ព្រះ​រាជ​បុត្រី​សម្ដេច​ឪ​យល់​ព្រម​ធ្វើ​ជា​ប្រធាន​បក្ស​ហ៊្វុនស៊ិនប៉ិច

ព្រះ​អង្គ​ម្ចាស់ក្សត្រី នរោត្តម អរុណរស្មី ដែល​ជា​ព្រះ​រាជ​បុត្រី​របស់​សម្ដេច​ឪ បាន​យល់​ព្រម​យាង​មក​គង់​ធ្វើ​ជា​ប្រធាន​គណបក្ស​ហ៊្វុនស៊ិនប៉ិច ហើយ ដូច្នេះ​ការងារ​បន្ត​នៅ​សល់​តែ​ការ​រៀបចំ​ធ្វើ​សមាជ​ដើម្បី​បោះ​ឆ្នោត​តែងតាំង​ព្រះអង្គម្ចាស់ក្សត្រី​តែប៉ុណ្ណោះ។
ដោយ កែវ និមល
2013.02.13

លោក ញឹក ប៊ុនឆៃ ប្រធាន​ប្រតិបត្តិ​គណបក្ស​ហ៊្វុនស៊ិនប៉ិច មាន​ប្រសាសន៍​បញ្ជាក់​នៅ​ថ្ងៃ​ទី​១៣ កុម្ភៈ ថា គណៈ​នាយក​របស់​គណបក្ស​ហ៊្វុនស៊ិនប៉ិច បាន​ចុះ​ហត្ថលេខា​ជា​ឯកច្ឆន្ទ​លើ​លិខិត​សុំ​យាង​ព្រះអង្គម្ចាស់ក្សត្រី នរោត្តម អរុណរស្មី មក​ធ្វើ​ជា​ប្រធាន​គណបក្ស​ហ៊្វុនស៊ិនប៉ិច ហើយ​ឥឡូវ​នេះ​ការ​ស្នើ​សុំ​នោះ​បាន​ទទួល​លទ្ធផល​ហើយ។

លោក ញឹក ប៊ុនឆៃ បាន​ឲ្យ​ដឹង​បន្ថែម​ថា លិខិត​ស្នើ​សុំ​យាង​នោះ បាន​ផ្ញើ​ជា​ផ្លូវ​ការ​ថ្វាយ​ម្ចាស់ក្សត្រី​កាល​ពី​ថ្ងៃ​ច័ន្ទ ទី​១១ កុម្ភៈ កន្លង​ទៅ ហើយ​ព្រះអង្គ​ម្ចាស់ក្សត្រី នរោត្តម អរុណរស្មី ជា​ព្រះ​រាជបុត្រី​របស់​អតីត​ព្រះមហាក្សត្រ នរោត្តម សីហនុ បាន​ឆ្លើយ​យល់​ព្រម​យាង​មក​ចូល​រួម​ធ្វើ​ជា​ប្រធាន​គណបក្ស​ហ៊្វុនស៊ិនប៉ិច។

លោក ញឹក ប៊ុនឆៃ៖ «លិខិត​របស់​គណៈកម្មាធិការ​នាយក​អចិន្ត្រៃយ៍ បាន​ចុះ​ហត្ថលេខា​ទាំង​អស់​គ្នា ដើម្បី​សុំ​យាង​លោក​នោះ បាន​ថ្វាយ​លោក ៣​ថ្ងៃ​ហើយ ហើយ​ដែល​តាម​ដឹង​មក​ថា លោក​សព្វព្រះទ័យ​មក​ហើយ អ៊ីចឹង​នៅ​សល់​តែ​នីតិវិធី​ក្នុង​ការ​ធ្វើ​សមាជ»

ចំពោះ​បែបបទ​ដើម្បី​យាង​ព្រះអង្គម្ចាស់ក្សត្រី​មក​គង់​ជា​ប្រធាន​គណបក្ស​ហ៊្វុនស៊ិនប៉ិច នោះ លោក ញឹក ប៊ុនឆៃ បាន​ពន្យល់​ថា គណបក្ស​ហ៊្វុនស៊ិនប៉ិច នឹង​រៀបចំ​សមាជ​នៅ​ថ្ងៃ​ទី​២១ ខែ​មីនា ខាង​មុខ ហើយ​នៅ​ក្នុង​ពិធី​សមាជ​នោះ គណៈ​នាយក​នឹង​បោះ​ឆ្នោត​តែងតាំង​ព្រះអង្គម្ចាស់ក្សត្រី​ជា​ប្រធាន​គណបក្ស​ហ៊្វុនស៊ិនប៉ិច តែម្តង។

នៅ​ក្នុង​ការ​រៀបចំ​រចនាសម្ព័ន្ធ ក្បាលម៉ាស៊ីន​គណបក្ស​ហ៊្វុនស៊ិនប៉ិច ឡើង​វិញ​នេះ លោក ញឹក ប៊ុនឆៃ បាន​ឲ្យ​ដឹង​ថា មាន​ការ​ដោះដូរ និង​រៀប​ឋានានុក្រម ដោយ​មាន​អ្នក​ដឹកនាំ​ខ្ពស់​បំផុត គឺ​ប្រធាន បន្ទាប់​មក​មាន​អគ្គលេខាធិការ​គណបក្ស ហើយ​លោក ញឹក ប៊ុនឆៃ នឹង​ឈរ​ឈ្មោះ​ជា​បេក្ខជន​អគ្គលេខាធិការ​គណបក្ស។

លោក ញឹក ប៊ុនឆៃ៖ «បាន​ជជែក​គ្នា​ហើយ បើ​តាម​ទៅ​អ្វី​ដែល​បាន​ឯកភាព​គ្នា ជំហាន​ដំបូង​ប្រហែល​ជា​មាន​តែ​ប្រធាន អគ្គលេខា អគ្គ​រង​អី​សិន ព្រោះ​យើង​មិន​ចង់​ឲ្យ​មាន​អី​សំពោង​សំពាយ​អី​ច្រើន​ពេក»

លោក ញឹក ប៊ុនឆៃ ធ្លាប់​បាន​និយាយ​ឲ្យ​ដឹង​ថា គោល​ដៅ​សំខាន់​ក្នុង​ការ​រៀបចំ​គណបក្ស​ហ៊្វុនស៊ិនប៉ិច ឡើង​វិញ​នេះ គឺ​ដើម្បី​ឈាន​ទៅ​រក​ជ័យជំនះ​ក្នុង​ការ​បោះ​ឆ្នោត​រើស​សមាជិក​សភា​អាណត្តិ​ថ្មី ដែល​រៀប​ចំ​ធ្វើ​នៅ​ថ្ងៃ​ទី​២៨ ខែ​កក្កដា ខាង​មុខ។

គណបក្ស​ហ៊្វុនស៊ិនប៉ិច ធ្លាប់​បាន​ទទួល​ការ​គាំទ្រ​ជា​ច្រើន​កាល​ពី​ឆ្នាំ​១៩៩៣ ដោយ​បាន​ទទួល ៥៨​អាសនៈ ក្នុង​ចំណោម​កៅអី​សភា ១២០​អាសនៈ ដែល​កាល​នោះ​មាន​សម្តេច​ក្រុម​ព្រះ នរោត្តម រណឫទ្ធិ ជា​ប្រធាន។ តែ​ក្រោយ​មក ដោយសារ​មាន​ទំនាស់​ផ្ទៃក្នុង​ធ្វើ​ឲ្យ​គណបក្ស​មាន​ការ​ចុះ​ខ្សោយ  រហូត​ដល់​បែក​ចេញ​ជា​ច្រើន​ក្រុម និង​ជា​ច្រើន​គណបក្ស។ បច្ចុប្បន្ន​គណបក្ស​ហ៊្វុនស៊ិនប៉ិច មាន​អាសនៈ​ចំនួន ២​ប៉ុណ្ណោះ នៅ​ក្នុង​ចំណោម ១២៣​អាសនៈ ក្នុង​រដ្ឋ​សភា។

លោក​បណ្ឌិត ឡៅ ម៉ុងហៃ អ្នក​វិភាគ​ឯករាជ្យ និង​ជា​អ្នក​តាម​ដាន​នយោបាយ​កម្ពុជា ធ្លាប់​បាន​ហៅ​ការ​រៀបចំ​យាង​ព្រះអង្គ​ម្ចាស់ក្សត្រី នរោត្តម អរុណរស្មី មក​ធ្វើ​ជា​ប្រធាន​គណបក្ស​ហ៊្វុនស៊ិនប៉ិច ឡើង​វិញ​នេះ ថា​ជា​ការ​ទាក់ទាញ​ឲ្យ​មាន​ការ​បោះ​ឆ្នោត​គាំទ្រ​ពី​ប្រជាពលរដ្ឋ​ដែល​និយម​គណបក្ស​ដែល​មាន​ព្រះរាជវង្សានុវង្ស​ជា​អ្នក​ដឹកនាំ និង​ជា​ការ​ប្រើ​ឥទ្ធិពល​របស់​អតីត​ព្រះមហាក្សត្រ នរោត្តម សីហនុ ផង។

លោក ឡៅ ម៉ុងហៃ៖ «ខ្ញុំ​ថា​ហ៊្វុនស៊ិនប៉ិច ត្រូវ​ការ​មេដឹកនាំ​មួយ​ដែល​គេ​ស្គាល់​ច្រើន ហើយ​មាន​ទំនាក់ទំនង​ជាមួយ​ព្រះ​មហា​វីរក្សត្រ ហើយ​នេះ​ជា​បុត្រី​របស់​លោក ហើយ​ប្រហែល​ជា​ដូច​កាល​ជំនាន់​ឆ្នាំ​១៩៩៣ គឺ​យក​ឥទ្ធិពល​របស់​ព្រះ​មហា​វីរក្សត្រ​ទៅ​ប្រើប្រាស់ ដើម្បី​ទាក់ទាញ​ការ​គាំទ្រ​ពី​ប្រជាពលរដ្ឋ»

ចលនា​តស៊ូ​ហ៊្វុនស៊ិនប៉ិច បាន​បង្កើត​ឡើង​កាល​ពី​ឆ្នាំ​១៩៨១ ដោយ​អតីត​ព្រះមហាក្សត្រ នរោត្តម សីហនុ ហើយ​មក​ដល់​ឆ្នាំ​១៩៩២ ចលនា​នេះ​ប្រែ​ក្លាយ​ជា​គណបក្ស​ហ៊្វុនស៊ិនប៉ិច ដឹក​នាំ​ដោយ​សម្ដេច​ក្រុម​ព្រះ នរោត្តម រណឫទ្ធិ និង​បាន​ចូល​រួម​បោះ​ឆ្នោត​សកល​ឆ្នាំ​១៩៩៣ ទទួល​ជ័យជំនះ មាន​អាសនៈ​ចំនួន ៥៨ ក្នុង​រដ្ឋ​សភា។

នៅ​ខែ​តុលា ឆ្នាំ​២០០៦ លោក កែវ ពុទ្ធរស្មី បាន​ក្លាយ​ជា​ប្រធាន​គណបក្ស​ហ៊្វុនស៊ិនប៉ិច។ មក​ដល់​ខែ​មេសា ឆ្នាំ​២០១១ គណបក្ស​មាន​ការ​កែ​សម្រួល​លក្ខន្តិកៈ និង​តែងតាំង​លោក កែវ ពុទ្ធរស្មី ជា​មគ្គុទ្ទេសក៍​គណបក្ស និង​បាន​ជ្រើស​រើស​លោក ញឹក ប៊ុនឆៃ ជា​ប្រធាន​ប្រតិបត្តិ​គណបក្ស៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។