ចៅសង្កាត់ស្រះចក លោក ឆាយ ធីរិទ្ធ បានឲ្យដឹងថា ដោយសារតែសំណង់ថ្មីមានគុណភាពរឹងមាំល្អជាងមុន ហើយម្យ៉ាងវិញទៀត បច្ចុប្បន្ននេះ អចលនទ្រព្យកំពុងចុះតម្លៃបង្កការងាយស្រួលដល់ប្រជាពលរដ្ឋ ទើបពួកគាត់យល់ព្រមទទួលសំណងរបស់សាលាក្រុងភ្នំពេញមានការកើនឡើងជាលំដាប់។
លោក ឆាយ ធីរិទ្ធ មានប្រសាសន៍ដូច្នេះថា ៖ «កើនច្រើន ឥឡូវហ្នឹងមានរហូតដល់ជាង ៦០០គ្រួសារហើយ ដែលគេយល់ព្រមទទួលនិងបានចេញជាស្ថាពរ។ លើកមុន ផ្ទះធ្វើអត់សូវល្អ ប៉ុន្តែផ្ទះក្រោយហ្នឹងល្អ មានធ្វើចង្ក្រាន ធ្វើអីឲ្យទៀត ផ្ទះហ្នឹងស្អាតជាងមុន»។
បើតាមតំណាងប្រជាពលរដ្ឋនៅក្នុងភូមិ៤ ក្នុងតំបន់បឹងកក់ បានឲ្យដឹងថា នៅក្នុងភូមិ៤ មានប្រជាពលរដ្ឋប្រមាណ ៦០% និងប្រជាពលរដ្ឋនៅក្នុងភូមិ២ មានចំនួន ៧០% បានយល់ព្រមទទួលយកសំណងរបស់សាលាក្រុងភ្នំពេញជាថ្នូរនឹងការចាកចេញរួចហើយ។
ប្រជាពលរដ្ឋម្នាក់នៅក្នុងភូមិ៤ ដែលបានចាកចេញពីតំបន់បឹងកក់ បានឲ្យដឹងថា គាត់យល់ព្រមទទួលយកសំណងជាផ្ទះល្វែងជាថ្នូរនឹងការចាកចេញ ព្រោះបើសិនជានៅបន្តការតវ៉ាបន្តទៅទៀត គាត់មិនសង្ឃឹមថា បានទទួលលទ្ធផលអ្វីប្រសើរជាងនេះឡើយ។
ប៉ុន្តែទោះជាយ៉ាងណា តំណាងប្រជាពលរដ្ឋនៅក្នុងភូមិ២២ ក្នុងតំបន់បឹងកក់ដែរនោះ គឺអ្នកស្រី បេ ផារ៉ុម បានអះអាងថា ប្រជាពលរដ្ឋនៅក្នុងភូមិរបស់គាត់មិនអាចចាកចេញពីផ្ទះរបស់ពួកគាត់ទេ បើមិនបានសំណង ១៥០០ដុល្លារអាមេរិកក្នុង ១ម៉ែត្រការ៉េនោះទេ។
អ្នកស្រី បេ ផារ៉ុម ថ្លែងដូច្នេះថា ៖ «អត់យល់ព្រមទេ ភូមិ២២របស់ខ្ញុំហ្នឹង គឺអត់យល់ព្រមតែម្ដង អត់មានអ្នកណាម្នាក់ចង់ស្ម័គ្រទៅទេ។ ឥឡូវ បូមគេមិនឲ្យប៉ះពាល់ផ្ទះប្រជាជនទេ គេខ្ជិលដោះស្រាយជាមួយប្រជាជន គឺគេបូមដាក់កណ្ដាលបឹងតែម្ដង»។
ពាក់ព័ន្ធនឹងការអភិវឌ្ឍនៅតំបន់បឹងកក់របស់សាលាក្រុងភ្នំពេញនេះដែរ មេធាវីរបស់ប្រជាពលរដ្ឋដែលមានលំនៅនៅទីតាំងបឹងកក់ លោក ជូង ជូងី បានឲ្យដឹងថា បន្ទាប់ពីតុលាការក្រុងភ្នំពេញបានបដិសេធនឹងខ្លឹមសារនៃការសម្រេចរក្សាការពារឲ្យក្រុមហ៊ុន ស៊ូកាគូ អ៊ីន ផ្អាកការបូមដីចាក់បំពេញទីតាំងបឹងកក់ រហូតដល់មានដំណោះស្រាយរវាងក្រុមហ៊ុននិងប្រជាពលរដ្ឋជាមុនសិននោះ លោកក៏បានដាក់បណ្តឹងទៅសាលាឧទ្ធរណ៍រួចហើយកាលពីល្ងាចថ្ងៃទី២៣ កញ្ញា ហើយសាលាឧទ្ធរណ៍នឹងបើកសវនាការនៅថ្ងៃទី២៥ ធ្នូ ស្អែកនេះ។
បើតាមអាជ្ញាធរ បានឲ្យដឹងដែរថា កាលពីមុនសាលាក្រុងនិងក្រុមហ៊ុន ស៊ូកាគូ មានផ្ទះចំនួនតែជាង ២០០ផ្ទះប៉ុណ្ណោះសម្រាប់ផ្តល់ជាសំណងជូនប្រជាពលរដ្ឋ ហើយក្រៅពីនោះ ប្រជាពលរដ្ឋអាចទទួលយកលុយ ឬការអភិវឌ្ឍនៅនឹងកន្លែង ប៉ុន្តែដោយមើលឃើញថា ប្រជាពលរដ្ឋបានជ្រើសរើសយកផ្ទះច្រើនជាងជម្រើសពីរផ្សេងទៀត ខាងភាគីក្រុមហ៊ុនក៏បានសាងសង់ផ្ទះជាង ១ពាន់ខ្នងបន្ថែមទៀត ដើម្បីតម្រូវតាមការជ្រើសរើសរបស់ប្រជាពលរដ្ឋ៕