ប្រជាពលរដ្ឋ សិស្សានុសិស្ស និងបញ្ញវន្តខ្មែរភាគច្រើន បានជំទាស់ទៅនឹងការលើកឡើងរបស់អនុរដ្ឋមន្ត្រីក្រសួងការបរទេសសហរដ្ឋអាមេរិក ដែលថាកម្ពុជា និងថៃគួរតែដោះស្រាយបញ្ហាជម្លោះព្រំដែនដោយទ្វេភាគី ។ ពួកគាត់យល់ថា ការគាំទ្ររបស់មន្ត្រីជាន់ខ្ពស់រដ្ឋាភិបាលសហរដ្ឋអាមេរិក ចំពោះការដោះស្រាយជម្លោះទ្វេភាគីនោះ គឺដោយសារតែថៃមានប្រយោជន៍ចំពោះសហរដ្ឋអាមេរិកច្រើនជាងប្រទេសកម្ពុជា ។
គួរជម្រាបថា កាលពីថ្ងៃអង្គារដើមសប្ដាហ៍កន្លងទៅនេះ លោកអនុរដ្ឋមន្ត្រីក្រសួងការបរទេសសហរដ្ឋអាមេរិក John Negroponte បានមានប្រសាសន៍ប្រាប់អ្នកកាសែតថា ជម្លោះព្រំដែនរវាងកម្ពុជា និងថៃ គួរតែត្រូវបានដោះស្រាយដោយសន្តិវិធី និងដោយទ្វេភាគី ៖ "យើងគិតថា នេះគឺជាជម្លោះ និងការខ្វែងគំនិតគ្នា ដែលគួរតែត្រូវដោះស្រាយដោយសន្តិវិធីរវាងប្រទេសកម្ពុជា និងថៃ ។ យើងគិតថាការដោះស្រាយដូច្នេះ ជាមធ្យោបាយដ៏មានប្រសិទ្ធភាពបំផុត ហើយប្រទេសទាំងពីរ គួរតែចៀសវាងការប្រើកម្លាំងទ័ព ពីព្រោះវាអាចធ្វើឲ្យខូចដល់ការរីកចម្រើនផ្នែកអភិវឌ្ឍន៍សេដ្ឋកិច្ចក្នុងតំបន់" ។
សិស្សវិទ្យាល័យនៅទីក្រុងភ្នំពេញម្នាក់ឈ្មោះ ស សម្បត្តិ បានបង្ហាញមតិយោបល់ផ្ទាល់ខ្លួនថា លោកចង់ឲ្យរដ្ឋាភិបាលខ្មែរដាក់ពាក្យបណ្ដឹងពីការឈ្លានពានរបស់សៀមមកលើអធិបតេយ្យភាព និងបូរណភាពទឹកដីខ្មែរ ទៅក្រុមប្រឹក្សាសន្តិសុខអង្គការសហប្រជាជាតិដើម្បីឲ្យជួយដោះស្រាយបន្ទាប់ពីមើលឃើញថា ការចរចាទ្វេភាគីរវាងប្រទេសទាំងពីរចំនួន៣លើកកន្លងមកនេះ មិនបានចេញជាផ្លែផ្កាអ្វីនោះ ។
លោក ស សម្បត្តិ មានប្រសាសន៍ដូច្នេះ ៖ «រាល់ថ្ងៃនេះប្រទេសថៃ គេប្រើល្បិចច្រើនមែនទែន ដើម្បីពន្យារពេលការចរចា ដើម្បីកេងចំណេញនូវទឹកដីរបស់កម្ពុជា ។ ថៃនេះជាយូរណាស់មកហើយ មានគោលបំណងអាក្រក់មកលើកម្ពុជារហូត ឲ្យតែមានបញ្ហាអីដោះស្រាយមិនចេញ គឺតែងតែមានបញ្ហាអីនៅស្រុកវា ដើម្បីផ្អាក ឬក៏ពន្យារពេលនូវការចរចា» ។
ប្រជាពលរដ្ឋម្នាក់រស់នៅខេត្តបាត់ដំបង លោក មាស សម្បត្តិ បានឲ្យដឹងថា ការចរចាទ្វេភាគីជាជម្រើសដ៏ល្អ ដោយសារកម្ពុជានិងថៃ ជាប្រទេសជិតខាងនឹងគ្នា ។ ទោះជាយ៉ាងណា លោកចង់ឲ្យកម្ពុជាស្វែងរកអន្តរាគមន៍ពីអន្តរជាតិ បន្ទាប់ពីមើលឃើញថា ប្រទេសថៃព្យាយាមអូសបន្លាយពេលវេលានៃការចរចានោះ ៖ «បើសិនជាចរចាម្ដងទៀតមិនបាន ទាល់តែប្ដឹងក្រុមអង្គការសហប្រជាជាតិ ឬតុលាការជាន់ខ្ពស់អន្តរជាតិហ្នឹងឯង ទើបអាចដោះស្រាយបាន» ។
ប្រធានអង្គការមូលនិធិទ្រទ្រងអរិយធម៌ខ្មែរ លោក មឿង សុន បានទាត់ចោលការលើកឡើងរបស់មន្ត្រីជាន់ខ្ពស់សហរដ្ឋអាមេរិក ដែលចង់ឲ្យមានការចរចាទ្វេភាគីនោះ ។ លោក មឿង សុន បានមានប្រសាសន៍ថា សហរដ្ឋអាមេរិកមិនមានចេតនាជួយដោះស្រាយបញ្ហាព្រំដែនឲ្យប្រទេសកម្ពុជាឡើយ ដោយសារសហរដ្ឋអាមេរិកមើលឃើញផលប្រយោជន៍ពីប្រទេសថៃ ច្រើនជាងពីប្រទេសកម្ពុជា ។
លោក មឿង សុន បានបន្តទៀតថា មានតែប្រទេសបារាំងតែប៉ុណ្ណោះ ដែលអាចមានសមានចិត្តចង់ជួយដោះស្រាយបញ្ហាជម្លោះព្រំដែនរវាងថៃ និងកម្ពុជាបច្ចុប្បន្ននេះ ៖ «ផលប្រយោជន៍របស់កម្ពុជា ហើយនិងប្រទេសថៃ តើប្រទេសណាដែលឲ្យប្រយោជន៍ឲ្យសហរដ្ឋអាមេរិកច្រើនជាងគេនោះ ? គឺខ្ញុំយល់ថា គឺប្រទេសថៃទេ ដែលអ្នកឲ្យផលប្រយោជន៍ដល់សហរដ្ឋអាមេរិក ហើយក៏ជាប្រទេសមួយដែលធ្លាប់ ក្នុងប្រវត្តិសាស្រ្ដ គឺគេជួយគាំទ្រនយោបាយសហរដ្ឋអាមេរិកតាំងពីមុនយើងមានសង្រ្គាម ៣ទសវត្សរ៍នេះមកទៀតផង» ។
សាស្ត្រាចារ្យខាងផ្នែកប្រវត្តិសាស្ត្រ និងជាអនុប្រធានរាជបណ្ឌិតសភាកម្ពុជា លោក រស ចន្ត្រាបុត្រ បានមានប្រសាសន៍ថា អនុរដ្ឋមន្ត្រីក្រសួងការបរទេសសហរដ្ឋអាមេរិក អាចមិនទាន់យល់ច្បាស់ពីបញ្ហាជម្លោះព្រំដែនរវាងកម្ពុជា និងថៃ ហើយថា ការគាំទ្ររបស់មន្ត្រីសហរដ្ឋអាមេរិក ចំពោះការចរចាទ្វេភាគី ក៏ព្រោះតែសហរដ្ឋអមេរិកមើលឃើញថា ប្រទេសថៃមានផលប្រយោជន៍ចំពោះ សហរដ្ឋអាមេរិកច្រើនជាងប្រទេសកម្ពុជា ។ លោកបានមានប្រសាសន៍ទៀតថា ការដាក់ពាក្យបណ្ដឹងទៅក្រុមប្រឹក្សាសន្តិសុខអង្គការសហប្រជាជាតិ ជាជម្រើសចុងក្រោយ ក្នុងករណីដោះស្រាយទ្វេភាគីត្រូវទទួលបរាជ័យ តែទោះជាយ៉ាងណាលោកមិនមានសង្ឃឹមថា ការចរចាទ្វេភាគីដើម្បីដោះស្រាយបញ្ហាព្រំដែនរវាងប្រទេសទាំងពីរនោះ នឹងទទួលបានជោគជ័យឡើយ ។
លោកសាស្រ្ដាចារ្យ រស ចន្រ្តាបុត្រ មានប្រសាសន៍ដូច្នេះ ៖ «ខ្ញុំឃើញថា អ្វីដែលជាចំណុចមួយនោះឃើញថា កម្ពុជាហ្នឹង ចំពោះភ្នែករបស់សហរដ្ឋអាមេរិក គឺដូចជាមានលក្ខណៈមួយដែលទាបជាងប្រទេសថៃ ពីព្រោះសហរដ្ឋអាមេរិកគេមើលឃើញថា ប្រទេសថៃ បែបមានផលប្រយោជន៍ច្រើនជាងកម្ពុជា ដល់អ៊ីចឹងទៅលក្ខណៈដែលគេនិយាយនេះ គឺថា គ្រាន់តែនិយាយដើម្បីនិយាយ មិនមែននិយាយដើម្បីនឹងជួយរក ហៅថា អ្វីដែលជាសមភាព រវាងទំនាក់ទំនងកម្ពុជា និងសហរដ្ឋអាមេរិកនោះទេ» ។
គួរជម្រាបថា ជម្លោះព្រំដែនកម្ពុជា និងថៃ បានបន្តអូសបន្លាយអស់រយៈពេលជាងពីរខែមកហើយ ហើយនៅពុំទាន់មានដំណោះស្រាយណាមួយបានធ្វើឡើងនៅឡើយទេ ខណៈដែលទាហាននៃប្រទេសទាំងពីរបន្តប្រឈមមុខដាក់គ្នានោះ ។ ទាហានសៀម បានចូលមកកាន់កាប់តំបន់ជិតប្រាសាទព្រះវិហារចាប់តាំងពីពាក់កណ្ដាលខែកក្កដា គឺនៅបន្ទាប់ពីអង្គការយូណេស្កូ បានសម្រេចដាក់ប្រាសាទព្រះវិហារជាបេតិកភណ្ឌពិភពលោករួចមក ។ ប្រទេសថៃបានជំទាស់ការដាក់បញ្ចូលនេះ ដោយលើកឡើងថា តំបន់ប្រាសាទព្រះវិហារ គឺជាតំបន់ជម្លោះមិនទាន់ដោះស្រាយរួច ។
បន្ទាប់ពីបានចូលកាន់កាប់តំបន់ជិតប្រាសាទព្រះវិហាររួចហើយ ទាហានថៃក៏បានចូលមកកាន់កាប់ជាបន្តបន្ទាប់នូវប្រសាទតាមាន់ និងប្រាសាទតាក្របី ដែលស្ថិតនៅក្នុងខេត្តឧត្តរមានជ័យជាប់នឹងព្រំដែនខ្មែរ-ថៃ ។
ក្រោយពីការចូលកាន់កាប់តំបន់ជិតប្រាសាទព្រះវិហារបានជិតមួយសប្ដាហ៍ រដ្ឋាភិបាលកម្ពុជា បានដាក់ពាក្យបណ្ដឹងទៅក្រុមប្រឹក្សាសន្តិសុខអង្គការសហប្រជាជាតិ ដើម្បីសុំកិច្ចអន្តរាគមន៍ចំពោះការឈ្លានពានរបស់សៀមមកលើទឹកដីខ្មែរ ។ ទោះជាយ៉ាងណា រដ្ឋាភិបាលកម្ពុជាបានពន្យាពេលការដាក់ពាក្យបណ្ដឹងទៅអង្គការសហប្រជាជាតិ ហើយចាប់ផ្ដើមចរចាទ្វេភាគីវិញ ។
រហូតមកទល់នឹងពេលនេះ ការចរចាទ្វេភាគីបានប្រព្រឹត្តទៅចំនួនបីលើករួចមកហើយ តែត្រូវគេមើលឃើញថា មិនបានដោះស្រាយបញ្ហាជម្លោះព្រំដែននៃប្រទេសទាំងពីរនោះឡើយ ។
នាយករដ្ឋមន្ត្រីខ្មែរ លោក ហ៊ុន សែន បានមានប្រសាសន៍កាលពីថ្ងៃទី ១៧ កញ្ញា អំពាវនាវឲ្យរដ្ឋាភិបាលថៃ ដែលដឹកនាំដោយនាយករដ្ឋមន្ត្រីថ្មី រៀបចំគណៈប្រតិភូមកចរចាជាមួយកម្ពុជាជាថ្មីម្ដងទៀត ។
លោកនាយករដ្ឋមន្ត្រី ហ៊ុន សែន បានមានប្រសាសន៍កាលពីថ្ងៃច័ន្ទដើមសប្ដាហ៍កន្លងទៅនេះថា រដ្ឋាភិបាលខ្មែរនឹងដាក់ពាក្យបណ្ដឹងទៅក្រុមប្រឹក្សាសន្តិសុខអង្គការសហប្រជាជាតិ បើសិនជាមានការផ្ទុះអាវុធណាមួយកើតឡើតនោះ ។
អនុប្រធានរាជបណ្ឌិតសភា លោក រស ចន្ត្រាបុត្រ បានឲ្យដឹងថា ការឈ្លានពានរបស់សៀមមកលើទឹកដីខ្មែរធ្វើឲ្យខ្មែរខាតបង់ជាច្រើន ទាក់ទងនឹងទឹកដី និងខាតបង់ពេលវេលាអភិវឌ្ឍប្រទេសទៀតផង ៖ «ដូច្នេះកាលណាគេមកឈ្លានពានចូលមកទឹកដីកម្ពុជាយើងហ្នឹង យើងឃើញថា ទោះបីជាគេដកថយក៏ដោយ បើគេនៅតែមួយម៉ែត្រ ក៏គេចំណេញយើងមួយម៉ែត្រ បើនៅមួយចំអាម ក៏នៅតែចំណេញមួយចំអាម អ៊ីចឹងជាបញ្ហាមួយដែលយើងខាតបង់ ។ ហើយខាតបង់ទាំងអស់សព្វថ្ងៃនេះ ដែលយើងខាតទាំងពីការដែលយើងរៀបចំកងទ័ព ទាំងពីយើងរៀបចំការអភិវឌ្ឍទឹកដីនគរកម្ពុជាយើង ក៏យើងមានការខាតបង់ដែរ គឺយើងរវល់តែនឹងទប់ទល់ជាមួយនឹងការឈ្លានពានរបស់ថៃ ហើយដែលរឿងថៃនេះ គឺថា គាត់យកកម្ពុជាយើង យកទៅតភ្ជាប់រឿងនយោបាយក្នុងប្រទេសរបស់គាត់ ។ អ៊ីចឹងយើងឃើញថា កម្ពុជានេះ សព្វថ្ងៃនេះ យើងទៅជាចំណាប់ខ្មាំងរបស់ថៃ» ។
លោក រស ចន្ត្រាបុត្រ បានឲ្យដឹងថា ប្រទេសថៃ នៅតែមានមហិច្ឆិតាចង់បានទឹកដីខ្មែររហូត ៕