឃើញសាលាក្ដីនេះដំណើរការចប់ចុងចប់ដើម ៖ «ខ្ញុំបាទបានឃើញគុកទួលស្លែង សាលាក្ដីខ្មែរក្រហម និងបឹងជើងឯក ដោយឃើញកន្លែងទាំង៣ហ្នឹង បានន័យថា ពេញចិត្តពេញថ្លើមនូវសាលាក្ដីកាត់ទោសខ្មែរក្រហម»។
សាលាក្ដីខ្មែរក្រហមកាលពីថ្ងៃទី២៦ ខែកក្កដា ឆ្នាំ២០១០ កន្លងមកនេះ បានប្រកាសសាលក្រមផ្តន្ទាទោស ឌុច មេគុកទួលស្លែង ឬមន្ទីរស-២១ ឲ្យជាប់គុក ៣៥ឆ្នាំ ក្រោមបទឧក្រិដ្ឋកម្មប្រឆាំងមនុស្សជាតិ និងបទរំលោភបំពានលើអនុសញ្ញាក្រុងហ្សឺណែវ (Geneva) ឆ្នាំ១៩៤៩ ប្រឆាំងការធ្វើទារុណកម្ម ដែលសាលាក្ដីនេះបានរកឃើញថា ឌុច មានទោសកំហុសសម្លាប់មនុស្សជាង ១២.០០០នាក់នៅក្នុងមន្ទីរស-២១។
ប្រធានស្ដីទីនៃរដ្ឋបាលសាលាក្ដីខ្មែរក្រហម លោក ក្រាញ់ តូនី បានមានប្រសាសន៍ថា ៖ «សាលាក្ដីខ្មែរក្រហមនឹងបើកសវនាការលើបណ្ដឹងឧទ្ធរណ៍លើសំណុំរឿង០០១ នៅខែមីនា ឆ្នាំ២០១១ ក្រោយពី ឌុច បានបឹ្តងទាស់នឹងសាលក្រមប្រកាសកាលពីខែកក្កដា កន្លងមកនេះ»។
លោកបានបញ្ជាក់ថា សំណុំរឿង០០២ ដ៏សំខាន់ នឹងដំណើរការកាត់ទោសនៅខែមិថុនា ឆ្នាំ២០១១ ខាងមុខ ដែលមានជនជាប់ចោទជាមេដឹកនាំជាន់ខ្ពស់ខ្មែរក្រហមចំនួន ៤នាក់ គឺលោក អៀង សារី លោក ខៀវ សំផន លោក នួន ជា និងលោកស្រី អៀង ធីរិទ្ធ៕