សក្ខីកម្មបង្ហាញការផ្សះផ្សាបានធ្វើកាលពីថ្ងៃសៅរ៍នៅស្របពេលនឹងកងកម្លាំងទាហានខ្មែរខ្លះនៅតែបារម្ភមិនទាន់ជឿជាក់ដោយសារតែគេឃើញថា មានទាហានថៃថ្មីៗបានបញ្ជូនមកខ្សែត្រៀមជួរមុខជាមួយការត្រៀមលក្ខណៈប្រយុទ្ធនោះថែមទៀតផង។
លោក សាវយុត ពីតំបន់ព្រះវិហារធ្វើសេចក្តីរាយការណ៍ជុំវិញព្រឹត្តិការណ៍កើតឡើងចុងក្រោយកាលពីថ្ងៃសៅរ៍កន្លងមកនេះ ៖
សាវយុត ៖ កាលពីថៃ្ងសៅរ៍កន្លងមកនេះយើងឃើញថា ដោយសារតែកងទាហានទាំងអស់ ទាំងខ្មែរទាំងថៃដែលទើបតែមានការប៉ះប្រយុទ្ធគ្នាហើយបណ្ដាលឲ្យស្លាប់និងរងរបួសទាំងសងខាង មានការមើលមិនចំមុខគ្នា មិនទុកចិត្តគ្នានោះ គឺមេបញ្ជាការជាន់ខ្ពស់របស់កងទ័ពនៅក្នុងសមរភូមិទាំងសងខាងដែលខាងកម្ពុជាដឹកនាំដោយលោកឧត្ដមសេនីយ៍ទោ ស្រី ឌឹក មានលោក ជា កែវ ហើយនិងមេបញ្ជាការរបស់តំបន់ប្រតិបត្តិការសឹកខេត្តព្រះវិហារ លោក សំ បុប្ផារ័ត្ន បានជួបប្រជុំជាមួយនឹងកងពលទី៦របស់ស៊ូរៈនារីថៃដែលមានមេបញ្ជាការរងកងពល លោក ឆៃយ៉ាន់ ហ៊ើយសុងនឿន ហើយនិងមានមេបញ្ជាការជាច្រើនរូបទៀតបានមកជួបជុំគ្នា ដោយព្យាយាមផ្សះផ្សាហើយសន្យាថា ធ្វើយ៉ាងណាធ្វើការទប់ស្កាត់មិនឲ្យមានការផ្ទុះអាវុធសាជាថ្មីម្ដងទៀត ហើយឲ្យមេទាហានទាំងអស់ហ្នឹងដែលនៅក្នុងខ្សែត្រៀមជួរមុខបានមកចាប់ដៃគ្នានិងញញឹមដាក់គ្នា ហើយសន្យាថានឹងស្និទ្ធស្នាលជាមួយគ្នាឡើងវិញដើម្បីផ្សះផ្សាការមើលមុខគ្នាមិនចំនោះ។
ម៉ាយ៉ារិទ្ធិ ៖ តើនៅវេលាថ្ងៃសៅរ៍កន្លងមកនេះដែរ តើលោកមានសង្កេតឃើញថាមានចលនាទ័ពអ្វីបានបន្ថែមទៀតដែរឬទេ?
សាវយុត ៖ តាមការសង្កេតតាំងពីល្ងាចថ្ងៃទី១៧ ខែតុលា មានន័យថាតាំងពីយប់ថ្ងៃសុក្រ គឺកងទាហានថៃបានផ្លាស់ប្ដូរមកថ្មីៗ គឺមានកងទាហានឈុតខ្មៅបានបញ្ជូនមកកាន់ខ្សែត្រៀមជួរមុខជំនួសឲ្យកងទាហានចាស់ដែលបានប៉ះប្រយុទ្ធគ្នាហើយមានការចាកចេញទៅ។ ហើយកងទ័ពថៃទាំងប៉ារ៉ាទាំងទាហានឈុតខ្មៅត្រូវបានគេបំពាក់ដោយអាវក្រោះការពារគ្រាប់ ហើយនិងមានការជីកលេណដ្ឋានត្រៀមប្រយុទ្ធបន្តទៅទៀតរហូតដល់ព្រឹកថ្ងៃសៅរ៍នេះ។
ហើយខាងកងទ័ពខ្មែរក៏មានការត្រៀមខ្លួនជានិច្ចដែរដោយសារគេមិនទុកចិត្តទេ ពីព្រោះកន្លងមកខាងទ័ពថៃច្រើនតែចែកចំណីមកឲ្យខាងកងទ័ពខ្មែរហូប ហើយថាបងប្អួនៗ ប៉ុន្តែផ្ទុយទៅវិញការផ្ទុះអាវុធនោះគឺបណ្ដាលមកពីកងទ័ពថៃមុន។
ម៉ាយ៉ារិទ្ធិ ៖ តើមានការពិភាក្សាថ្មីណាទៀតដែរឬទេជុំវិញដែលថៃចោទថាមានការដាក់មីនថ្មីៗនៅឯតំបន់វាយប្រហារគ្នានោះ?
សាវយុត ៖ កាលពីព្រឹកមិញយើងឃើញមេបញ្ជាការជាន់ខ្ពស់នៅក្នុងសមរភូមិថៃខ្មែរបានជួបជជែកគ្នា ប៉ុន្តែគេមិនបាននិយាយអំពីមានការចោទប្រកាន់ថា ទាហានខ្មែរបានដាក់មីនថ្មីៗនៅកន្លែងដែលប្រឈមមុខគ្នាធ្វើឲ្យទាហានថៃរងរបួសនោះទេ។ ក៏ប៉ុន្តែផ្ទុយទៅវិញតាមការជជែកគ្នាហ្នឹងបានឲ្យដឹងថា មេបញ្ជាការទាហានខ្មែរនិងថៃដែលនៅតំបន់ប្រឈមមុខគ្នាទាំងអម្បាលម៉ានមានគម្រោងនឹងជួបប្រជុំគ្នានៅថ្ងៃស្អែកជាបន្តទៅទៀត ដោយមានគម្រោងកោះហៅមេទ័ពខ្មែរនៅតំបន់ភ្នំទ្រព្យ ព្រលានឥន្ទ្រី និងមេទ័ពថៃនៅតំបន់ព្រលានឥន្ទ្រីនោះមកជួបជាមួយគ្នា ហើយមកជជែកមកពិភាក្សាគ្នាដើម្បីណែនាំឲ្យស្គាល់គ្នា រួមនឹងការគ្រោងកោះហៅមេទ័ពថៃនៅតំបន់ច្រកតាថាវ ហើយនិងមេទ័ពខ្មែរមកជួបជុំគ្នាដើម្បីពិសាបាយរួមគ្នាសាមគ្គី ហើយផ្សះផ្សាទំនាស់ដែលបានកើតឡើងកាលពីមុនផង។
តាមខ្ញុំសាកសួរទៅទាហានខ្មែរពីបញ្ហាថា មានការចោទប្រកាន់ពីទាហានថៃថាទាហានខ្មែរដាក់មីននោះ គាត់មិនបានយកចិត្តទុកដាក់ទេ ដោយគាត់តែងនិយាយថា ធម្មតាទាហានថៃតែងតែនិយាយខ្វះការពិតទាំងអស់ ហើយមិនមានការទទួលខុសត្រូវ។ ប៉ុន្តែគាត់សួរថាតើហេតុផលយ៉ាងណាដែលទាហានថៃអះអាងថាមីននោះគឺជាមីនថ្មី។ គេមិនជឿថាមីនដែលថៃយកនោះគឺជាមីនដែលយកចេញពីសមរភូមិទេ អាចទំនងជាយកចេញពីកន្លែងរបស់ខ្លួនពីកងយោធារបស់ខ្លួនទើបអះអាងថាយ៉ាងដូច្នោះ៕