អះអាងបែបនេះ បន្ទាប់ពីជនជាតិព្នងប្រមាណ ១០០នាក់ ដែលបានទៅចូលរួមស្ដាប់ការដោះស្រាយរបស់អាជ្ញាធរនិងក្រុមហ៊ុននៅមន្ទីរឃុំប៊ូស្រា កាលពីថ្ងៃទី២៣ ធ្នូ បានដើរចេញពីអង្គប្រជុំដែលមិនស្ដាប់ការដោះស្រាយដែលពួកគេយល់ថា ជាពាក្យដដែលៗ។
លោក អី ប្លង់ អាយុ ៦៤ឆ្នាំ នៅភូមិទី៦ បានអះអាងថា ពួកគេនៅតែទាមទារឲ្យប្រគល់ដីដែលធ្លាប់ធ្វើនោះមកឲ្យពួកគេវិញ ៖ «ប្រជាពលរដ្ឋយើងទាំងអស់គ្នាហ្នឹង អត់ឲ្យក្រុមហ៊ុនឈូសឆាយទេ ដាច់ខាតមិនឲ្យទេ បើថា ឈូសទៀតដុតទៀតៗ សំណូមពររបស់ពលរដ្ឋ។ គុកគេធ្វើសម្រាប់ដាក់មនុស្ស បើថាដាក់គុក ដាក់អស់មួយឃុំហ្នឹងតែម្ដងទៅ បើថាសម្លាប់ សម្លាប់ឲ្យអស់មួយឃុំហ្នឹងតែម្ដងទៅ»។
សូមជម្រាបថា កាលពីថ្ងៃ១៩ ធ្នូ ជនជាតិព្នងបានដុតបំផ្លាញគោយន្តកម្មករមួយគ្រឿង ហើយនៅថ្ងៃទី២០ ធ្នូ ជនជាតិព្នងក៏បានដុតគ្រឿងចក្រឈូសឆាយចំនួន ៣គ្រឿងទៀត នៅតំបន់អូរឆែល ដោយសារតែពួកគេអះអាងថា មិនព្រមផ្អាកការឈូសឆាយដើម្បីដោះស្រាយ។
ការដោះស្រាយរបស់ក្រុមហ៊ុននិងអាជ្ញាធរនៅថ្ងៃទី២៣ ធ្នូ មានបីគោលការណ៍ គឺលក់ដីឲ្យក្រុមហ៊ុនការធ្វើចម្ការ ៥០% ម្នាក់ និងការផ្ដល់ដីចម្ការឲ្យតាមជាក់ស្ដែង ប៉ុន្តែគោលការណ៍ទាំង ៣ចំណុចនេះ ត្រូវបានជនជាតិព្នងបដិសេធថា មិនអាចទទួលបានដោយទាមទារយកដីទាំងអស់ ៖ «ពេលណាយើងស៊ីឈ្នួល ស៊ីឈ្នួល ពេលណាគេធ្វើអ៊ីចឹងយើងខឹង។ ហើយខ្លះក៏អត់ទាន់មានផ្ទះសម្បែង ដល់ឃើញតឹងរ៉ឹងពេកអ៊ីចឹង ចង់ធ្វើជាដីនៅកន្លែងយើងធ្វើចម្ការវិលជុំហ្នឹង ចង់ឲ្យមកយើងវិញ»។
តំណាងក្រុមហ៊ុន ខូវ ជីលី គឺលោក ហេង សុខជា បានជំរុញឲ្យមានការដោះស្រាយតាមផ្លូវច្បាប់ បន្ទាប់ពីជនជាតិព្នងទាំងនោះបានដុតបំផ្លាញគ្រឿងចក្រអស់ចំនួន ៣គ្រឿង ប៉ុន្តែអភិបាលរងខេត្តមណ្ឌលគិរី គឺលោក យីម លុច ដែលបានចុះទៅដោះស្រាយនៅថ្ងៃ២៣ ធ្នូ បានឲ្យដឹងថា បើអនុវត្តការចាប់ខ្លួនប្រាកដជាមានបាតុកម្មតវ៉ាចុះឡើង ហើយកាន់តែធ្វើឲ្យមានការពិបាកក្នុងការដោះស្រាយ។
លោក ហេង សុខជា មានប្រសាសន៍ដូច្នេះថា ៖ «យើងមិនចង់មានការចាប់ខ្លួនអីទេ រឿងហ្នឹងបានកន្លងផុតទៅឲ្យចប់ទៅ ហើយយើងរកវិធីដោះស្រាយតាមរបៀបផ្សេងទៅវិញ»។
ប៉ុន្តែលោកបានអះអាងថា ក្រុមហ៊ុន ខូវ ជីលី បានទទួលសេចក្ដីសម្រេចដ៏ត្រឹមត្រូវពីរាជរដ្ឋាភិបាលក្នុងការអភិវឌ្ឍ ដូច្នេះលោកនឹងចាត់វិធានការថ្មីការពារដើម្បីឲ្យក្រុមហ៊ុននេះអភិវឌ្ឍជាបន្តទៅទៀត។
មន្រ្តីសិទ្ធិមនុស្សនៃអង្គការវីជីលែន គឺលោក ឯម វាសនា បានផ្ដល់ទស្សនៈថា គួរតែប្ដូរទីតាំងក្រុមហ៊ុនដើម្បីបញ្ជៀសអំពើហិង្សា៕