បុរសជនជាតិទំពួនឈ្មោះ លិល វ៉ិត អាយុ៣៣ឆ្នាំ រស់នៅភូមិឡូន សង្កាត់យក្សឡោម ក្រុងបានលុង ខេត្តរតនគិរី បានបញ្ជាក់ប្រាប់វិទ្យុអាស៊ីសេរីនៅថ្ងៃទី៣ ខែកញ្ញាថា លោកបានស្នើសុំយកកូនពីអ្នកដែលបានទិញកូនពីប្រពន្ធរបស់លោក ប៉ុន្តែគេមិនព្រមឲ្យ។ លោកបានប្ដឹងនគរបាលកាលពីថ្ងៃទី១ ខែកញ្ញារួចហើយ ដើម្បីឲ្យជួយយកកូនមកវិញ ៖ «គាត់ថាហើយម៉េចហ្អែងចង់ជាប់គុកហ្អីបានជាមករញ៉េរញ៉ៃអារឿងកូនលក់ឲ្យគេយកលុយគេហើយហ្នឹង»។
លិល វ៉ិត មានមុខរបរជាសន្តិសុខរបស់ក្រុមហ៊ុនឯកជនស្តង់ដារ នៅទីក្រុងភ្នំពេញ បានរៀបរាប់ថា ប្រពន្ធបាននាំកូនត្រឡប់ពីភ្នំពេញមកកាន់ខេត្តរតនគិរីវិញ នៅពេលដែលមានទំនាស់ពាក្យសម្ដីបន្តិចបន្តួច ហើយក៏បានយកកូនស្រីទៅលក់ឲ្យជនជាតិចាមរស់នៅភូមិ១ សង្កាត់ឡាបានសៀក ក្រុងបានលុង ក្នុងទឹកប្រាក់៤០ម៉ឺនរៀល កាលពីថ្ងៃទី២៧ ខែសីហា។ លោកក៏បានមកដល់ខេត្តរតនគិរី និងបានទៅជួបក្រុមអ្នកទិញកូនរបស់លោក និងសុំយកកូនវិញ ដោយបង់ប្រាក់ ៤០ម៉ឺនរៀលជូនពួកគេ តែគេមិនព្រម ហើយក៏ថែមទាំងគំរាមកំហែងលោកផង។
នាង ភឿនមុំ អាយុ២៦ឆ្នាំ ជាប្រពន្ធរបស់ លិល វ៉ិត ដែលត្រូវបានចោទថា លក់កូនឲ្យទៅអ្នកដទៃនោះបានបញ្ជាក់ថា នាងបានប្រគល់កូនឲ្យគេ និងបានទទួលប្រាក់ ៤០ម៉ឺនរៀលមែន ក្រោយពីមានទំនាស់ជាមួយប្ដី និងអស់សង្ឃឹមថាប្តីមិនវិលមករកនាងវិញនោះ។ ឥឡូវនាងដឹងថាមានកំហុសធ្ងន់ ក៏បានជូនប្ដីទៅសុំកូនមកវិញ តែនៅមិនទាន់បានកូនត្រឡប់មកវិញនៅឡើយ ៖ «ខ្ញុំជូនកូនខ្ញុំទៅរួចគេឲ្យខ្ញុំនោះ ១០០ដុល្លារ។ ឲ្យប្តីខ្ញុំប្តឹងទៅ ខ្ញុំថាបើខ្ញុំជាប់ក៏ពូឯងជាប់ដែរ។ គេថាបើគេជាប់គុក គេនឹងវាឲ្យជិះទៀត»។
បុរសឈ្មោះ រូន លីម ជាជនជាតិខ្មែរឥស្លាម ដែលត្រូវបានចោទថា ជាអ្នកទិញ និងមិនព្រមប្រគល់កូនឲ្យវិញនោះ បានបញ្ជាក់ថា គាត់គ្មានកូនស្រី ស្រាប់តែនារីមានម្នាក់ជាម្ដាយអះអាងថាប្ដីនាងបានបោះបង់នាងហើយ គ្មានលទ្ធភាពចិញ្ចឹមកូនសោះ និងចង់ឲ្យមានអ្នកសង្គ្រោះជួយចិញ្ចឹមកូននេះឲ្យបានធំធាត់។ ដូច្នេះលោកក៏បានទទួលយកកូននោះ ដោយមានមេភូមិដឹងឮ ធ្វើលិខិតស្នាម និងមានអ្នកភូមិទូទៅបានដឹងឮជាសាក្សី។ ករណីនេះលោកបានផ្ដល់ប្រាក់ ៤០ម៉ឺនរៀលជូនទៅម្ដាយក្មេងស្រីនោះមែន តែជាការជូនសគុណប៉ុណ្ណោះ មិនមែនជាការលក់ទិញមនុស្សឡើយ ៖ «ទើបនឹងបានប្រាំថ្ងៃក៏មករកកូនវិញ ហើយយកទាំងប្តីមកទៀត ទាមទារយកវិញ។ កូនហ្នឹងខ្ញុំថាប្រពន្ធខ្ញុំយកទៅលេងស្រុកប្រហែល ២ថ្ងៃបានមកវិញ ហើយគេមិនព្រមជឿខ្ញុំទេ ទៅប្ដឹងផ្ដល់គ្រប់កន្លែងទាំងអស់»។
លោក រូន លីម បានបន្តថា លោកបានប្រាប់ប្រពន្ធឲ្យនាំយកកូននោះពីខេត្តកំពង់ចាមមកវិញ នៅថ្ងៃទី៣ ខែកញ្ញា ដើម្បីប្រគល់ឲ្យប៉ូលិសជូនត្រឡប់ទៅឪពុកម្ដាយគេជួបជុំគ្នាវិញ។
មន្ត្រីមជ្ឈមណ្ឌលអប់រំច្បាប់សម្រាប់សហគមន៍ ប្រចាំខេត្តរតនគិរី លោក មាស សុភា បានពន្យល់ថា ករណីស្មុំកូនយោងតាមច្បាប់ គេអាចធ្វើទៅបានដោយមិនមានជាប់ជំពាក់នឹងការបង់ប្រាក់ទៅឲ្យម្ដាយ ឬឪពុករបស់ក្មេងនោះទេ ហើយគេត្រូវបំពេញលិខិតបទដ្ឋាននានាតាមច្បាប់។ ក្នុងករណីមានការបង់ប្រាក់ដូចករណីនេះ វាគឺជាការជាប់សង្ស័យនឹងផ្ទុយពីគោលការណ៍ច្បាប់ហើយ ដែលអាជ្ញាធរនឹងត្រូវស៊ើបអង្កេតយ៉ាងល្អិតល្អន់៕