អ្នកគ្រប់គ្រងនៃក្លឹបកម្សាន្តមួយឈ្មោះ Orange នៅក្បែរព្រះបរមរាជវាំងនៅក្នុងទីក្រុងភ្នំពេញដែលរងការចោទប្រកាន់ថា ជាទីកន្លែងមានរាំសិចឬរាំស្រាតរបស់ក្រុមយុវជនវ័យក្មេងបានប្រតិកម្មបំភ្លឺថា ពិតជាមានសកម្មភាពកើតមានដូច្នោះមែន កាលពីយប់ថៃ្ងពុធកន្លងទៅថ្មីៗនេះ ប៉ុន្តែលោកបានសន្យាថានឹងទប់ស្កាត់មិនឲ្យមានការរាំសិចឬរាំស្រាតកើតមាននៅទីកន្លែងរបស់លោកទៀតទ្បើយ។
លោក ម៉ែន ផានី ជាអ្នកគ្រប់គ្រងក្លឹបកម្សាន្តឈ្មោះ Orangeនោះ បានមានប្រសាសន៍បំភ្លឺប្រាប់វិទ្យុអាស៊ីសេរីថា ៖ «បុគ្គលិកបានប្រាប់ខ្ញុំថា រឿងហេតុការណ៍ហ្នឹងបានកើតពិតមែន។ ដល់ពេលខ្ញុំសួរបន្តទៅទៀតទៅ គឺក្មេងម្នាក់ដែលរាំដូចដែលប្អូននោះបានឃើញហ្នឹងគឺមិនមែនជាបុគ្គលិករបស់ខាងខ្ញុំបាទហ្នឹងទេ»។
សុខ សេរី ៖ តើលោកគួរអនុញ្ញាតឲ្យមានបញ្ហាកើតឡើងទៀតឬក៏លោកមានការរារាំង?
ម៉ែន ផានី ៖ អូ អត់ទេ។ ដូចជ្រាបស្រាប់ហើយខាងខ្ញុំនេះសុំរកស៊ីឲ្យបានតាមសម្រួល ទៅប្រកបរបរអីអ៊ីចឹងលោក។
ប្រតិកម្មបំភ្លឺរបស់តំណាងក្លឹបកម្សាន្តរាត្រីខាងលើនេះបានធ្វើទ្បើងក្រោយពីមានសាក្សីម្នាក់ដែលបានចូលរួមក្នុងពិធីសប្បាយនៅក្នុងក្លឹបនោះបានទម្លាយរឿងអាស្រូវប្រាប់វិទ្យុអាស៊ីសេរីកាលពីថៃ្ងព្រហស្បតិ៍កន្លងទៅថ្មីៗនេះថា មានយុវជនវ័យកេ្មងៗស្រីប្រុសមួយចំនួនបានចូលរួមសប្បាយនៅទីនោះ ហើយបានរាំសិចឬរាំស្រាតនៅពេលយប់រំលងអាធ្រាត្រវេលាម៉ោង១យប់ដើម្បីទទួលស្វាគមន៍បុណ្យណូអែលកំពុងតែឈានមកដល់នោះ។
ស្នងការនគរបាលក្រុងភ្នំពេញ លោក ទូច ណារ៉ុថ បានមានប្រសាសន៍ឲ្យដឹងកាលពីពេលថ្មីៗនេះថា លោកបានបញ្ជាឲ្យមានការដាក់ពង្រាយកម្លាំងនគរបាលបង្កប់នៅតាមក្លឹបកម្សាន្តរាត្រីឬរង្គសាលនានានៅក្នុងទីក្រុងភ្នំពេញដើម្បីតាមដាននិងទប់ស្កាត់នូវអំពើអនាចារនិងអំពើសញ្ចារកម្មការជួញដូរផ្លូវភេទនៅទីនោះ ហើយលោកបានព្រមានថានឹងបិទ ហើយចាប់ខ្លួនម្ចាស់ក្លឹបកម្សាន្តរាត្រីនោះបញ្ជូនទៅតុលាការនៅពេលណាក្រុមនគរបាលរកឃើញភស្តុតាងពិតមែន។
គ្មានប្រភពជាផ្លូវការណាមួយបញ្ជាក់ថា តើមានក្លឹបកម្សាន្តរាត្រីចំនួនសរុបប៉ុន្មានទេនៅក្នុងទីក្រុងភ្នំពេញ ប៉ុន្តែប្រភពពីតំណាងរាស្រ្តខាងគណបក្សសមរង្ស៊ី គឺលោក សុន ឆ័យ នៅមណ្ឌលភ្នំពេញ បានប៉ាន់ស្មានថា មានចំនួនមិនតិចជាង១០កន្លែងទេនៅក្នុងទីក្រុងភ្នំពេញនោះដែលមានការពាក់ព័ន្ធនឹងការប្រើប្រាស់គ្រឿងញៀននិងអំពើអនាចារ។
សូមរំឭកថា កាលពីប៉ុន្មានខែមុននេះនៅក្នុងឆ្នាំ២០០៨នេះ សមត្ថកិច្ចក្រុងភ្នំពេញបានធ្វើការបង្រ្កាបនិងបិទក្លឹបកម្សាន្តមួយឈ្មោះ Mikado នៅក្នុងទីក្រុងភ្នំពេញ ក្រោយពីបានរកឃើញថាជាទីកន្លែងរាំសិចឬរាំស្រាតរបស់ក្រុមនារីកេ្មងៗនៅទីនោះ ហើយមេការមួយចំនួនត្រូវបានសមត្ថកិច្ចចាប់ខ្លួនប្រគល់ឲ្យតុលាការក្រុងភ្នំពេញដើម្បីចោទប្រកាន់អំពីបទពាក់ព័ន្ធនឹងអំពើអនាចារនិងអំពើសញ្ចារកម្មជួញដូរផ្លូវភេទនៅទីនោះ៕