មន្ត្រីអ្នកនាំពាក្យស្ថានទូតសហរដ្ឋអាមេរិកប្រចាំនៅកម្ពុជា បានមានប្រសាសន៍ឲ្យដឹងថា សហរដ្ឋអាមេរិកបានផ្តល់អាហារូបករណ៍ដល់សិស្សនិស្សិតខ្មែរចំនួន ៤៦នាក់ ក្នុងឆ្នាំ ២០០៩ នេះ នៅក្នុងកមុ្មវិធី Fulbright និង Hubert Humphrey ដែលមានរយៈពេលខុសៗគ្នា រួមមាននិស្សិតបន្តថ្នាក់អនុបណ្ឌិតមានរយៈពេលពីរឆ្នាំ និងនិស្សិតថ្នាក់បរិញ្ញាបត្រដែលផ្លាស់ប្តូរបទពិសោធន៍សិក្សារយៈពេល ៥សប្តាហ៍ ដល់ ៩ខែ ផ្អែកលើកម្មវិធីសិក្សានីមួយៗ។
លោក ចន ចនសុន (John Johnson) មន្ត្រី នាំ ពាក្យស្ថានទូតសហរដ្ឋអាមេរិកប្រចាំនៅកម្ពុជា បានបញ្ជាក់ថា សិស្សនិងនិស្សិតខ្មែរដែលទទួលបានអាហារូបករណ៍ទៅរៀននៅសហរដ្ឋអាមេរិកមានចំនួនកើនឡើងពីមួយឆ្នាំទៅមួយឆ្នាំ។
លោក ចន ចនសុន មានប្រសាសន៍តាមរយៈអ្នកបកប្រែឲ្យដឹងដូច្នេះថា ៖ "ហើយនេះគឺជាឱកាសមួយដែលយើងគិតថា និស្សិតដែលបានទទួលអាហារូបករណ៍ទៅរៀននោះ គឺជានិស្សិតដែលមានភាពវៃឆ្លាតបំផុតនៅក្នុងប្រទេសកម្ពុជា តំណាងឲ្យនិស្សិតផ្សេងៗទៀត។ ហើយជាឱកាសមួយដែលយើងអបអរចំពោះជ័យជម្នះរបស់គេ ហើយជាឱកាសមួយដែលលោកឯកអគ្គរដ្ឋទូតមានឱកាសជួយជាមួយពួកគេផងដែរ"។
លោក ចន ចនសុន បានថ្លែងទៀតថា ការបង្កើនចំនួនអ្នកទទួលបានអាហារូបករណ៍នេះ ដោយសារតែនិស្សិតខ្មែរកាន់តែមានភាពឆ្លាតវៃនិងការព្យាយាមយ៉ាងហ្មត់ចត់ក្នុងការសិក្សារៀនសូត្ររបស់ពួកគេនោះ។
រីឯលោកស្រី ខារ៉ល រ៉ដលី (Carol Rodley) ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានថ្លែងនៅក្នុងពិធីជួបជុំនិស្សិតដែលទទួលអាហារូបករណ៍ទៅសហរដ្ឋអាមេរិក និងនិស្សិតដែលបានវិលមកវិញនៅក្នុងសប្តាហ៍នេះថា ចាប់តាំងពីឆ្នាំ ១៩៩៤ មក Fulbright និង Hubert Humphrey សហរដ្ឋអាមេរិកបានផ្តល់អាហារូបករណ៍ដល់និស្សិតខ្មែរសរុបចំនួនជាង ៣០០នាក់ហើយមកដល់ឆ្នាំ ២០០៩ នេះ ដែលស្ថានទូតបានជួយសម្រួល។
លោកស្រី ខារ៉ល រ៉ដលី មានប្រសាសន៍ដូច្នេះ ៖ "ឆ្នាំនេះយើងបានបង្កើនចំនួន ២ដង សម្រាប់កម្មវិធីនៃការផ្លាស់ប្ដូរលើវិស័យអប់រំដែលយើងបានផ្ដល់ឲ្យ និងមានចំនួនកើនឡើង ៣ដង សម្រាប់ចំនួនសិស្សពីប្រទេសកម្ពុជា ដែលនឹងត្រូវទៅសិក្សានៅសហរដ្ឋអាមេរិកនាឆ្នាំក្រោយ គឺពីចំនួន ១៧នាក់ ទៅជាង ៤០នាក់ ក្នុងឆ្នាំ ២០០៩។ ពួកគេទាំងនេះនឹងទៅសិក្សានៅមហាវិទ្យាល័យនិងសកលវិទ្យាល័យនៅសហរដ្ឋអាមេរិកចំនួនជាង ២០ ខុសៗគ្នា ហើយនឹងចូលរួមប្រកួតប្រជែងជាមួយសិស្សអាមេរិកនិងប្រទេសផ្សេងៗទៀតនៅក្នុងពិភពលោក"។
លោកស្រី ខារ៉ល រ៉ដលី បានថ្លែងទៀតថា តាមរយៈការផ្លាស់ប្តូរការសិក្សានៅសហរដ្ឋអាមេរិកនេះ គឺជាការកសាងសមត្ថភាពនិងធនធានយុវជនកម្ពុជា ផងដែរ។ លោកស្រីបានថ្លែងទៀតថា និស្សិតដែលបានទៅសិក្សានៅសហរដ្ឋអាមេរិកនោះ នឹងយកបទពិសោធម៍និងចំណេះដឹងដែលទទួលបានមកចែករំលែកដល់សិស្សនិស្សិតផ្សេងទៀតនៅក្នុងប្រទេស។
កញ្ញា វ៉េង មូលីកា ជានិស្សិតថ្នាក់បរិញ្ញាបត្រ ដែលទៅផ្លាស់ប្តូរបទពិសោធន៍សិក្សានៅសហរដ្ឋអាមេរិករយៈពេល ៥សប្តាហ៍នេះបានបញ្ជាក់ថា កម្មវិធីសិក្សារបស់ពួកគេនៅទីនោះនឹងផ្តោតទៅលើរបបនយោបាយសហរដ្ឋអាមេរិកនិងលទ្ធិប្រជាធិបតេយ្យជាដើម។
កញ្ញា វ៉េង មូលីកា ឲ្យដឹងដូច្នេះ ៖ «យើងសង្ឃឹមថានឹងទទួលបានជោគជ័យ ព្រោះអីកម្ពុជា យើងទៅបង្ហាញពីភាពឯកភាពគ្នា គឺថាដូចគ្នាទាំងអស់ គេមើលមកដឹងថាយើងជាប្រទេសកម្ពុជាតែម្ដង។ យើងទៅហ្នឹងមានការចូលរួមទាំងអស់ ៣ប្រទេស គឺប្រទេសភូមា និងប្រទេសវៀតណាមទៀត»។
រីឯលោក ប៉េង អាន មានកូនប្រុសជាប់អាហារូបករណ៍ទៅសហរដ្ឋអាមេរិកបានថ្លែងដោយមានមោទនភាពថា ៖ «កូនបានចេញទៅរៀននៅក្រៅប្រទេសហ្នឹងខ្ញុំមានចិត្តត្រេកអរខ្លាំងណាស់។ កន្លងហើយគ្នាតស៊ូសព្វបែបយ៉ាងពុះពារក្នុងការងាររៀនសូត្រ អ៊ីចឹងគឺខ្ញុំត្រេកអរយ៉ាងខ្លាំង ដែលបានបណ្ដុះបណ្ដាលកូនខ្មែរឲ្យបានចំណេះដឹង គឺថាឲ្យចេះទាន់គេនៅសកលលោក កុំថាខ្មែរយើងអត់ចេះអី ឥឡូវខ្មែរយើងកាន់តែឈានឡើងហើយ។ ក្នុងនេះខ្ញុំមានមោទនភាព ដោយថាកូនខ្ញុំរៀនពូកែពិន្ទុល្អ បរទេសគេអាចបណ្ដុះបណ្ដាលបាន អ៊ីចឹងខ្ញុំសង្ឃឹមជឿជាក់ថាកូនខ្ញុំអនាគតល្អ»។
មន្ត្រីអ្នកនាំពាក្យស្ថានទូតសហរដ្ឋអាមេរិក ប្រចាំនៅកម្ពុជា លោក ចន ចនសុន (John Johnson) បានមានប្រសាសន៍ឲ្យដឹងដែរថា រដ្ឋាភិបាលសហរដ្ឋអាមេរិកបានចំណាយប្រាក់សម្រាប់និស្សិតដែលទទួលបានអាហារូបករណ៍ Fulbright ក្នុងមួយឆ្នាំចំណាយអស់ ៣ម៉ឺនទៅ ៤ម៉ឺនដុល្លារសហរដ្ឋអាមេរិកក្នុងម្នាក់ៗ ហើយសម្រាប់និស្សិតដែលមានកម្មវិធីផ្លាស់ប្តូរបទពិសោធន៍រៀនសូត្ររយៈពេលខ្លីនោះត្រូវចំណាយអស់ជាង ២ម៉ឺនដុល្លារអាមេរិកក្នុងម្នាក់ៗ។
កញ្ញា ធន់ វិមាលា ជានិស្សិតដែលបានទទួលអាហារូបករណ៍ Fulbright ហើយបានបញ្ចប់ថ្នាក់អនុបណ្ឌិត ឯកទេសអភិវឌ្ឍន៍សេដ្ឋកិច្ចពីសហរដ្ឋអាមេរិកនោះ បានថ្លែងថា គាត់ទទួលបានបទពិសោធន៍ក្នុងការរស់នៅនិងការសិក្សាយ៉ាងច្រើនពីសហរដ្ឋអាមេរិកនោះ។
កញ្ញា ធន់ វិមាលា មានប្រសាសន៍ដូច្នេះ ៖ «ចរិតលក្ខណៈនៃការរៀន យើងទៅនោះយើងធ្វើតាមគេ អ៊ីចឹងដែលយើងធ្វើតាមគេហ្នឹង គឺមានលក្ខណៈមួយចំនួនដែលយើងអាចយកមកប្រើជាមួយនិស្សិតយើងនៅណេះបាន។ ទី១ គឺចេះខំរៀនសិក្សាដោយខ្លួនឯង និស្សិតយើងខ្វះអាហ្នឹង ដូចថាយើងទំនេរអ៊ីចឹង យើងអត់ខំអានទេ។ នៅទីនោះ យើងរៀន ៣-៤ថ្នាក់ មួយថ្នាក់ៗគ្រាន់តែ homework (កិច្ចការគ្រូដាក់ឲ្យធ្វើនៅផ្ទះ) គ្រូឲ្យអាន ៩០ទំព័រ នៅធ្វើអីផ្សេងទៀតអ៊ីចឹង។ អ៊ីចឹងយើងត្រូវចេះស្រាវជ្រាវខ្លួនឯង ត្រូវចេះស្រលាញ់ការអាន។ ទី២ គឺត្រូវចេះពិភាក្សាជាមួយគ្រូនៅក្នុងថ្នាក់។ សិស្សខ្មែរក៏ដោយ ទៅដំបូងអត់សូវចេះអង់គ្លេសប៉ុន្មានទេ អត់សូវដល់គេក៏ដោយឲ្យតែយើងខំ នៅទីនោះគេឲ្យតម្លៃនៃការខំ អ៊ីចឹងឲ្យតែយើងខំ យើងស្មោះស្ម័គ្រនឹងការរៀនសូត្រ ស្រលាញ់ការរៀនសូត្រ គឺខ្ញុំធានាថាយើងរៀនពូកែតែម្ដងនៅទីនោះ»។
កញ្ញាបានថ្លែងទៀតថា កម្មវិធីសិក្សានិងបច្ចេកវិទ្យានៅក្នុងប្រទេសកម្ពុជា នៅមានកម្រិតនៅឡើយ ដែលធ្វើឲ្យនិស្សិតខ្មែរមួយចំនួនមិនមានលទ្ធភាពក្នុងការស្រាវជ្រាវនោះ។
ចំណែកឯលោក ពិត ចំណាន រដ្ឋលេខាធិការក្រសួងអប់រំយុវជននិងកីឡា បានមានប្រសាសន៍ថា សម្រាប់និស្សិតដែលទទួលបានអាហារូបករណ៍នៅសហរដ្ឋអាមេរិកនេះ គឺជាចំណុចវិជ្ជមានក្នុងវិស័យអប់រំនិងការបណ្តុះបណ្តាលធនធានមនុស្សនៅក្នុងប្រទេសកម្ពុជានោះ។
លោក ពិត ចំណាន មានប្រសាសន៍ថា ៖ «ហើយក្មួយៗអស់នេះចេញទៅនេះ ក៏ទី១ ទទួលយកនូវចំណេះដឹងថ្មីត្រឡប់វិញ ហើយទី២ គាត់ទៅនេះក៏ក្នុងនាមមួយ អាចថាជាការទូតមួយ ដែលចេញទៅដើម្បីឲ្យអាមេរិកាំងស្គាល់ពីកម្ពុជា ផងដែរ ទាំងទំនៀមទម្លាប់ ទាំងប្រពៃណី ទាំងការខិតខំរៀនសូត្ររបស់កម្ពុជាយើង ដែលសិស្សសព្វថ្ងៃនេះកាន់តែមានសមត្ថភាពអាចទទួលយកអាហារូបករណ៍គ្រប់បែបយ៉ាង គ្រប់ប្រទេសទាំងអស់។ ដូច្នេះគឺជាមោទនភាពមួយរបស់ខ្មែរដែលត្រូវបង្ហាញនៅក្រៅប្រទេសផងដែរ។ ក្មួយៗចេញទៅនេះគឺធ្វើឲ្យកម្ពុជាយើងកាន់តែមានមោទនភាព កាន់តែគេស្គាល់ច្រើន ចំពោះជនជាតិកម្ពុជាយើង ពិសេសគឺយុវជនយើងមានលក្ខណៈឧស្សាហ៍ព្យាយាមនិងរៀនមិនចាញ់យុវជនដទៃទៀតទៀត»។
លោក ពិត ចំណាន បានមានប្រសាសន៍ទៀតថា លោករំពឹងថា និស្សិតដែលបានឆ្លងកាត់ការសិក្សានៅក្រៅប្រទេសនឹងនាំយកចំណេះដឹងទាំងនោះមកចែករំលែកជាមួយនឹងយុវជនផ្សេងទៀត ហើយនិងយកចំណេះដឹងទាំងនោះមកបម្រើការងារនៅក្នុងប្រទេសខ្លួនវិញ៕