អគ្គនាយកនៃក្រសួងរៀបចំដែនដីនគរូបនីយកម្ម និងសំណង់ លោក លឹម វាន់ បានមានប្រសាសន៍ថា ការរៀបចំសេចក្ដីព្រាងច្បាប់នេះ គឺដើម្បីជួយបង្កើនលើកិច្ចអភិវឌ្ឍ ហើយក៏ដើម្បីការពារនូវផលប្រយោជន៍របស់ប្រជាពលរដ្ឋ និងប្រយោជន៍សាធារណៈផងដែរ។
លោក លឹម វាន់ មានប្រសាសន៍ដូច្នេះថា ៖ «បើយើងអត់មានច្បាប់គឺជាការខាត ហើយអាចមានជនខ្លះឆ្លៀតពេលដែលអត់ទាន់មានច្បាប់ហ្នឹង ធ្វើការបោកប្រាស់។ អ្នកខ្លះគ្រាន់តែលើកប៉ាណូឡើង មានគេចូលមកកក់លុយអីៗ អត់បានធ្វើអីសោះរត់ចោលបាត់។ ឥឡូវយើងទប់ស្កាត់បានមួយចំនួនហើយ»។
ទាក់ទិននឹងបញ្ហានេះដែរ លោក លឹម វាន់ ក៏បានមានប្រសាសន៍ថា ដំណើរការនៃការរៀបចំសេចក្ដីព្រាងច្បាប់នេះ កំពុងស្ថិតនៅក្នុងការពិភាក្សាគ្នានៅឡើយ តែលោកសង្ឃឹមថានឹងអាចធ្វើទៅបាន ៖ «បញ្ហាវាមានជាប់ពាក់ព័ន្ធនឹងផ្លូវច្បាប់ខ្លះ ទាក់ទងនឹងរដ្ឋធម្មនុញ្ញ ទាក់ទងនឹងច្បាប់ភូមិបាល ទាក់ទងនឹងស្អីៗហ្នឹង ប៉ុន្តែយើងបានធ្វើការពិភាក្សាសម្រុះសម្រួលពីរបីដងហើយ ជាមួយក្រសួងយុត្តិធម៌»។
នៅក្នុងឯកសារនៃសេចក្តីព្រាងច្បាប់ ដែលវិទ្យុអាស៊ីសេរី ទទួលបាន ដែលជាសេចក្តីព្រាងទី២ ចុះថ្ងៃទី ២៦ ខែ មីនា ឆ្នាំ២០០៩ បានចែងនូវចំណុចសំខាន់ៗមួយចំនួន ដូចជាមាត្រា៤ បានកំណត់ថា ជនបរទេសអាចមានសិទ្ធិ កម្មសិទ្ធិនៃអគារ សហកម្មសិទ្ធិឯកជន បានន័យថា ជាអគាររួមមានច្រើនបន្ទប់ ចាប់ពីជាន់ទីពីរឡើងទៅ ហើយសិទ្ធិលើសហកម្មសិទ្ធិនោះអាចធ្វើបានតែចំនួនពីរកន្លែងខុសគ្នាតែប៉ុណ្ណោះ នៅទូទាំងប្រទេសកម្ពុជា។
នៅក្នុងមាត្រា៥ នៃឯកសារនៃសេចក្តីព្រាងច្បាប់ដដែលក៏បានកំណត់ផងដែរថា កម្មសិទ្ធិសម្រាប់ជនបរទេសនោះ ក៏មិនឲ្យលើសពី ៤៩ភាគរយ នៃចំនួនចំណែកឯកជនសរុបនៃអគារសហកម្មសិទ្ធិ ឬអគាររួមដែលមានច្រើនបន្ទប់នោះឡើយ។
ចំណុចដ៏សំខាន់មួយទៀតនោះ គឺមាត្រា ៦ ក៏បានកំណត់ថា ជនបរទសមិនអនុញ្ញាតឲ្យមានកម្មសិទ្ធិលើចំណែកឯកជននេះស្ថិតក្នុងចម្ងាយតិចជាង ៣០គីឡូម៉ែត្រ ពីព្រំដែននៃប្រទេសនោះ។
លោក ស៊ឹង ប៊ុណ្ណា ប្រធានសមាគមអ្នកវាយតម្លៃអចលនវត្ថុជាតិកម្ពុជា នាយកក្រុមហ៊ុន អចលនទ្រព្យ និងជាប្រធានក្រុមហ៊ុន ប៊ុណ្ណា រៀលធី គ្រុប បានមានប្រសាសន៍ថា ការបង្កើតច្បាប់នេះ គឺមិនមែនជាការប្លែកអ្វីទេសម្រាប់ប្រទេសនានានៅលើពិភពលោក ដែលបានធ្វើរួចមកហើយនោះ។
លោកបានបញ្ជាក់ថា ច្បាប់នេះវាពិតជាមានសារសំខាន់ និងប្រយោជន៍ច្រើនសម្រាប់ប្រទេស ដែលលោកហាក់ដូចជារកមិនឃើញនូវផលអាក្រក់ណាមួយកើតចេញពីច្បាប់នោះឡើយ ៖ «ការអនុញ្ញាតឲ្យជនបរទេសមានសិទ្ធិកាន់កាប់អគារមិនផ្ទាល់ដី ជាន់ខាងលើហ្នឹង វាជាច្បាប់មួយដែលគេហៅថា ច្បាប់ទាក់ទាញ ឬក៏ច្បាប់លើកទឹកចិត្តដល់អ្នកវិនិយោគជាជនបរទេសឲ្យគាត់ចាប់អារម្មណ៍មកលើប្រទេសយើង។ ហើយចំពោះច្បាប់នេះ វាមិនមែនជាច្បាប់មួយដែលប្លែក ដែលពិភពលោកយើងមិនមានទេ វាជាច្បាប់មួយដែលមានសឹងស្ទើរតែគ្រប់ប្រទេសទៅហើយ។ បានន័យថា ប្រទេសណាក៏គេមានច្បាប់ផ្ដល់សិទ្ធិដល់ជនបរទេសកាន់កាប់អចលនទ្រព្យខាងលើៗហ្នឹងដែរ បានន័យថា ខាងខនដូ ខាងអីនៅតាមជាន់លើៗ គ្រាន់តែប្រទេសដទៃ ប្រទេសខ្លះគេចាប់ផ្ដើមពីជាន់ទី៣ ប្រទេសខ្លះគេចាប់ផ្ដើមពីជាន់ទី៥ ខ្លះជាន់ទី៧»។
លោកបានបន្តថា ក្រោយពេលដែលច្បាប់នេះបង្កើតឡើង នឹងជំរុញឲ្យមានកំណើនសេដ្ឋកិច្ច ជាពិសេសគឺវិស័យសំណង់ ដែលបច្ចុប្បន្នកំពុងស្រុតចុះនោះ ៖ «អ៊ីចឹងឃើញថាច្បាប់នោះក៏ជាការមួយដែលយើងរៀនតាមគេ អនុវត្តតាមគេមកដែរ ប្រមូលផ្សែផ្សំៗដាក់ចូលមកដើម្បីឲ្យចេញជាច្បាប់របស់យើងហ្នឹង។ អ៊ីចឹងច្បាប់ហ្នឹងយើងគិតថាវាជាឱកាសមួយ បើសិនជាច្បាប់ហ្នឹងចេញបានប្រសើរ ដោយសារអី វាចំពេលដែលទីផ្សារអចលទ្រព្យយើងកំពុងតែស្ថិតក្នុងសភាពមួយដែលមិនទាន់ល្អ មិនប្រសើរនៅឡើយ អ៊ីចឹងពេលដែលមានច្បាប់នេះវាអាចជួយជាផ្នែកទីផ្សាររបស់យើងផងដែរ»។
មន្ត្រីមជ្ឈមណ្ឌលអប់រំច្បាប់សម្រាប់សហគមន៍ លោក គិត ទូច បានមានប្រសាសន៍ថា តាមខ្លឹមសារនៃសេចក្តីព្រាងច្បាប់នោះ គឺដូចជាពុំមានការប៉ះពាល់ដល់គោលការណ៍នៃរដ្ឋធម្មនុញ្ញ និងច្បាប់ភូមិបាលនៃប្រទេសកម្ពុជា នោះទេ ៖ «វាមិនមានបញ្ហាទៅលើស្ថានភាពសិទ្ធិ និងបុព្វសិទ្ធិនៅលើដីទេ»។
លោកក៏បានមានប្រសាសន៍បញ្ជាក់ថា ច្បាប់នោះក៏វាស្របនឹងនិន្នាការសកល ទាំងផ្នែកសេដ្ឋកិច្ចនិងសង្គមកិច្ចផងដែរ ៖ «ទស្សនទានធំហ្នឹង គឺផ្សារសេរី តំបន់ភាវូបនីយកម្ម ហើយអគារវាជាមូលដ្ឋាននៃហេដ្ឋារច្ចនាសម្ព័ន្ធរូបវន្ត ដែលវិនិយោគិនហ្នឹងគេត្រូវការបំផុត ហើយផ្ទះរបស់គេ កន្លែងសុវត្ថិភាពបំផុតដែលគេអាចបំពាក់ឧបករណ៍សុវត្ថិភាព ឧបករណ៍សុខុមាលភាពផ្ទាល់ខ្លួនរបស់គេ ហើយនិងប្រព័ន្ធទំនាក់ទំនងជាតិ អន្តរជាតិរបស់គេ គេអាចបំពាក់បាន បើសិនជាទ្រព្យផ្ទាល់ខ្លួនរបស់គេ គេគ្រាន់តែគោរពតាមច្បាប់»។
រីឯលោក យឹម សុវណ្ណ អ្នកតំណាងរាស្រ្តគណបក្សសមរង្ស៊ី ដែលជាគណបក្សប្រឆាំងក្នុងប្រទេស បានមានប្រសាសន៍ថា លោកក៏យល់ស្របថាច្បាប់នោះនឹងមានលក្ខណៈល្អប្រសើរ ដើម្បីឲ្យមានភាពចម្រើនដល់ផ្នែកសេដ្ឋកិច្ច ប៉ុន្តែគេត្រូវតែមានការអនុវត្តច្បាប់នេះឲ្យបានត្រឹមត្រូវ។
លោក យឹម សុវណ្ណ មានប្រសាសន៍ដូច្នេះ ៖ «សេចក្ដីព្រាងច្បាប់ហ្នឹង ខ្ញុំយល់ឃើញថាវាជាការជំរុញឲ្យទីផ្សារអចនលទ្រព្យហ្នឹង វាអាចនឹងកម្រើកឡើងវិញ មានសកម្មភាពឡើងវិញខ្លះ ប៉ុន្តែអ្វីដែលយើងត្រូវប្រុងប្រយ័ត្នហ្នឹង គឺត្រូវតែអនុវត្តច្បាប់អន្តោប្រវេសន៍ឲ្យបានត្រឹមត្រូវ ឲ្យមានប្រសិទ្ធភាព។ ហើយទី២ទៀត យើងត្រូវប្រុងប្រយ័ត្នអំពីរឿងពួកភេរវករ ដែលយើងត្រូវតែត្រួតពិនិត្យមើលអត្តសញ្ញាណជនបរទេស ត្រួតពិនិត្យមើលថាគេមកក្នុងគោលបំណងល្អ ឬគោលបំណងអាក្រក់? មករកស៊ីនៅស្រុកខ្មែរ មកវិនិយោគទុន មកធ្វើជាទេសចរ ឬមួយក៏មកស្នាក់នៅចូលនិវត្តន៍អីហ្នឹង យើងត្រូវពិនិត្យមើល»។
ទោះជាយ៉ាងណាក៏ដោយ លោក ស៊ឹង ប៊ុណ្ណា ប្រធានសមាគមអ្នកវាយតម្លៃអចលនវត្ថុជាតិកម្ពុជា នាយកក្រុមហ៊ុនអចលនទ្រព្យ និងជាប្រធានក្រុមហ៊ុន ប៊ុណ្ណា រៀលធី គ្រុប បានថ្លែងថា ថ្វីត្បិតតែការបង្កើតច្បាប់នោះអាចនឹងជួយដល់កិច្ចអភិវឌ្ឍប្រទេស ជាពិសេសការជួយដល់វិស័យសំណង់ ដែលកំពុងជួបការលំបាកក៏ពិតមែន ប៉ុន្តែមិនមានន័យថាវាអាចនឹងធ្វើឲ្យប្រទេសកម្ពុជា អាចជម្នះបាននូវឥទ្ធិពលនៃវិបត្តិសេដ្ឋកិច្ចពិភពលោក ដែលកំពុងជួបប្រទះនាពេលបច្ចុប្បន្ននេះទាំងស្រុងឡើយ៕