ប្រធានមន្ទីរបរិស្ថានខេត្តកំពង់ស្ពឺ លោក សឹង្ហ ប៊ុនធឿន មានប្រសាសន៍យ៉ាងដូច្នេះ ខណៈដែលជនមួយចំនួនបង្កើនសកម្មភាពចូលកាប់ព្រៃឈើដើម្បីយកដីសង់ភូមិថ្មីនិងធ្វើដំណាំចម្ការនៅតាមតំបន់ខ្លះ ក្នុងស្រុកឱរ៉ាល់និងស្រុកថ្ពង ខេត្តកំពង់ស្ពឺ ៖ «ម្ដុំស្រែពកហ្នឹង គឺការកាប់រានរបស់គាត់ទៅ គឺយើងសុទ្ធតែមានដីកាដកហូតអស់ហើយ យើងនៅតែអនុវត្តទេ ចាប់ពីកន្ទួត ទៅដល់រហូតអូរព្រៃចាំ យើងមានដីកាដកហូតរបស់ខេត្តហើយអស់ហើយ យើងចាំតែភ្ជុំហើយ នឹងធ្វើ»។
អភិបាលខេត្តកំពង់ស្ពឺ លោក កង ហ៊ាន មានប្រសាសន៍ថា អាជ្ញាធរមិនព្រងើយកន្តើយក្នុងរឿងទប់ស្កាត់អំពើកាប់ព្រៃឈើនោះទេ។ ប៉ុន្តែ អាជ្ញាធរបានចាប់ខ្លះ លើកលែងខ្លះ ដោយរដូវនេះ កសិករភាគច្រើនដាច់ស្បៀង ត្រូវតែចូលព្រៃ រកអុស ដុតធ្យូងលក់ដើម្បីយកលុយទិញអង្ករ ឬចាយវាយផ្សេងៗ។ ប៉ុន្តែអំពើទន្រ្ទានព្រៃ យកដីទុកលក់ ឬពង្រីកដីដាំដុះ ឬបង្កើតភូមិថ្មី គ្មានការអនុញ្ញាត អាជ្ញាធរនឹងបង្រ្កាបក្នុងពេលឆាប់ៗនេះ។
លោក កង ហ៊ាន មានប្រសាសន៍ដូច្នេះថា ៖ «កន្លងមកយើងធ្វើផង យើងមិនធ្វើផង បានន័យថា កន្លែងណាដែលរូបភាពធំដុំ យើងធ្វើ ប៉ុន្តែបើជារូបភាពតូចតាចកំប៉ិកកំប៉ុក ពិសេសប្រជាពលរដ្ឋដែលក្រីក្រ ដែលមានការខ្វះខាតលំបាក យើងអនុគ្រោះឲ្យគាត់»។
មេភូមិច្រកទាក ឃុំត្រពាំងជោរ លោក សន សុន មានប្រសាសន៍ថា កំណើនអ្នកត្រូវការអុស និងបង្គោលរបង កើននាំភូមិច្រកទាក រងការទន្រ្ទានពៃ្រសហគមន៍ ៖ «គាត់លុបក្នុងមួយម៉ែត្រគូប ៦ម៉ឺន ទៅ៧ម៉ឺន[រៀល]»។
បុរសឈ្មោះ ឃីម មកពីភូមិក្រវៀក ឃុំយាអង្គ ស្រុកថ្ពង អះអាងថា គាត់មានជីវភាពខ្វះខាតទើបមកឃុំត្រពាំងជោរ រកកាប់ឈើលក់ ៖ «រកកាប់អុសលក់ បង្គោលរបងអី។ មួយដើម ២ពាន់[រៀល] បានគ្រាន់ចិញ្ចឹមគ្រួសារតិចតួច»។
ប្រធានបរិស្ថានខេត្តកំពង់ស្ពឺ លោក សឹង្ហ ប៊ុនធឿន មានប្រសាសន៍ថា ក្នុងខេត្តកំពង់ស្ពឺ ព្រៃរដ្ឋថែរក្សាអភិរក្ស មានជាង១៤ម៉ឺនហិកតារ។ បច្ចុប្បន្ន ការបំផ្លាញព្រៃអភិរក្សរបស់រដ្ឋ គ្រាន់តែតំបន់ឱរ៉ាល់មួយ បំផ្លាញព្រៃអស់ព្រៃជាង ២គីឡូម៉ែត្រ ៖ «តាមភូមិទាំងឡាយដែលនៅក្នុងដែនជម្រក ដូចស្នឹងចំបើងអ៊ីចឹង អាឧសគរពេញហ្នឹង។ អ៊ីចឹងទេ យើងលំបាកណាស់ កាលណាយើងទប់ស្កាត់ខ្លាំង យើងក៏ត្រូវវេទនាខ្លាំងដែរ»។
លោកសឹង្ហ ប៊ុនធឿន បន្តថា អំពើបំពានព្រៃឈើ កើតមាននៅតំបន់ជ្រៅៗនិងដាច់ស្រយាល ពិសេសតំបន់ប្រជុំច្រើនខេត្ត ឬច្រើនស្រុក ស្ថិតនៅជ្រៅៗពីថ្នល់ជាតិ មានការលំបាកទប់ស្កាត់ខ្លាំង ដោយមន្រ្តីបរិស្ថានក្នុងខេត្ត មានតែ ៣០នាក់ ឯព្រៃឈើ មានជាង ១៤ម៉ឺនហិកតារ។ ទើបកើតភាពអនាធិបតេយ្យបង្ហិនព្រៃឈើ។ លោកថា ដើម្បីជួយទប់ស្កាត់ភាពអនាធិបតេយ្យនេះ មន្ទីរនិងក្រសួងបរិស្ថាន បានបង្កើតជាសហគមន៍ចំនួន៧ ឲ្យជួយការពារព្រៃឈើ។ ហើយប្រជាសហគមន៍ទាំងនោះបានជួយការពារព្រៃឈើរដ្ឋខ្លាំងក្លា។
ប៉ុន្តែជនខិលខូច នៅតែអាចឆ្លៀតចូលកាប់ឈើ ទោះបីមានការចាប់ជនខិលខូច បានច្រើនលើកយកមកព្រមានតាមច្បាប់ ក៏ជនបំផ្លាញព្រៃមិនញញើតរហូតបាញ់សម្លាប់មន្រ្តីបរិស្ថានស្លាប់អស់២នាក់ កាលពីឆ្នាំកន្លងទៅ៕