មន្ត្រីប៉ូលិសការពារព្រំដែនខ្មែរមួយរូបសុំកុំឲ្យបញ្ចេញឈ្មោះ ដែលកំពុងប្រចាំការពារព្រំដែននៅតំបន់បុសស្បូវនោះ បានមានប្រសាសន៍ឲ្យដឹងកាលពីយប់ថ្ងៃទី១ ខែកុម្ភៈថា ទាំងគ្រួសារប៉ូលិស និងទាហានប្រមាណជាង ៩០គ្រួសារ ដែលមានស្រ្តី និងកូនក្មេងប្រមាណ ៣០០នាក់ ត្រូវបានគេឲ្យចាកចេញពីភូមិបុសស្បូវជាបណ្ដោះអាសន្ន ពីព្រោះភូមិនោះបានស្ថិតនៅកៀកជាប់នឹងព្រំដែនខ្មែរ-ថៃ (តំបន់ជាំតែ) ដែលគេមិនអាចធានាសុវត្ថិភាពបានទេ ប្រសិនបើមានការប៉ះទង្គិចគ្នារវាងកងទ័ពខ្មែរ-ថៃ ដោយសារជម្លោះព្រំដែនកើតឡើងនោះ។
ចំណែកស្ថានការណ៍ប្រឈមមុខដាក់គ្នានៅតំបន់ទល់មុខប្រាសាទព្រះវិហារវិញ មានសេចក្ដីរាយការណ៍ថា រហូតមកដល់ថ្ងៃអង្គារ ទី១ ខែកុម្ភៈ គឺនៅតែមានភាពតានតឹងនៅឡើយទេ ដែលទាហានទាំងសងខាងនៅតែត្រៀមលក្ខណៈប្រយុទ្ធ។
ទាហានខ្មែរម្នាក់ដែលកំពុងប្រចាំការពារនៅតំបន់ប្រាសាទព្រះវិហារ បានមានប្រសាសន៍ថា កាលពីព្រឹកថ្ងៃអង្គារ ទាហានឈុតខ្មៅថៃ មួយក្រុម បានព្យាយាមរារាំងទាហានខ្មែរមិនឲ្យឈូសធ្វើផ្លូវនៅតំបន់ភ្នំទល់មុខទីវត្តខ្មែរ កែវសិក្ខាគិរីស្វារៈ ប៉ុន្តែពួកទាហានថៃទាំងនោះ បានដកថយទៅវិញ នៅពេលដែលទាហានខ្មែរពុំបានស្ដាប់តាមការហាមឃាត់នោះ។
កាលពីល្ងាចថ្ងៃដដែលនេះដែរ ថៃបានបើកយន្តហោះយកការណ៍របស់ខ្លួនចូលមកលើដែនអាកាសរបស់ខ្មែរ ដោយរំលងលើប្រាសាទព្រះវិហារ។
កងទាហានខ្មែរបានឲ្យដឹងទៀតថា រហូតមកដល់ថ្ងៃអង្គារនេះ ស្ថានការណ៍ប្រឈមមុខដាក់គ្នាដោយយោធាខ្មែរ-ថៃ នៅតែមានភាពតានតឹង ហើយទាហានខ្មែរនៅតែត្រៀមខ្លួនប្រយុទ្ធ។
នៅស្របពេលដែលការប្រឈមមុខដាក់គ្នាដ៏តានតឹងរវាងទាហានខ្មែរ និងថៃ នៅជុំវិញតំបន់ប្រាសាទព្រះវិហារនោះ មានសេចក្ដីរាយការណ៍ថា ថៃបានដាក់ពង្រាយទាហានឈុតខ្មៅរបស់គេជាច្រើនចុះមកខាងក្រោមចង្កេះភ្នំនៃបន្ទាយក្រហមរបស់គេ ទល់មុខប្រាសាទព្រះវិហារ ព្រមទាំងលើកទង់ជាតិថៃ តាំងតែពីថ្ងៃទី៣០ ខែមករា ដែលតំបន់នោះកងទ័ពខ្មែរធ្លាប់បានហាមឃាត់មិនឲ្យលើកទង់ម្តងមកហើយ៕