ការកំណត់តម្លៃឯកភាពគ្នានេះបានធ្វើឡើងក្នុងពេលដែលក្រុមហ៊ុនចិន Sinohydro វិនិយោគវារីអគ្គិសនីកំចាយបានបំផ្ទុះភ្នំដុបមាន់ព្រៃយកថ្ម ហើយកម្ទេចថ្មជាច្រើនខ្ទាតកប់ក្នុងដីដាំដុះរបស់អ្នកស្រុកដងទង់និងស្រុកកំពតដែលមានឃុំល្អាងនិងឃុំព្រៃថ្នង។
អ្នកស្រុកពីរឃុំនោះទាមទារឲ្យក្រុមហ៊ុនចិនទិញដី១ម៉ែត្រការ៉េ ៣,៥ដុល្លារអាមេរិក ដែលកម្ទេចថ្មបានខ្ទាតត្រូវក្បែរភ្នំដុបមាន់ព្រៃទាំងអស់ជាង៧០ហិកតារ។ ឯខាងក្រុមហ៊ុនចិនវិញចង់ជួលដី៤ឆ្នាំឲ្យ១ហិកតារតម្លៃ១ម៉ឺនដុល្លារអាមេរិកទៅវិញ។
អ្នកស្រី លីន នៅភូមិល្អាង ឃុំល្អាង ស្រុកដងទង់ អះអាងថា ក្រុមហ៊ុនចិនត្រូវតែទិញដីកម្ទេចថ្មខ្ទាតត្រូវនោះ ៖ «ខូចខាតដំណាំហ្នឹង ព្រោះក្រុមហ៊ុនប៉ះពាល់ អ៊ីចឹងត្រូវតែសំណូមពរឲ្យទិញតែម្ដង ព្រោះអីបាក់ដើមហើយនៅមិនកើត ក្នុងការភ័យខ្លាច រត់រហូត»។
លោក មាស ណេន មេក្រុម១០នៃភូមិទ្វារថ្មី ឃុំព្រៃថ្នង ស្រុកកំពត បានអះអាងដូច្នេះ ៖ «ប៉ះពាល់ខាងឃុំទ្វារថ្មី ឃុំព្រៃខ្នង ១៩គ្រួសារ ហើយដីគ្នាដាំរាល់តែឆ្នាំ ដាំពោត ដាំសណ្ដែកបានផល។ តែឥឡូវអត់ដាំកើតទេ ថ្មទាំងអស់ ថ្មក្រាស់ឃ្មឹក។ ៣,៥ដុល្លារគឺថាបងប្អូនទាំងអស់គ្នាបែបជាសមស្រប លក់ឲ្យ ដាច់ចិត្តហើយ»។
លោក អ៊ឹម សំណាង តំណាងប្រជាជនភូមិល្អាង ២៩គ្រួសារ ក្នុងឃុំល្អាង ស្រុកដងទង់ ឲ្យដឹងថា អាជ្ញាធរនិងអ្នកស្រុកបានឯកភាពកំណត់តម្លៃលក់ដីដែលរងនូវកម្ទេចថ្មភ្នំខ្ទាតត្រូវក្បែរភ្នំដុបមាន់ព្រៃជាង៧១ហិកតារនោះក្នុង១ម៉ែត្រការ៉េ ៣,៥ដុល្លារអាមេរិក ៖ «ឥឡូវតម្លៃទិញគឺតម្លៃ៣,៥ដុល្លារហ្នឹង»។
អភិបាលស្រុកកំពត លោក ឃុយ សៀន មានប្រសាសន៍ថា ក្រុមការងារស្រុកបានចុះស្រង់តម្លៃលក់ដីរបស់អ្នកស្រុក ហើយបានឯកភាពកំណត់តម្លៃលក់ដីដែលថ្មខ្ទាតត្រូវកប់ក្នុងដីក្នុង១ម៉ែត្រការ៉េ៣,៥ដុល្លារអាមេរិក។
លោកថា អាជ្ញាធរស្រុក ខេត្ត នឹងយកតម្លៃនេះទៅពិភាក្សាជាមួយក្រុមហ៊ុនចិន Sinohydro នោះ ប៉ុន្តែក្រុមហ៊ុនចិននោះមិនទាន់អាចឲ្យចូលជួបបានដោយជាប់រវល់។
លោក ឃុយ សៀន បានបញ្ជាក់ថា ៖ «តាមអ្នកដែលចុះទៅធ្វើមករាយការណ៍ឲ្យខ្ញុំថា ក្នុងតម្លៃ៣ដុល្លារ ឬ ៣,៥ដុល្លារ ក្នុង១ម៉ែត្រការ៉េ គាត់សុខចិត្តលក់។ ប៉ុន្តែឥឡូវហ្នឹងខាងក្រុមហ៊ុនចិនគេមិនទាន់ឆ្លើយតបថាម៉េចនៅឡើយ»។
សូមជម្រាបជូនថា ក្រុមហ៊ុនចិន Sinohydro ផលិតវារីអគ្គិសនីកំចាយនេះ ទទួលបានការអនុញ្ញាតពីក្រសួងឧស្សាហកម្ម រ៉ែ និងថាមពល នៅឆ្នាំ២០០៧ អនុវត្តលើផ្ទៃដី៧១,៥ហិកតារក្នុងទឹកប្រាក់ប្រមាណ២៧០លានដុល្លារអាមេរិក៕