អ្នក​ភូមិ​៥​នាក់​នៅ​ពោធិ៍សាត់​រក​អន្តរាគមន៍​រឿង​តុលាការ​កោះ​ហៅ​ជា​ដើម​បណ្ដឹង

ប្រជាពលរដ្ឋ ៥​រូប នៅ​ភូមិ​ក្បាលទាហាន ត្រូវ​បាន​ព្រះរាជអាជ្ញា​អម​សាលាដំបូង​ខេត្ត​ពោធិ៍សាត់ បាន​ចេញ​ដីកា​កោះ​ហៅ​ឲ្យ​ចូល​ខ្លួន​ក្នុង​នាម​ជា​ដើម​បណ្ដឹង ឆ្លើយ​បំភ្លឺ​អំពី​ករណី​បង្ខិតបង្ខំ​ឲ្យ​ផ្ដិត​មេដៃ និង​ក្លែង​ឯកសារ​សាធារណៈ។
ដោយ មណ្ឌល កែវ
2013.01.30
Share on WhatsApp
Share on WhatsApp
អ្នក​ភូមិ ពោធិ៍សាត់ ៣០៥ ២៩-មករា-២០១៣៖ អ្នក​ភូមិ​ក្បាលទាហាន ២​នាក់​ក្នុង​ចំណោម ៥​នាក់ ដែល​មក​រក​អន្តរាគមន៍​នៅ​អង្គការ​លីកាដូ ខេត្ត​ពោធិ៍សាត់ ដោយសារ​ភ័យ​ខ្លាច​រឿង​តុលាការ​កោះ​ហៅ​ក្នុង​នាម​ជា​ដើម​បណ្ដឹង។
RFA/Mondulkeo

ប្រជាពលរដ្ឋ​ទាំង ៥​រូប មាន​អាការៈ​ភ័យ​ស្លន់ស្លោ ធ្វើ​ដំណើរ​មក​កាន់​អង្គការ​លីកាដូ (Licadho) ខេត្ត​ពោធិ៍សាត់ សុំ​​ការ​ជួយ​អន្តរាគមន៍ ដោយ​ពួក​គាត់​បាន​ទទួល​ដីកា​ពី​តុលាការ​កោះ​ហៅ​ឲ្យ​ពួក​គាត់​ចូល​ខ្លួន​ដោយ​ពុំ​ដឹង​ថា​គាត់​មាន​រឿង​អ្វី។

ស្ត្រី​អ្នក​ភូមិ​ឈ្មោះ ហៃ ហួត ជា​ប្រជាពលរដ្ឋ​នៅ​ភូមិ​ក្បាលទាហាន ឃុំ​ឈើតុំ ស្រុក​ក្រគរ ខេត្ត​ពោធិ៍សាត់។ គាត់​បាន​ឲ្យ​ដឹង​បន្ទាប់​ចេញ​ពី​តុលាការ​ថា តុលាការ​ខេត្ត​បាន​ហៅ​គាត់​ប្រាប់​ថា គាត់​ជា​ដើម​បណ្ដឹង​ក្នុង​ករណី​បង្ខិតបង្ខំ​ឲ្យ​ផ្ដិត​មេដៃ និង​ក្លែង​លិខិត​សាធារណៈ។ គាត់​បន្ត​ថា គាត់​មិន​បាន​ប្ដឹង​នរណា​ទេ ហេតុ​អ្វី​បាន​ជា​តុលាការ​ហៅ​គាត់​មក​សួរ​ក្នុង​នាម​ជា​ដើម​បណ្ដឹង​ដូច្នេះ។

គាត់​សំណូមពរ​ឲ្យ​តុលាការ​ជួយ​រក​អ្នក​ដែល​ក្លែង​បន្លំ​ឈ្មោះ​គាត់​ទៅ​ប្រើប្រាស់​ក្នុង​ការ​ប្ដឹងផ្ដល់​នេះ មក​ផ្ដន្ទាទោស​តាម​ផ្លូវ​ច្បាប់​ផង៖ «ខ្ញុំ​អត់​បាន​ទៅ​ប្ដឹងផ្ដល់​អី​បញ្ហា​ព្រៃ​សហគមន៍​ដែល​ខ្ញុំ​បាន​ផ្ដិត​មេដៃ​ឲ្យ​លោក​ក្មួយ ឡាំង ឡៃ នោះ​ទេ។ ខ្ញុំ​ផ្ដិត​មេដៃ​ដើម្បី​សុំ​ព្រៃ​ទុក​សម្រាប់​ឲ្យ​ក្របី​គោ​ជ្រក គ្មាន​នរណា​បង្ខំ​អី​ខ្ញុំ​ទេ។ ខ្ញុំ​អត់​បាន​ប្ដឹង​ឈ្មោះ គុជ វេង ឡោន ស៊ីវី និង ឡាំង ឡៃ ឡើយ...»

ដូច​គ្នា​នេះ​ដែរ បុរស​អ្នក​ភូមិ​ក្បាលទាហាន ឈ្មោះ ហេង ហ៊ុង និង​ឈ្មោះ សែ គឹម បាន​ឲ្យ​ដឹង​នៅ​ព្រឹក​ថ្ងៃ​ទី​២៩ មករា ថា ពួកគាត់​ពុំ​ដែល​បាន​ប្ដឹង​ផ្ដល់​អ្នក​ណា​ទេ ហេតុ​អ្វី​បាន​ជា​តុលាការ​កោះ​ហៅ​គាត់​មក​សាកសួរ​ក្នុង​នាម​ជា​ដើម​បណ្ដឹង​ដូច្នេះ៖ «ខ្ញុំ​អត់​បាន​ប្ដឹង​ពី​ឈ្មោះ គុជ វេង ឡោន ស៊ីវី និង ឡាំង ឡៃ នោះ​ទេ ហើយ​ខ្ញុំ​ក៏​មិន​ដែល​ស្គាល់​ឈ្មោះ គុជ វេង និង​ឈ្មោះ ឡោន ស៊ីវី ដែរ។ ខ្ញុំ​ចង់​ឲ្យ​តុលាការ​វែក​មុខ​រក​អ្នក​ដែល​ក្លែង​បន្លំ​មេដៃ និង​ឈ្មោះ​ខ្ញុំ​មក​ប្រើ​នេះ មក​ផ្ដន្ទាទោស ពីព្រោះ​ខ្ញុំ​អត់​បាន​ដឹង​អី​ទាំង​អស់​ហ្នឹង...»

មន្ត្រី​តុលាការ​ទទួល​បន្ទុក​សាកសួរ និង​ព្រះរាជអាជ្ញា​អម​សាលាដំបូង​ខេត្ត គឺ​លោក តន់ សីហតេជៈ មិន​ព្រម​ផ្ដល់​ឈ្មោះ​អ្នក​កាន់​ពាក្យ​បណ្ដឹង​មក​ដាក់​នៅ​តុលាការ​ទេ បើ​ទោះ​បី​ជា​ប្រជាពលរដ្ឋ​ដែល​ត្រូវ​បាន​តុលាការ​ហៅ​មក​សាកសួរ​ក្នុង​នាម​ជា​ដើម​បណ្ដឹង​បាន​បដិសេធ​ថា ពួក​គេ​មិន​បាន​ដាក់​បណ្ដឹង​នេះ​ក៏ដោយ។

យ៉ាង​នេះ​ក្ដី ប្រជាពលរដ្ឋ​ចំនួន ៥​រូប​នេះ បាន​ផ្ដោត​ការ​មន្ទិល​ថា គឺ​អាជ្ញាធរ​ភូមិ​ជា​អ្នក​បាន​ប្រើប្រាស់​ឈ្មោះ និង​ស្នាម​មេដៃ​ពួក​គាត់​មក​ដាក់​បណ្ដឹង​នេះ។ អ្នក​ភូមិ​ទាំង ៥​រូប​នេះ បាន​ឲ្យ​ដឹង​ដូច​គ្នា​ថា គណៈកម្មការ​ភូមិ​ក្បាលទាហាន ដែល​មាន​លោក​អតីត​មេភូមិ​ឈ្មោះ តុន តន អនុ​ប្រធាន​ភូមិ​ឈ្មោះ អ៊ុយ រូ និង​សមាជិក​ភូមិ​ឈ្មោះ ស៊ឹម សុផល ហៅ ក្រឹម ធ្លាប់​បាន​យក​ក្រដាស​ដែល​ពុំ​មាន​សរសេរ​អក្សរ​មក​ឲ្យ​ពួក​គាត់​ផ្ដិត​មេដៃ​ដោយ​ពុំ​មាន​បញ្ជាក់​ពី​មូល​ហេតុ ហើយ​ឥឡូវ​ស្រាប់​កើត​មាន​ជា​រឿង​ថា ពួកគាត់​ជា​ដើម​បណ្ដឹង​ប្ដឹង​ពី​ឈ្មោះ គុជ វេង ឈ្មោះ ឡោន ស៊ីវី និង​ឈ្មោះ ឡាំង ឡៃ ទៅ​វិញ។

មន្ត្រី​សម្របសម្រួល​អង្គការ​លីកាដូ ខេត្ត​ពោធិ៍សាត់ លោក អេង ឈុនហាន មាន​ប្រសាសន៍​ថា ដោយ​យោង​លើ​ការ​បដិសេធ​របស់​ប្រជាពលរដ្ឋ​ថា គាត់​មិន​បាន​ប្ដឹង​ទេ។ អ្នក​ដែល​យក​ពាក្យ​បណ្ដឹង​នេះ​មក​ដាក់​ត្រូវ​ទទួល​ខុស​ត្រូវ​ចំពោះ​មុខ​ច្បាប់​ពី​បទ​ក្លែង​លិខិត​សាធារណៈ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។