លោកនាយករដ្ឋមន្ត្រី ហ៊ុន សែន នៅថ្ងៃអង្គារ ទី១៩ ខែតុលា បានសម្ដែងការកោតសរសើរយ៉ាងខ្លាំងដល់សាធារណរដ្ឋប្រជាមានិតចិន ក្នុងការរួមចំណែកផ្ដល់ប្រាក់ជំនួយយ៉ាងច្រើន ដើម្បីសាងសង់អគារទីស្ដីការគណៈរដ្ឋមន្ត្រីថ្មី។
មានប្រសាសន៍នៅក្នុងកិច្ចសម្ពោធឲ្យមានការប្រើប្រាស់អគារចំនួនពីរ មួយគឺអគារទីស្ដីការគណៈរដ្ឋមន្ត្រី ដែលគេឲ្យឈ្មោះថា វិមានមិត្តភាព និងអគារមួយទៀត គឺអគារខុទ្ទកាល័យនាយករដ្ឋន្ត្រី និងជាមជ្ឈមណ្ឌលសន្និសីទអន្តរជាតិ ហើយដែលគេឲ្យឈ្មោះថា អគារសន្តិភាព។ លោកនាយករដ្ឋមន្ត្រីបានរំពឹងថា អគារថ្មីសន្លាងធំស្កឹមស្កៃទាំងពីរនេះ នឹងក្លាយទៅជាមរតកសម្រាប់កូនចៅខ្មែរជំនាន់ក្រោយ ក៏ដូចជាទីកន្លែងធ្វើការងារប្រកបដោយប្រសិទ្ធភាព ដើម្បីបម្រើប្រយោជន៍សង្គម។
លោកនាយករដ្ឋមន្ត្រី ហ៊ុន សែន មានប្រសាសន៍បញ្ជាក់ជូនដូច្នេះ ៖ «ការរួមបញ្ចូលគ្នានៃអគារទីស្ដីការគណៈរដ្ឋមន្ត្រី ដែលជាជំនួយដ៏ថ្លៃថ្លារបស់សាធារណរដ្ឋចិន និងអគារនាយករដ្ឋមន្ត្រី និងមជ្ឈមណ្ឌលសន្និសីទ នឹងក្លាយទីតាំងនេះទៅជាវិមានរដ្ឋាភិបាលថ្មីមួយ ដែលនឹងបង្ហាញឲ្យឃើញនូវឆន្ទៈរបស់រដ្ឋាភិបាលកម្ពុជា ក្នុងការលើកកម្ពស់វិសាលភាព និងគុណភាពនៃសេវាសាធារណៈ ដើម្បីបម្រើប្រយោជន៍សង្គមជាតិឲ្យបានជាអតិបរមា»។
អតីតអគារទីស្ដីការគណៈរដ្ឋមន្ត្រី បានសាងសង់ឡើងនៅក្នុងទសវត្សរ៍ឆ្នាំ១៩៦០ ក្នុងសម័យសង្គមរាស្ត្រនិយម ដែលដឹកនាំដោយអតីតព្រះមហាក្សត្រខ្មែរ ព្រះបាទ នរោត្ត សីហនុ។ ប៉ុន្តែក្រោយមក នៅឆ្នាំ២០០៤ នៅក្រោយដំណើរទស្សនកិច្ចរបស់ឧបនាយករដ្ឋមន្ត្រីចិន នៅកម្ពុជា អគារនេះគេបានលើកគម្រោងឲ្យមានការសាងសង់ជាថ្មី ក្រោមជំនួយឧបត្ថម្ភរបស់ប្រទេសចិន ដែលមានទឹកប្រាក់ប្រមាណ ៣២,៩លានដុល្លារ។
ទីស្ដីការគណៈរដ្ឋមន្ត្រី ឬ វិមានមិត្តភាព ដែលជាជំនួយរបស់ប្រទេសចិន បានសាងសង់ឡើងអស់រយៈពេល ១៩ខែ មានកម្ពស់ ៤០ម៉ែត្រ ត្រូវជា ៧ជាន់ គឺជាសាលសន្និសីទជាតិ និងអន្តរជាតិ ជាកន្លែងទទួលភ្ញៀវ ការិយាល័យ និងជាកន្លែងសម្របសម្រួលដោះស្រាយបញ្ហានានា។
អគារនាយករដ្ឋមន្ត្រី និងមជ្ឈមណ្ឌលអន្តរជាតិ ឬ វិមានសន្តិភាព បានសាងសង់ឡើងអស់រយៈពេល ១៨ខែ ដោយវិស្វករខ្មែរ និងរចនាតាមបែបខ្មែរ បានប្រើទឹកប្រាក់របស់រដ្ឋាភិបាល មានកម្ពស់ ៥ជាន់។ អគារនេះគឺជាការិយាល័យនាយករដ្ឋមន្ត្រី ជាកន្លែងប្រជុំអន្តរជាតិ បំពាក់ដោយប្រព័ន្ធសន្តិសុខ និងប្រព័ន្ធបច្ចេកទេសទំនើបផ្សេងទៀត។ អគារនេះមិនត្រូវបានគេបង្ហាញថា ត្រូវចំណាយអស់ទឹកប្រាក់ប៉ុន្មាននោះទេ។
លោកនាយករដ្ឋមន្ត្រីបានប្រកាសថា ការសាងសង់អគារនោះ ធ្វើឡើងដោយសារតែអគារនោះចាស់ទ្រុឌទ្រោម ប្រឈមនឹងការបាក់ស្រុត ហើយនិងដើម្បីបំពេញតម្រូវការស្របទៅតាមការរីកចម្រើននៃសេដ្ឋកិច្ចរបស់កម្ពុជា ក្រោយពីគេបានទុកចោលគម្រោងសាងសង់នេះជាយូរឆ្នាំមកហើយ ដើម្បីបង្វិលទឹកប្រាក់ក្នុងការបម្រើសេវាកម្មផ្សេងៗ។
ព្រះមហាក្សត្រខ្មែរព្រះបាទបរមនាថ នរោត្តម សីហមុនី ដែលបានយាងជាអធិបតីក្នុងពិធីសម្ពោធដាក់ឲ្យប្រើប្រាស់អគារទាំងពីរខាងលើនោះ មានព្រះបន្ទូលដូច្នេះ ៖ «ខ្ញុំសូមរដ្ឋាភិបាលបន្តយកចិត្តទុកដាក់អនុវត្តជាចម្បងយុទ្ធសាស្ត្រចតុកោណទី២ ទន្ទឹមនឹងនេះ ត្រូវរៀបចំនីតិវិធីកាន់តែប្រសើរថែមទៀត ដើម្បីបង្កលក្ខណៈជូនសមាជិកសមាជិការាជរដ្ឋាភិបាល បំពេញការងារបម្រើប្រទេសជាតិ និងជូនប្រជាពលរដ្ឋកាន់តែប្រសើរឡើង»។
មានមន្ត្រីជាន់ខ្ពស់របស់រដ្ឋាភិបាល និងប្រធានសភា លោក ហេង សំរិន និងប្រធានព្រឹទ្ធសភា លោក ជា ស៊ីម ក៏បានចូលរួមនៅក្នុងកម្មវិធីនោះដែរ៕