មន្រ្តីមជ្ឈមណ្ឌលអប់រំច្បាប់សម្រាប់សហគមន៍ និងជាអ្នកសម្របសម្រួលរៀបចំវេទិកាមហាជន បានអោយដឹងថា មានក្រុមហ៊ុនអ្នកបញ្ជាទិញចំនួន២ គឺក្រុមហ៊ុន ពូម៉ា (PUMA) និងអាដឌីដាស (ADDIDAS) គ្រោងនឹងចូលរួមវេទិកាមហាជន ដើម្បីស្តាប់ពីការលំបាករបស់កម្មករវិស័យកាត់ដេរនៅកម្ពុជា ជាលើកដំបូងបង្អស់។
ការចូលរួមរបស់ក្រុមហ៊ុនអ្នកបញ្ជាទិញនេះ គឺមានសារសំខាន់ដើម្បីជំរុញអោយបញ្ហារបស់កម្មករត្រូវដោះស្រាយ។
លោក មឿន តុលា ជាប្រធានកម្មវិធីសិទ្ធិការងាររបស់មជ្ឈមណ្ឌលអប់រំច្បាប់សម្រាប់សហគមន៍។ លោកមានប្រសាសន៍នៅថ្ងៃព្រហស្បតិ៍ ទី០២ ខែកម្ភៈ នេះថា ក្នុងចំណោមក្រុមហ៊ុនចំនួន៤ ដែលបានអញ្ជើញអោយចូលរួមក្នុងវេទិកានេះ មានក្រុមហ៊ុនអ្នកបញ្ជាទិញចំនួន២ បានផ្តល់ចំលើយថា ពួកគេនឹងចូលរួមស្តាប់ពីការលំបាកទាំងឡាយដែលកម្មករកម្ពុជាកំពុងជួបប្រទះ។
លោក មឿន តុលា៖ «ហ្គេប (GAP) គាត់បញ្ជាក់ថា គាត់អត់បានចូលរួម ក៏ប៉ុន្តែយើងកំពុងតែជំរុញអោយគាត់ចូលរួម។ ហ្គេប គឺជាក្រុមហ៊ុនមួយដែលធ្លាប់មានឈ្មោះថា ទទួលខុសត្រូវក្នុងការគោរពច្បាប់ គោរពសិទ្ធិកម្មករ ។ល។ និង ។ល។ ទី១ ។ ទី២ យើងអញ្ជើញក្រុមហ៊ុន H&M។ H&M ក៏មិនទាន់ដូរជំហរថា ខ្លួននឹងត្រឡប់មកចូលរួមក្នុងវេទិកាហ្នឹងដែរ ដោយឡែកក្រុមហ៊ុនចំនួនពីរទៀត គឺក្រុមហ៊ុនអាដឌីដាស និងក្រុមហ៊ុនពូម៉ា បានឆ្លើយមកហើយថា គាត់នឹងចូលរួម»។
វេទិកាមហាជននេះ ត្រូវបានរៀបចំដោយអង្គការមួយឈ្មោះថា បណ្តាញប្រាក់ខែទាបបំផុតនៅអាស៊ី សហការជាមួយមជ្ឈមណ្ឌលអប់រំច្បាប់សម្រាប់សហគមន៍។ វេទិកានេះគ្រោងនឹងរៀបចំឡើងនៅថ្ងៃអាទិត្យ ទី៥ ខែកុម្ភៈ នេះ នៅមជ្ឈមណ្ឌលសហប្រតិបត្តិការកម្ពុជាជប៉ុន (CJCC)។
លោក មឿន តុលា ពន្យល់ថា វេទិកាមហាជននេះ គឺដូចគ្នាទៅនឹងសវនាការជាសាធារណៈមួយ ជាការផ្តល់ឱកាសអោយកម្មករបានចូលរួមលើកឡើងពីបញ្ហាដែលពួកគេជួបប្រទះ នៅខណៈពេលដែលកម្ពុជា មិនទាន់មានតុលាការការងារ។ មានចៅក្រមចំនួន ៦រូបនឹងចូលរួម ភាគច្រើនជាអ្នកច្បាប់ដែលមានបទពិសោធន៍នៅក្នុងវិស័យការងារ។ ពួកគេនឹងចេញសេចក្តីសម្រេចពីប្រាក់ឈ្នួលទាបបំផុត ដែលកម្មករក្នុងវិស័យកាត់ដេរនៅកម្ពុជា គួរទទួលបាន ដើម្បីរស់នៅសមរម្យ។
លោក មឿន តុលា បញ្ជាក់ថា សេចក្តីសម្រេចរបស់ចៅក្រមអាចនឹងត្រូវប្រើប្រាស់ជាមូលដ្ឋានសម្រាប់អោយសហជីពកម្មករ និងអង្គការបណ្តាញប្រាក់ខែទាបបំផុតនៅអាស៊ី ចរចារជាមួយភាគីថៅកែរោងចក្រ និងក្រុមហ៊ុនបញ្ជាទិញ ក្នុងការដំឡើងប្រាក់ខែដល់កម្មករ។
លោក មឿន តុលា៖ «ត្រូវរកចំលើយអោយឃើញថា តើប្រាក់ឈ្នួលពេលបច្ចុប្បន្ន ៦១ បូកប្រាក់ឧបត្ថម្ភថ្លៃសុខភាព ៥ដុល្លារ និងប្រាក់រង្វាន់ទៀងទាត់ ៧ដុល្លារអី ។ល។ និង។ល។ ហ្នឹងគ្រប់គ្រាន់ ឬអត់? បើអត់គ្រប់ត្រូវប៉ុន្មាន? ទាំងហ្នឹងត្រូវដាក់នៅក្នុងសេចក្តីសម្រេច verdict paper។ ការសម្រេចរបស់ចៅក្រមហ្នឹង គឺថា អាចយកទៅប្រើក្នុងចរចារជាអនុសញ្ញារួមជាមួយនិយោជក ឬជាមួយសមាគមនិយោជកនៅក្នុងប្រទេសហ្នឹងតែម្តង។ ទី២ ផ្នែកសម្ព័ន្ធប្រាក់ឈ្នួលទាបបំផុតនៅអាស៊ី យើងមានក្រុមចរចានឹងយកសេចក្តីសម្រេចហ្នឹងទៅចរចាជាមួយប្រេន (ក្រុមហ៊ុនបញ្ជាទិញ)»។
ប្រធានមជ្ឈមណ្ឌលសិក្សាការអភិវឌ្ឍន៍នៅកម្ពុជា លោក កង ច័ន្ទតារារ័ត្ន ដែលបានសិក្សាស្រាវជ្រាវពីប្រាក់ខែកម្មករក្នុងវិស័យកាត់ដេរនៅកម្ពុជា ចាប់តាំងពីឆ្នាំ២០០៩ បានអោយដឹងថា ប្រសិនបើប្រៀបធៀបជាមួយម្លៃទំនិញលើទីផ្សារ កម្មករកម្ពុជាត្រូវមានប្រាក់ឈ្នួលទាបបំផុត ៧៩,៣៦ដុល្លារក្នុងមួយខែ ហើយដើម្បីរស់នៅសមរម្យក្នុងមួយខែពួកគេត្រូវទទួលបានជាង ៩៩ដុល្លារក្នុង។
លោក កង ច័ន្ទតារារ័ត្ន៖ «ប្រាក់ឈ្នួលទាបបំផុត គឺយើងចង់សំដៅទៅលើប្រាក់ដែលគាត់អាចចិញ្ចឹមខ្លួនឯងរស់បាន និងត្រូវមានលុយកាក់ទាបបំផុតដែរ សម្រាប់ផ្គត់ផ្គង់អ្នកដែលគាត់ត្រូវទទួលបន្ទុក។ ក្នុងឆ្នាំ២០០៩ គាត់ត្រូវទទួលបាន ៧២ដុល្លារក្នុងមួយខែ ដល់ឆ្នាំ២០១១ នេះ អ្វីដែលគាត់ត្រូវទទួលបានលេខហ្នឹងវាឡើងដល់ ៧៩,៣៦ដុល្លារក្នុងមួយខែ ហើយប្រាក់ឈ្នួលសមរម្យ គឺប្រាក់ដែលអាចចិញ្ចឹមខ្លួនឯង និងអ្នកក្នុងបន្ទុកបាន និងសល់ខ្លះសម្រាប់អនាគតគាត់។ ប្រាក់ឈ្នួលសមរម្យដែលយើងគិតមកដល់ឆ្នាំ២០១១ នេះ សម្រួលនឹងការឡើងថ្លៃទំនិញវាត្រូវគាត់ទទួលបាន ៩៩,២២ដុល្លារ»។
ក្រុមអ្នករៀបចំនៅវេទិកាបានរំពឹងទុកថា នៅក្រោយវេទិកានៅចុងសប្តាហ៍នេះ គ្រប់ភាគីពាក់ព័ន្ធនឹងទទួលបានព័ត៌មានគ្រប់គ្រាន់ពីស្ថានភាពរបស់នៅរបស់កម្មករក្នុងវិស័យកាត់ដេរ និងផ្ដល់ដំណោះស្រាយសមរម្យចំពោះការទាមទារដំឡើងប្រាក់ឈ្នួលរបស់ពួកគេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។