នាយករងខុទ្ទកាល័យលោកនាយករដ្ឋមន្រ្តី ហ៊ុន សែន លោក លឹម លាងសែ បានមានប្រសាសន៍ប្រាប់អ្នកយកព័ត៌មានវិទ្យុអាស៊ីសេរីជុំវិញបញ្ហានេះថា ក្នុងការដោះស្រាយទំនាស់ដីធ្លីនេះពុំមែនចង់ដោះស្រាយបានភា្លមៗនោះទេ លោកត្រូវការពេលវេលានិងស្រាវជ្រាវនៅថ្នាក់មូលដ្ឋានឲ្យបានច្បាស់លាស់ ។
លោក លឹម លាងសែ បានឲ្យដឹងថា ៖ «អ៊ីចឹងខ្ញុំបានជម្រាបគាត់ យើងនឹងចុះទៅដោះស្រាយទៅដល់ទីកន្លែងដែលមានការចូលរួមពីស្ថាប័នមួយចំនួនទៀត រួមទាំងអាជ្ញាធរខេត្តផង ហើយនិងភាគីដែលពាក់ព័ន្ធជាមួយគាត់» ។
លោក ទិត ប៊ុនឈឿន តំណាងប្រជាពលរដ្ឋ ២២០គ្រួសារមកពីស្រុកបវេល ខេត្តបាត់ដំបង បានមានប្រសាសន៍ក្រោយពីជួបចរចាជាមួយលោក លឹម លាងសែ ថាពួកលោកមិនទាន់ត្រឡប់ទៅផ្ទះទេ រង់ចាំខាងខុទ្ទកាល័យចុះទៅដោះស្រាយពួកគាត់នឹងទៅជាមួយ ។
លោក ទិត ប៊ុនឈឿន បានមានប្រសាសន៍ថា ៖ «នៅក្នុងដំណោះស្រាយនេះ ពួកខ្ញុំក្នុងការធ្វើដំណើរមកជួបមានការលំបាកខ្លាំងណាស់ ដូច្នេះក្នុងការដោះស្រាយ បើមិនទាន់មានលទ្ធផលទេ ពួកខ្ញុំបាទមិនទាន់វិលត្រឡប់ទៅវិញទេ» ។
លោក ចាន់ យឿត បានមានប្រសាសន៍ថា ពួកលោកដល់រដូវធ្វើស្រែហើយ លោកចង់បានដីនោះមកវិញ ហើយលោកក៏ចង់បានការអន្តរាគមន៍ពីលោកនាយករដ្ឋមន្រ្តី ហ៊ុន សែន ទើបមានប្រសិទ្ធភាព ៖ «ក្នុង ១គ្រួសារគឺអ្នកខ្លះមាន ២ហិកតា អ្នកខ្លះមាន ៣ អ្នកខ្លះមាន ៥ អ្នកខ្លះមាន ៨ អ្នកខ្លះមាន ១០» ។
លោកស្រី សូទី បានមានប្រសាសន៍ថាក្នុងអំឡុងឆ្នាំ១៩៩០ ពួកគាត់បានចូលទៅកាប់រុករានឆ្ការដីព្រៃធ្វើស្រែ នៅចំណុចអូរវល្លិប្រេង និងបឹងបាតផ្តិល ក្នុងខេត្តបាត់ដំបង ។ ក្នុងឆ្នាំ១៩៩៨ អាជ្ញាធរបានឃុបឃិតគ្នាយកដីពួកគាត់ ហើយពួកគាត់បានប្តឹងមកតុលាការខេត្តច្រើនលើកមកហើយ តែពួកគេមិនបានដោះស្រាយជូននោះទេ ៖ «ព្រោះអីខាងខេត្តបាត់ដំបងហ្នឹង កុហក បង្វិលពួកខ្ញុំជាច្រើនលើកច្រើនសាហើយ» ។
វិទ្យុអាស៊ីសេរីមិនអាចសុំការបំភ្លឺពីព្រះរាជអាជ្ញាតុលាការខេត្តបាត់ដំបងបានទេ នៅថ្ងៃសុក្រនេះ ។
រីឯតំណាងប្រជាពលរដ្ឋ១៩គ្រួសារដែលបានដើរថ្មើរជើងពីស្រុកព្រះនេត្រព្រះ ខេត្តបន្ទាយមានជ័យ មកដល់ផ្ទះលោកនាយករដ្ឋមន្រ្តី លោក សូ វៀត បានមានប្រសាសន៍ថា ក្រៅពីលោក ហ៊ុន សែន គ្មានស្ថាប័នណាអាចដោះស្រាយឲ្យពួកលោកបានទេ ពីព្រោះពួកគាត់អស់ជំនឿលើប្រព័ន្ធតុលាការនិងអាជ្ញាធរខេត្ត ទើបនាំគ្នាមកដល់ផ្ទះលោកនាយករដ្ឋមន្រ្តីផ្ទាល់ ។ ក៏ប៉ុន្តែលោកនាយករងខុទ្ទកាល័យឲ្យពួកគាត់វិលត្រឡប់ទៅផ្ទះវិញ រង់ចាំដើមខែមិថុនាទើបគេចុះដោះស្រាយជូន ។
លោក សូ វៀត បានបញ្ជាក់ថា ៖ «ការដោះស្រាយនៅខាងស្រុក ខាងខេត្ត ខាងឃុំរបស់ខ្ញុំហ្នឹង គឺមិនដែលដោះស្រាយបានចេញឲ្យពួកខ្ញុំទេ បានយើងខ្ញុំមានភាពអស់សង្ឃឹមត្រូវឡើងមកជួបគាត់ដើម្បីឲ្យគាត់ជួយធ្វើអន្តរាគមន៍» ។
សូមបញ្ជាក់ថា ប្រជាពលរដ្ឋជាង១០០នាក់នេះបានធ្វើដំណើរថ្មើរជើងពីខេត្តបាត់ដំបង និងខេត្តបន្ទាយមានជ័យ កាលពីថ្ងៃទី២៣ និងបានមកដល់ផ្ទះលោកនាយករដ្ឋមន្រ្តី កាលពីយប់ថ្ងៃទី២៨ ឧសភានេះ ហើយពួកគាត់មិនទាន់បានវិលត្រឡប់ទៅលំនៅវិញទេ ពួកគេកំពុងស្នាក់នៅខាងក្រោយវត្តបទុមវតី ក្នុងទីក្រុងភ្នំពេញ ៕