គណៈកម្មាធិការជាតិរៀបចំការបោះឆ្នោត បានកំណត់ការពិនិត្យបញ្ជីឈ្មោះអ្នកបោះឆ្នោត និងដំណើរការចុះឈ្មោះអ្នកបោះឆ្នោត នាខែតុលាឆ្នាំ២០១០នេះ ដើម្បីឈានទៅរកការបោះឆ្នោតជ្រើសរើសក្រុមប្រឹក្សាឃុំ សង្កាត់ នាឆ្នាំ២០១២ និងការបោះឆ្នោតជ្រើសរើសតំណាងរាស្ត្រនៅឆ្នាំ២០១៣។
លោក ទេព នីថា អគ្គលេខាធិការ គ.ជ.ប. បានមានប្រសាសន៍នៅថ្ងៃសុក្រ ទី៦ ខែសីហាថា តាមច្បាប់ និងនីតិវិធីរបស់គណៈកម្មាធិការជាតិរៀបចំការបោះឆ្នោត ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំនឹងចាប់ផ្ដើមជាផ្លូវការនៅថ្ងៃទី១ ខែតុលា រហូតដល់ថ្ងៃទី៣១ ខែធ្នូ ឆ្នាំ២០១០ ៖ «នៅចំពោះមុខនេះ គ.ជ.ប. និងធ្វើការជ្រើសរើសបុគ្គលិកមួយចំនួននៅ គ.ជ.ប. និងនៅតាមខេត្តខ្លះ ដើម្បីធ្វើការបណ្ដុះបណ្ដាល ដើម្បីចាប់ផ្ដើមដំណើរការងារនេះនៅខែតុលា»។
ការប្រកាសរបស់មន្ត្រី គ.ជ.ប. នេះ គឺបានធ្វើឡើងក្នុងសិក្ខាសាលាលើកដំបូងមួយ ក្នុងខេត្តបាត់ដំបង ស្តីពីការពិគ្រោះយោបល់ជាមួយគណបក្សនយោបាយ អង្គការសង្គមស៊ីវិល និងអាជ្ញាធរមូលដ្ឋាន ដើម្បីសិក្សាជុំវិញដំណើរការពិនិត្យឈ្មោះ និងការចុះឈ្មោះបោះឆ្នោត ខណៈដែលបញ្ហានេះរងការរិះគន់ពីក្រុមអង្គការជាតិ អន្តរជាតិ និងគណបក្សនយោបាយនានា នៅក្នុងការបោះឆ្នោតជ្រើសរើសតំណាងរាស្ត្រ កាលពីឆ្នាំ២០០៨កន្លងមក។
នៅក្នុងសិក្ខាសាលានេះ ក៏មានការចូលរួមពីតំណាងគណបក្សនយោបាយ និងអង្គការសង្គមស៊ីវិល និងអាជ្ញាធរមូលដ្ឋាន មកពីខេត្តចំនួន៦ គឺខេត្តបាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប និងខេត្តព្រះវិហារ ចំនួន៩៨នាក់ ដើម្បីរួមគ្នារិះរកយន្តការដោះស្រាយទាក់ទិនដំណើរការពិនិត្យ និងការចុះឈ្មោះអ្នកបោះឆ្នោតនេះ។
ទោះយ៉ាងនេះក្តី លោក ទេព នីថា អគ្គលេខាធិការ គ.ជ.ប. បានមានប្រសាសន៍បញ្ជាក់ថា ដើម្បីកាត់បន្ថយបញ្ហាខាងលើនេះ ក្រសួងមហាផ្ទៃ និងគ.ជ.ប. កំពុងធ្វើការសិក្សា និងកំណត់បញ្ហាប្រឈម ដើម្បីបញ្ជូនក្រុមការងារបច្ចេកទេសចុះពិគ្រោះផ្ទាល់ជាមួយនឹងមន្ត្រីគណៈកម្មការក្រុមប្រឹក្សាឃុំ សង្កាត់ ក៏ដូចជាគណៈកម្មការបោះឆ្នោត និងអាជ្ញាធរមានសមត្ថកិច្ច ដែលពាក់ព័ន្ធទៅនឹងការចុះឈ្មោះដើម្បីពិគ្រោះយោបល់លើបញ្ហាបច្ចេកទេស ៖ «ហើយក្រោយពីពិគ្រោះយោបល់គ្រប់តំបន់ទាំងបួន ដែលយើងបានកំណត់រួចហើយ ក្រុមការងារនឹងកំណត់បញ្ហាប្រឈម និងលើកជាវិធានដំណោះស្រាយដើម្បីដាក់ជូនថ្នាក់ដឹកនាំសម្រេច ក្នុងគោលបំណងកែលម្អការចុះឈ្មោះបោះឆ្នោតនាពេលខាងមុខ សម្រាប់ការបោះឆ្នោតឲ្យបានល្អ»។
ក្រសួងមហាផ្ទៃ និងគណៈកម្មាធិការជាតិរៀបចំការបោះឆ្នោតជាមួយគ្នានេះ ក៏មានគម្រោងបញ្ជូនក្រុមការងារបច្ចេកទេសទៅរៀបចំសិក្ខាសាលាដូចគ្នានេះទៀត នៅខេត្តកំពង់ចាម ខេត្តព្រះសីហនុ និងចុងក្រោយធ្វើនៅក្រុងភ្នំពេញ។
តួលេខរបស់ គ.ជ.ប. បានឲ្យដឹងថា នៅក្នុងឆ្នាំ២០១០ ប្រជាពលរដ្ឋដែលមានអាយុចាប់ពី១៨ឆ្នាំឡើងទៅ មានចំនួនជាង៨លាន ៥សែននាក់ ហើយចំនួនអ្នកបោះឆ្នោតនៅក្នុងបញ្ជីបោះឆ្នោត កាលពីឆ្នាំ២០០៩ មានចំនួន៨លាន ៣សែននាក់។
ចំណែកឯចំនួនប្រជាពលរដ្ឋដែល គ.ជ.ប. បម្រុងនឹងចុះឈ្មោះក្នុងឆ្នាំ២០១០នេះ មានជាង៣០ម៉ឺននាក់ ខណៈដែលដំណើរការបោះឆ្នោតក្រុមប្រឹក្សាឃុំសង្កាត់ និងធ្វើនៅឆ្នាំ២០១២ និងការបោះឆ្នោតជ្រើសរើសតំណាងរាស្ត្រ និងត្រូវធ្វើឡើងនៅឆ្នាំ២០១៣៕