ក្រសួងសេដ្ឋកិច្ច និងហិរញ្ញវត្ថុ បានចេញសេចក្ដីប្រកាសមួយនៅថ្ងៃទី៣០ ខែធ្នូ ឆ្នាំ២០១១ ដោយលើកលែងពន្ធអចលនទ្រព្យ ឬការបង់ពន្ធថ្លៃដី និងផ្ទះនៅតំបន់ខ្លះនៃរាជធានីភ្នំពេញ។ ក៏ប៉ុន្តែ លិខិតប្រកាសដែលចុះហត្ថលេខាដោយលោក គាត ឈន់ ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុនោះ បានកំណត់ទុកពេលតែមួយថ្ងៃ គឺថ្ងៃទី៣១ មួយថ្ងៃបន្ទាប់ពីសេចក្ដីប្រកាសជូនដំណឹងឲ្យប្រជាពលរដ្ឋដែលបានបង់ពន្ធផ្ទះហើយ ឲ្យមកដកប្រាក់ដែលខ្លួនបានបង់ពន្ធហើយយកទៅវិញ។
កញ្ញា ជា សុខលាង សហការីអ្នកសម្របសម្រួលបណ្ដាញរួបរួមដើម្បីគណនេយ្យភាពសង្គមនៅអាស៊ីបូព៌ា និងប៉ាស៊ីហ្វិក (Affiliated Network for Social Accountability in East Asia and the Pacific) បញ្ជាក់ថា រដ្ឋាភិបាលគួរទុកពេលឲ្យបានយូរជាងនេះ ហើយគួរប្រកាសឲ្យប្រជាពលរដ្ឋបានដឹងបានទូលំទូលាយជាងនេះ ដើម្បីឲ្យគាត់អាចដកប្រាក់ពន្ធដែលបានបង់ហើយនោះមកប្រើការវិញបាន។
កញ្ញា ជា សុខលាង៖ «យើងមើលឃើញអំពីកង្វះខាតរបស់ក្រសួងដែរ ដែលគាត់មានយន្តការ មានការលើកលែងពន្ធលើអចលនទ្រព្យនៅសង្កាត់មួយចំនួនហើយ ប៉ុន្តែការប្រកាសរបស់គាត់បានយឺតពេល។ ដូចជាមានរយៈពេលផ្សព្វផ្សាយតែប៉ុណ្ណោះ។ យន្តការនេះទុកដូចជាម្ចាស់អចលនទ្រព្យមិនអាចបង្វិលប្រាក់មកប្រើប្រាស់វិញទេ»។
ទោះយ៉ាងណា ប្រាក់ទាំងនោះមិនបាត់ទេ។ លិខិតដដែលចារថា ចំពោះប្រជាពលរដ្ឋណា ដែលមិនអាចដកប្រាក់នោះបានទាន់ពេលកំណត់ គឺរដ្ឋាភិបាលបានសម្រេចបង្វិលទឹកប្រាក់នោះ ទុកសម្រាប់បង់ពន្ធអចលនទ្រព្យឆ្នាំបន្ទាប់ទៀត គឺឆ្នាំ២០១២។
កន្លងមកក្រុមមន្ត្រីឲ្យដឹងថា ចំនួនទឹកប្រាក់បង់ពន្ធអចលនទ្រព្យគិតជាគ្រួសារ មានទាបបំផុតចាប់ពីជិតមួយម៉ឺនរៀលឡើងដល់ខ្ពស់បំផុត ៤.០០០ដុល្លារ។
វិទ្យុអាស៊ីសេរី មិនអាចទាក់ទងលោក ឱម ចន អនុប្រធានការិយាល័យពន្ធដារ នៃក្រសួងសេដ្ឋកិច្ច និងហិរញ្ញវត្ថុបានទេ នៅថ្ងៃទី១៨ ខែមករា ដើម្បីសុំបញ្ជាក់ព័ត៌មានបន្ថែម។
លោក ស៊ឹង ប៊ុណ្ណា ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា មានប្រសាសន៍គាំទ្រការសម្រេចចិត្តរបស់រដ្ឋាភិបាល ដែលផ្ទេរប្រាក់ពន្ធរបស់ប្រជាពលរដ្ឋបានបង់ហើយនោះ ទៅឆ្នាំក្រោយ ព្រោះលោកយល់ថា នីតិវិធីដក ឬដាក់ប្រាក់នេះ ស្មុគស្មាញ នាំឲ្យខាតពេលវេលាទាំងមន្ត្រីរដ្ឋាភិបាល ទាំងប្រជាពលរដ្ឋដែលទៅដកប្រាក់មកវិញ បើសិនជាទុកបង់ពន្ធឆ្នាំក្រោយតែម្ដងទៅគឺស្រួលជាង ព្រោះថា នឹងចៀសបង់ពន្ធមិនរួចដូចតែគ្នាដដែល។
លោក ស៊ឹង ប៊ុណ្ណា៖ «អ្នកណាដែលមិនទាន់បានបង់២០១១ ហើយតំបន់ដែលលើកលែងនេះ គាត់ត្រូវបង់ ២០១២ ហើយអ្នកដែលបានបង់កាលពីមុន ហើយបង្វិលវាមកចូល២០១២ ទៅ គឺជាការស្រេចហើយ។ វាល្អជាងយើងដកចុះដកឡើង បង់ចុះបង់ឡើង ហើយការងារដដែល វាខាតការងារមន្ត្រីជំនាញទៀតបាទ!»។
នៅឆ្នាំ២០១១ រដ្ឋាភិបាលបានប្រកាសយកពន្ធផ្ទះ ហើយប្រមូលបានប្រាក់ពន្ធសរុបជាង ១១លានដុល្លារ។ ក៏ប៉ុន្តែ សេចក្ដីប្រកាសរបស់ក្រសួងសេដ្ឋកិច្ច និងហិរញ្ញវត្ថុ បង្ហាញថា រដ្ឋាភិបាលបានសម្រេចលើកពន្ធនៅសង្កាត់ចំនួន២០ ព្រោះថា តំបន់ទាំងនោះនៅមានបញ្ហាធ្វើបែបបទឯកសារផ្ទេរពីខេត្តកណ្ដាល កាត់ចូលមកស្ថិតក្រោមការគ្រប់គ្រងរបស់រាជធានីភ្នំពេញវិញ ខណៈដែលរដ្ឋាភិបាលពង្រីកទីក្រុងភ្នំពេញ ធំជាងមុន។
សង្កាត់ទាំង២០ នោះមាន៖ សង្កាត់ព្រែកភ្នៅ សង្កាត់សំរោង និងសង្កាត់ពញាពន់ ក្នុងខណ្ឌសែនសុខ។ សង្កាត់១១ ក្នុងខណ្ឌដង្កោ គឺសង្កាត់ពន្សាំង សង្កាត់ស្នោរ សង្កាត់ឪឡោក សង្កាត់បឹងធំ សង្កាត់កន្ទោក សង្កាត់គងនយ សង្កាត់ទៀន សង្កាត់រលួស សង្កាត់កំបូល សង្កាត់ស្ពានថ្ម និងសង្កាត់ព្រែកកំពិស។
ក្នុងខណ្ឌមានជ័យ មានសង្កាត់ ៤ គឺសង្កាត់វាលស្បូវ សង្កាត់ព្រែកឯង សង្កាត់ក្បាលកោះ សង្កាត់ព្រែកថ្មី ហើយចុងក្រោយ នៅក្នុងខណ្ឌឫស្សីកែវ មានសង្កាត់ពីរ គឺសង្កាត់បាក់ខែង និងសង្កាត់កោះដាច់៕