បន្ទាប់ពីក្រុមប្រឹក្សាជំនុំជម្រះបានប្រកាសសាលក្រមនៅថ្ងៃទី២៥ ធ្នូ លោក ជូង ជូងី មេធាវីរបស់ប្រជាពលរដ្ឋនៅតំបន់បឹងកក់បានអះអាងថា ក្រុមប្រឹក្សាជំនុំជម្រះបានកាត់សេចក្តីថា ប្រជាពលរដ្ឋត្រូវប្តឹងនៅសាលាក្រុង មិនត្រូវប្តឹងក្រុមហ៊ុនស៊ូកាគូទេ ៖ «តុលាការច្រានចោលការទាមទាររបស់ប្រជាពលរដ្ឋ»។
បន្ទាប់ពីប្រជាពលរដ្ឋបានដឹងថា ក្រុមប្រឹក្សាជំនុំជម្រះរបស់សាលាឧទ្ធរណ៍បានបដិសេធប្រជាពលរដ្ឋប្រមាណ១០០នាក់នៅមុខសាលាឧទ្ធរណ៍បាននាំគ្នាដុតធូបដាក់បណ្តាសាហើយស្រែកតិះដៀលតុលាការថាអយុត្តិធម៍។
តំណាងប្រជាពលរដ្ឋនៅតំបន់បឹងកក់បានរៀបរាប់ថា ពួកគាត់នឹងបន្តការតវ៉ាទៅគ្រប់ទីកន្លែងដើម្បីទាមទាររកយុត្តិធម៌ព្រោះតុលាការខ្មែរត្រូវការតែលុយ មិនអាចផ្តល់យុត្តិធម៌ឲ្យពួកគាត់បានឡើយ ៖ «ខ្ញុំនឹងបបួលគ្នីគ្នាចងក្រងធ្វើជាលិខិតមួយឡើងមកថ្វាយបង្គំព្រះមហាក្សត្រតែម្ដង សុំឲ្យព្រះមហាក្សត្រលោកជួយតែម្ដង ពេលហ្នឹង។ នឹងមានផែនការនៅថ្ងៃមុខនេះ នឹងទៅទៀត ទៅផ្ទះសម្ដេច ហ៊ុន សែន»។
មេធាវីរបស់ក្រុមហ៊ុនស៊ូកាគូ លោក ចេង ប៉េងហាប់ បានបញ្ជាក់ថា ការបូមខ្សាច់បញ្ចូលបឹងកក់នេះគឺជាការទទួលខុសត្រូវរបស់សាលាក្រុងមិនមានការពាក់ព័ន្ធនឹងក្រុមហ៊ុនស៊ូកាគូនោះទេ។
លោក ចេង ប៉េងហាប់ បានមានប្រសាសន៍ថា ៖ «ខ្ញុំគឺមេធាវីតំណាងឲ្យក្រុមហ៊ុន។ វិវាទហ្នឹងគឺវិវាទពាក់ព័ន្ធតែជាមួយប្រជាពលរដ្ឋនិងសាលាក្រុង ព្រោះអីក្រុមហ៊ុនខ្ញុំហ្នឹងគឺជួល ជួលរយៈពេល៩៩ឆ្នាំពីរដ្ឋ។ អ៊ីចឹងវិវាទហ្នឹងគឺសាលាក្រុងត្រូវដោះស្រាយគោលនយោបាយជាមួយប្រជាពលរដ្ឋម៉េចៗ អាហ្នឹងជាគោលការណ៍របស់គាត់»។
នៅថ្ងៃទី២៥ ធ្នូនេះ វិទ្យុអាស៊ីសេរីបានព្យាយាមសុំការបំភ្លឺពីអភិបាលរងក្រុងភ្នំពេញ ប៉ុន្តែលោកថាកំពុងជាប់រវល់ប្រជុំ។
សូមជម្រាបដែរថា នៅថ្ងៃពុធនេះមុននឹងប្រជាពលរដ្ឋនៅតំបន់បឹងកក់ចូលទៅជំនុំជម្រះនៅក្នុងសាលាឧទ្ធរណ៍បាននាំគ្នាទៅបន់ស្រន់នៅមុខព្រះអង្គដង្កាដោយសុំឲ្យបារមីស័ក្តិសិទ្ធិជួយឲ្យពួកគាត់បានឈ្នះនិងទទួលបានយុត្តិធម៌៕