នៅក្នុងសម័យប្រជុំអនុម័តសេចក្ដីព្រាងច្បាប់ស្ដីពីលទ្ធកម្មសាធារណៈដែលមានសំឡេងគាំទ្រ៨៤ លើ ៨៤សំឡេងនោះ លោក ជាម យៀប ជាប្រធានគណៈកម្មាធិការសេដ្ឋកិច្ចហិរញ្ញវត្ថុ និងសវនកម្មនៃរដ្ឋសភាបានជំរុញឲ្យរដ្ឋាភិបាលធ្វើការផ្សព្វផ្សាយ និងអនុវត្តច្បាប់នេះឲ្យមានប្រសិទ្ធភាពនៅពេលច្បាប់នេះចូលជាធរមាន។
លោក ជាម យៀប មានប្រសាសន៍នៅក្នុងសម័យប្រជុំសភានៅព្រឹកថ្ងៃទី៣ មករា ថា ច្បាប់នេះផ្ដោតសំខាន់អំពីការដេញថ្លៃលើការជួល ទិញ លក់ ជាដើម។ ដើម្បីទប់ទល់នឹងអំពើកេងប្រវ័ញ្ចអំពើពុករលួយ និងភាពមិនប្រក្រតីផ្សេងៗដែលអាចនឹងកើតមានឡើងក្នុងវិស័យទាំងនេះ៖ «ឥឡូវនេះយើងរៀបចំច្បាប់មែនទែនហើយ អ៊ីចឹងពីថ្ងៃនេះទៅមិនអាចបុគ្គលណា ខ្ញុំអត់ចេញច្បាប់ទេ ខ្ញុំមិនដែលឃើញសភាអនុម័តទេ បានខ្ញុំធ្វើខុស ហើយប្រាប់សុំតុលាការថា ខ្ញុំមិនចេះច្បាប់ បានជាខ្ញុំធ្វើខុស សុំលើកលែងទោស អត់បានទេ»។
ទោះបីជានៅក្នុងច្បាប់ស្ដីពីលទ្ធកម្មសាធារណៈ បានចែងអំពីទោសទណ្ឌមានចំនួន ៩មាត្រាក្ដី ប៉ុន្តែលោក ជាម យៀប បានអះអាងថា គេអាចប្រើក្រមព្រហ្មទណ្ឌយកមកអនុវត្ត ប្រសិនបើបុគ្គលណាម្នាក់បានប្រព្រឹត្តខុសទៅនឹងច្បាប់នេះ។
លោក ជាម យៀប បានព្រមានចំពោះមន្ត្រីរាជការទាំងឡាយដែលបម្រើការងារនៅក្នុងស្ថាប័នរដ្ឋ ត្រូវតែយល់ដឹងអំពីច្បាប់នេះ៖ «ជនល្មើសណាក៏មិនរួចពីសំណាញ់ច្បាប់ដែរ ហើយក្នុងនេះបានបញ្ជាក់យ៉ាងច្បាស់ថា មានទោស ទោសទណ្ឌចំទិសយ៉ាងល្អិតល្អន់ អ្នករាជការគ្រប់លំដាប់ថ្នាក់បានប្រព្រឹត្តបទល្មើស ឬល្មើសនឹងច្បាប់នេះ នឹងទទួលទោស»។
ច្បាប់ស្ដីពីលទ្ធកម្មសាធារណៈ មាត្រា១ បានចែងថា ច្បាប់នេះមានគោលបំណងធានាឲ្យដំណើរការលទ្ធកម្មសាធារណៈសម្រាប់ការទិញ ការសាងសង់ ការជួសជុល ការជួលសេវាកម្ម និងការជួលសេវាទីប្រឹក្សា ប្រព្រឹត្តទៅប្រកបដោយតម្លាភាពគណនេយ្យភាព ភាពយុត្តិធម៌ ប្រសិទ្ធភាព គុណភាព សមភាព ការសន្សំសំចៃ និងភាពទាន់ពេលវេលា ព្រមទាំងធានាឲ្យបាននូវប្រព័ន្ធលទ្ធកម្មសាធារណៈឯកភាពមួយនៅប្រទេសកម្ពុជា។
នៅក្នុងសម័យប្រជុំ និងអនុម័តសេចក្ដីព្រាងច្បាប់ស្ដីពីលទ្ធកម្មនេះ គេសង្កេតឃើញថា ក្រុមតំណាងរាស្ត្រគណបក្សប្រឆាំងធំជាងគេនៅកម្ពុជា មិនបានចូលរួមនោះទេ។
លោក កឹម សុខា ដែលជាប្រធានគណបក្សសិទ្ធិមនុស្ស ដែលលោកបានចូលរួមប្រជុំ និងអនុម័តច្បាប់នេះដែរនោះ លោកមានប្រសាសន៍ថា ច្បាប់ស្ដីពីលទ្ធកម្មសាធារណៈមានខ្លឹមសារគ្រប់គ្រាន់សម្រាប់អនុវត្តលើការដេញថ្លៃអាជីវកម្ម ប៉ុន្តែលោកបញ្ជាក់ថា បញ្ហាសំខាន់វាស្ថិតនៅលើការអនុវត្តច្បាប់តែប៉ុណ្ណោះ ថាតើមានប្រសិទ្ធភាព ឬគ្មាននោះ៖ «វាមានការបញ្ជាពីខាងលើទៅ។ ឧទាហរណ៍ក្រុមហ៊ុនមួយចង់ដេញថ្លៃអីយក គ្រាន់តែធ្វើ ដេញហើយអត់មានតម្លាភាពទេ ហើយគាត់គ្រាន់សូកថ្នាក់លើទៅ ដើម្បីបញ្ជាមកមេក្រសួងហ្នឹងទៅ ដើម្បីបានលើអ្នកណាម្នាក់ដើម្បីបានទឹកតែហ្នឹង»។
មាត្រា៥ បានចែងថា ក្រសួងសេដ្ឋកិច្ច និងហិរញ្ញវត្ថុ ជាស្ថាប័នមានសមត្ថកិច្ចក្នុងការគ្រប់គ្រងលទ្ធកម្មសាធារណៈ និងមានសិទ្ធិអំណាចរៀបចំគោលនយោបាយលទ្ធកម្មសាធារណៈ ព្រមទាំងអនុវត្តសិទ្ធិអំណាចដែលមានកំណត់ក្នុងច្បាប់នេះ និងលិខិតបទដ្ឋានគតិយុត្តិពាក់ព័ន្ធផ្សេងៗទៀត។
មាត្រា១១ បានចែងថា វិធីសាស្ត្រដេញថ្លៃដោយប្រកួតប្រជែងជាសាធារណៈ ជាវិធីសាស្ត្រលទ្ធកម្មសម្រាប់ជ្រើសរើសអ្នកផ្គត់ផ្គង់ទំនិញអ្នកទទួលការសំណង់ ឬអ្នកផ្ដល់សេវាកម្ម ដោយបើកចំហចំពោះគ្រប់អ្នកដេញថ្លៃក្នុងស្រុក និងអន្តរជាតិ។
មន្ត្រីនាំពាក្យគណបក្ស សម រង្ស៊ី លោក យឹម សុវណ្ណ មានប្រសាសន៍ថា ក្រុមតំណាងរាស្ត្រគណបក្សប្រឆាំង បានធ្វើពហិការមិនចូលរួមប្រជុំសភានៅព្រឹកថ្ងៃទី៣ ខែមករា ដើម្បីអនុម័តសេចក្ដីព្រាងច្បាប់ស្ដីពីលទ្ធកម្មនេះទេ ដោយសារថា រដ្ឋាភិបាលមិនទាន់បានដោះស្រាយនូវសំណើរបស់ខ្លួនដែលខាងគណបក្សប្រឆាំងបានស្នើសុំឲ្យរដ្ឋាភិបាលដោះស្រាយនូវបញ្ហាជម្លោះដីធ្លីជូនប្រជាពលរដ្ឋ និងការស្នើឲ្យកែទម្រង់គណៈកម្មាធិការជាតិរៀបចំការបោះឆ្នោតនោះ។
ទោះបីជាយ៉ាងនេះក្ដី លោក យឹម សុវណ្ណ បានអះអាងថា ច្បាប់ស្ដីពីលទ្ធកម្មសាធារណៈនេះ គេមិនទាន់បញ្ចូលឲ្យបានគ្រប់ជ្រុងជ្រោយនៅឡើយទេ ច្បាប់នេះនៅមានចន្លោះប្រហោងច្រើនដែលនៅតែបើកឱកាសឲ្យមន្ត្រីមានអំណាចធំៗ ប្រព្រឹត្តអំពើពុករលួយដដែល ដូចជាគេមិនបានបញ្ចូលអំពីការធ្វើកិច្ចសន្យាសម្បទានដីរ៉ែធំៗ មិនស្ថិតនៅក្រោមការត្រួតពិនិត្យរបស់ច្បាប់នេះនៅឡើយ។
លោក យឹម សុវណ្ណ៖ «ធនធានធម្មជាតិ ដីសម្បទានរ៉ែ មិនស្ថិតនៅក្រោមដាក់ឲ្យដេញថ្លៃការធ្វើលទ្ធកម្មនោះឲ្យបានត្រឹមត្រូវទេ គឺរដ្ឋាភិបាលជាអ្នកសម្រេច មានមន្ត្រីអ្នកមានអំណាចមួយចំនួនតូច គឺជាអ្នកសម្រេចដែលគ្មានតម្លាភាព ហើយក៏មានទទួលបានអភិបាលកិច្ចត្រឹមត្រូវនោះទេ»។
នៅក្នុងរយៈពេលចុងក្រោយនេះ សភាជាតិបានអនុម័តច្បាប់ជាច្រើនសម្រាប់ដោះស្រាយជម្លោះអនុវត្តការងារ និងអភិវឌ្ឍន៍សង្គមជាដើម ក៏ប៉ុន្តែដំណើរការអនុវត្តច្បាប់ដែលសភាបានអនុម័តហើយនោះ គេសង្កេតឃើញថា មិនទាន់មានប្រសិទ្ធភាពនៅឡើយ។ ការអនុវត្តច្បាប់ណាមួយនោះ អាស្រ័យលើមេដឹកនាំបញ្ជា ហើយប្រព័ន្ធតុលាការមិនឯករាជ្យ។
នៅក្នុងឆ្នាំ២០១២ នេះ សភាជាតិគ្រោងនឹងអនុម័តសេចក្ដីព្រាងច្បាប់ជាច្រើនទៀត មានដូចជាច្បាប់ស្ដីពីការចាយវាយថវិកាជាតិ ច្បាប់ស្ដីពីលក្ខន្តិកៈរបស់អាជ្ញាសាលា និងសេចក្ដីព្រាងច្បាប់ស្ដីពីច្បាប់គ្រប់គ្រងប្រេង និងឧស្ម័ននៅកម្ពុជាជាដើម។
អ្នកជំនាញផ្នែកវិទ្យាសាស្ត្រនយោបាយ និងជាអ្នកវិភាគឯករាជ្យ លោកបណ្ឌិត សុខ ទូច បានឲ្យដឹងថា ការអនុម័តច្បាប់បានច្រើនសម្រាប់យកមកប្រើប្រាស់នៅកម្ពុជានោះ វាជាការប្រសើរ ប៉ុន្តែច្បាប់ទាំងឡាយដែលសភាបានអនុម័តកន្លងមក គឺគេមិនទាន់បានអនុវត្តមានប្រសិទ្ធភាពនៅឡើយ ដូចជាច្បាប់ស្ដីពីឯកពន្ធនភាព និងច្បាប់ប្រឆាំងអំពើពុករលួយជាដើម។
លោកបណ្ឌិត សុខ ទូច៖ «វាជាការត្រឹមត្រូវសម្រាប់អ្នកនយោបាយ នៅពេលគេចង់ប្រើ គេយកច្បាប់អនុវត្ត គេយកមកប្រើទៅ ក៏ប៉ុន្តែនៅពេលអ្នកនយោបាយលែងត្រូវការរឿងនោះ ក៏រលត់បាត់ទៅ។ ឧទាហរណ៍ដូចជាច្បាប់ឯកពន្ធនភាពជាដើម។ ទីពីររឿងអំពើពុករលួយ ទ្រឹស្ដីមួយគេថា គេអនុវត្តដូចភ្លៀងរលឹម ប៉ុន្តែការអនុវត្តដូចខ្យល់ព្យុះវិញ ក្រោយពីនោះស្ងាត់ទៅវិញ»។
លោកបណ្ឌិត សុខ ទូច បានលើកហេតុផលថា ការអនុវត្តច្បាប់នៅមានកម្រិតនេះ ដោយសារបរិបទនយោបាយនៅកម្ពុជា គឺគេគោរពបុគ្គលជាងគោរពច្បាប់ ហើយបញ្ហានេះបានកើតមាននៅគ្រប់ជំនាន់នៅក្នុងសង្គមកម្ពុជា ដែលវាបន្តមរតកដល់សម័យបច្ចុប្បន្ន៖ «អ៊ីចឹងតួអង្គនីតិប្បញ្ញត្តិ ប្រណិបត្តិ និងតុលាការ អ៊ីចឹងមើលតួអង្គបីហ្នឹង ថាតើតួអង្គនីតិប្បញ្ញត្តិហ្នឹង គាត់មានសិទ្ធិប៉ុណ្ណា ដើម្បីត្រួតពិនិត្យអង្គនីតិប្រតិបត្តិ»។
ទោះបីជាយ៉ាងណាក៏ដោយ ទាំងក្រុមមន្ត្រីគណបក្សប្រឆាំង និងអ្នកវិភាគឯករាជ្យ សង្កត់ធ្ងន់ថា គេនឹងមិនសង្ឃឹមទេថា ច្បាប់ស្ដីពីលទ្ធកម្មសាធារណៈនេះនឹងអនុវត្តឲ្យមានប្រសិទ្ធភាពនៅពេលខាងមុខនោះ។ ពួកគេបានលើកឡើងថា ការអនុវត្តច្បាប់នាពេលបច្ចុប្បន្ន ជាពិសេសប្រព័ន្ធតុលាការនោះ អនុវត្តអាស្រ័យទៅលើចរន្តនយោបាយ ដោយគេបានលើកជាឧទាហរណ៍ថា រឿងទំនាស់ផ្នែកនយោបាយតុលាការចាត់ការសំណុំរឿងនោះបានលឿន ប៉ុន្តែបើករណីបណ្ដឹងរបស់ប្រជាពលរដ្ឋក្រីក្រអំពីករណីទំនាស់រឿងដីធ្លី តុលាការមិនសូវចាត់ការទេ ដូចជាករណីជម្លោះដីអ្នកភូមិបឹងកក់ រហូតមកទល់ពេលនេះមិនទាន់មានដំណោះស្រាយសមរម្យនៅឡើយ៕