អ្នកវិភាគខាងផ្នែកសេដ្ឋកិច្ច លោក ចាន់ សុផល បានមានប្រសាសន៍ថា តម្លៃអចលនទ្រព្យនៅកម្ពុជា នឹងមានការធ្លាក់ចុះ ឬក៏នៅទ្រឹង បើសិនជាគ្មានការមកវិនិយោគបន្ថែមទេនោះ។
លោក ចាន់ សុផល មានប្រសាសន៍ដូច្នេះថា ៖ «អានេះជាទស្សនៈផ្ទាល់ខ្លួន ខ្ញុំយល់ថា វានឹងទ្រឹង ឬក៏ធ្លាក់ចុះនូវ ១-២ឆ្នាំខាងមុខ លើកលែងតែមានថវិកាថ្មីៗពីប្រទេសផ្សេងចូលមក ដែលយើងពិបាកមើលដឹង»។
អនុប្រធានក្រុមហ៊ុន ខេមបូឌា អង្គរ រៀល អ៊ីស្តេត ដែលមានមូលដ្ឋាននៅទីក្រុងសៀមរាប លោក វង្ស ធីនន្ទ បានមានប្រសាសន៍ថា តម្លៃអចលនទ្រព្យនៅខេត្តសៀមរាប មានដីធ្លី និងសំណង់ នៅមានតម្លៃខ្ពស់ដដែល ប៉ុន្តែថា គ្មានអតិថិជនមកទិញឡើយ។
លោក វង្ស ធីនន្ទ បានឲ្យដឹងថា តម្លៃរបស់អចលនទ្រព្យនៅក្នុងខេត្តសៀមរាបនេះ បានឡើងថ្លៃខ្ពស់ ហើយថា តម្លៃនោះអាចនឹងមានការធ្លាក់ចុះមកវិញ បន្ទាប់ពីគ្មានអ្នកទិញ ៖ «វាក៏អាចធ្លាក់ចុះវិញដែរបញ្ហាហ្នឹង ដោយសារតែទី១ តម្លៃឡើងខ្ពស់ បន្ទាប់មកដល់ពេលអត់មានអ្នកទិញ នឹងត្រូវចុះវិញហើយរឿងហ្នឹង។ ខ្ញុំបានជួបអតិថិជនជាច្រើន អ្នករស់នៅក្រៅ នៅបណ្ដាប្រទេសនានា នៅពេលបានឮថា តម្លៃទីផ្សារនៅស្រុកខ្មែរយើងខ្ពស់ជាងនៅស្រុកគាត់ អ៊ីចឹងភាគច្រើនល្មមៗ គាត់យកលុយទៅទិញនៅស្រុកគេហើយ»។
ទោះជាយ៉ាងណា លោក វង្ស ធីនន្ន បានសម្ដែងសេចក្ដីសុទុដ្ឋិនិយមថា តម្លៃនៃអចលនវត្ថុ នឹងកើនឡើងវិញ ក្រោយពីវិបត្តិសេដ្ឋកិច្ចពិភពលោកនិងបញ្ហាជម្លោះព្រំដែនខ្មែរ-ថៃ ត្រូវបានដោះស្រាយរួច។
នាយករងនៃភ្នាក់ងារសេវាអចលនទ្រព្យកម្ពុជា លោក ឡន ស៊ីណារ៉ា បានទទួលស្គាល់ថា តម្លៃដីធ្លីនិងសំណង់នៅកម្ពុជា កន្លងមកបានឡើងយ៉ាងគំហុកហួសកម្រិតតម្លៃទីផ្សារពិតមែន ដោយសារមានអ្នកបំប៉ោងតម្លៃដើម្បីក្រឡុកទីផ្សារ។
លោកបានសម្ដែងការព្រួយបារម្ភថា តម្លៃអចលនទ្រព្យអាចនឹងមានការធ្លាក់ចុះ ដោយមើលឃើញថា តម្លៃអចលនទ្រព្យទាំងនោះ បានជាប់នៅទ្រឹង បន្ទាប់ពីមានការបោះឆ្នោត ជម្លោះព្រំដែន និងវិបត្តិសេដ្ឋកិច្ចលើពិភពលោក។
លោក ឡន ស៊ីណារ៉ា មានប្រសាសន៍ដូច្នេះថា ៖ «ចំពោះវិបត្តិហិរញ្ញវត្ថុអន្តរជាតិហ្នឹង វាជាបញ្ហាធ្ងន់ធ្ងរមែនទែន ដែលធ្វើឲ្យវិនិយោគបរទេសត្រូវថយ និងធ្លាក់ចុះធម្មតា គេគិតថា ជួយប្រទេសគេ ការ[បម្រុង]ហិរញ្ញវត្ថុសម្រាប់វិនិយោគក្នុងស្រុកគេមួយៗអ៊ីចឹងការយកលុយមកវិនិយោគនៅក្រៅប្រទេស ជាពិសេសប្រទេសកម្ពុជាយើង ជាទីផ្សារថ្មីហ្នឹង គឺហាក់ដូចជាមានផលលំបាកច្រើន»។
លោក វង្ស ធីនន្ន និងលោក ឡន ស៊ីណារ៉ា បានមានប្រសាសន៍ថា ជនជាតិបរទេស ដែលមកវិនិយោគលើផ្នែកអចលនទ្រព្យ ភាគច្រើន គឺជនជាតិកូរ៉េខាងត្បូង។
នាយករងភ្នាក់ងារសេវាអចលនទ្រព្យកម្ពុជា លោក ឡន ស៊ីណារ៉ា បានឲ្យដឹងថា តំបន់ដែលអាចនឹងទទួលរងការធ្លាក់ចុះថ្លៃផ្នែកអចលនទ្រព្យខ្លាំងជាងគេ គឺតំបន់នៅឆ្ងាយៗពីទីក្រុងនិងទីប្រជុំជន ដែលគេបានទិញដើម្បីលក់យកចំណេញ ហើយមិនបានយកមកវិនិយោគ ដូចជាការដាំដុះដំណាំកសិកម្មផ្សេងៗជាដើម។
លោក ឡន ស៊ីណារ៉ា បានមានប្រសាសន៍ផងដែរថា អ្នកដែលរងគ្រោះពីការធ្លាក់ថ្លៃ អចលនទ្រព្យខ្លាំងជាងគេនោះ គឺជាអ្នកដែលបានខ្ចីលុយពីធនាគារយកទៅទិញដីនិងសំណង់លំនៅដ្ឋានក្នុងតម្លៃថ្លៃ ហើយថា តាមការសង្កេតរបស់ភ្នាក់ងារលោក មានមនុស្សប្រមាណ ៣០ ទៅ ៤០ ភាគរយ ដែលបានទិញអចលនទ្រព្យដើម្បីទុកយកចំណេញ។
ឡន ស៊ីណារ៉ា មានប្រសាសន៍ថា ៖ «បើគាត់ទិញក្នុងន័យវិនិយោគ បានន័យថា គាត់ទិញដើម្បីដាំស្រូវ ដើម្បីដាំបន្លែបង្ការ ឬក៏ដាំដើមឈើ ឧស្សាហកម្មអី វាអាចល្អ ប៉ុន្តែបើសិនជាគាត់ទិញលក់ចំណេញ អាហ្នឹងហើយដែលផលប៉ះពាល់ធ្ងន់ធ្ងរ ដែលជះឥទ្ធិពលខ្លាំងនោះ យើងឃើញថា ក្រៅពីទីក្រុងភ្នំពេញ ក្រុងសៀមរាប ក្រុងព្រះសីហនុ ដីក្រៅពីនេះ ដូចគ្មានចលនាអីល្អទេ។ តែបើថាដីកសិកម្មខ្លះ ដែលគាត់ទិញដើម្បីវិនិយោគ ដូចជា ដាំអំពៅ ឬមួយធ្វើស្រែចម្ការ អាហ្នឹងខ្ញុំគិតថា ទោះបីជាថាចុះ ក៏គាត់អាចរកផលប្រយោជន៍ពីដីហ្នឹងបានដែរ តែអ្នកខ្លះគាត់ទិញទុកចោល អត់មានធ្វើអីផង រួចជាដីព្រៃ ដីអីផ្សេងៗទៀតហ្នឹង ខ្ញុំគិតថា វាអាចមានឥទ្ធិពលខ្លះ ដែលគាត់យកលុយទៅបោះចោល។ ហើយក្រៅពីនេះទៀត ខ្ញុំឃើញថា អ្នកទិញដូរមួយចំនួនទៀត ក៏បានខ្ចីលុយគេ ឬមួយខ្ចីលុយធនាគារ ហើយគាត់ទិញក្នុងទ្រង់ទ្រាយធំ ផ្ទះល្វែងសង់ ៤-១០បូរីអីអ៊ីចឹង គាត់ទិញសឹងគ្រប់បុរីទាំងអស់ ដល់អ៊ីចឹង គាត់ជាប់គាំងនឹងអាហ្នឹងឯង ហើយមិនដែលបង់លុយទាំងអស់ទេ គាត់បង់ ៣០-៤០% , ៥០% សល់ប៉ុន្មាន គាត់បង់រំលោះអ៊ីចឹងទៅ គាត់ខ្ចីពីនេះ ខ្ចីពីនោះទៅ អ្នកទាំងអស់ហ្នឹងហើយ ដែលជះឥទ្ធិពលខ្លាំង»។
លោក ឡន ស៊ីណារ៉ា រំពឹងថា រដ្ឋាភិបាលនឹងទាក់ទាញអ្នកវិនិយោគឲ្យបានច្រើនមករកស៊ីនៅស្រុកខ្មែរ ដែលនឹងនាំឲ្យតម្លៃអចលនទ្រព្យមានការកើនឡើងដូចដើម។
អ្នកវិភាគខាងផ្នែកសេដ្ឋកិច្ច លោក ចាន់ សុផល បានសង្កេតឃើញថា ចលនាទិញដូរអចលនទ្រព្យ មានការធ្លាក់ចុះ ហើយថា តម្លៃអាចនឹងធ្លាក់ចុះផងដែរ។
លោក ចាន់ សុផល បានទទួលស្គាល់ថា តម្លៃអចលនទ្រព្យនៅកម្ពុជានាពេលកន្លងមក បានឡើងថ្លៃកប់ពពក ហើយថា វិបត្តិសេដ្ឋកិច្ចពិភពលោក និងបញ្ហាព្រំដែន ក៏បានជះឥទ្ធិពលលើតម្លៃអចលនទ្រព្យនេះផងដែរ។
លោក ចាន់ សុផល មានប្រសាសន៍ថា ៖ «តាមការអង្កេតឃើញ យើងឃើញថា ការទិញដូរបច្ចុប្បន្ន មានការធ្លាក់ចុះ ជាពិសេសនៅទីក្រុងភ្នំពេញ។ តែកាលណាការទិញដូរធ្លាក់ចុះ តម្លៃពិបាកនឹងកើនឡើង គេអាចនៅចង់បានថ្លៃខ្ពស់ដដែល ប៉ុន្តែត្រង់ថា គ្មានអ្នកទិញ ប៉ុន្តែជួលកាលបើឲ្យគេលក់ថោក ក៏គេមិនលក់ដែរ»។
លោក ចាន់ សុផល បានមានប្រសាសន៍ផងដែរថា តម្លៃអចលនទ្រព្យនៅកម្ពុជា អាចកើនឡើងវិញ លុះត្រាតែមានការបោះទុនមកវិនិយោគពីបរទេសមានការកើនឡើង ហើយសេដ្ឋកិច្ចប្រទេសកម្ពុជា មានការលូតលាស់ដែលអាចឲ្យប្រជាពលរដ្ឋមានលទ្ធភាពទិញអចលនទ្រព្យនោះបាន។
លោក ចាន់ សុផល មានប្រសាសន៍ថា ៖ «តម្លៃអចលនទ្រព្យនៅកម្ពុជាយើង នឹងកើនឡើងវិញ ប៉ុន្តែសួរថា ពេលណា យើងបានត្រឹមទាយផ្អែកលើគោលការណ៍ឬកត្តាសេដ្ឋកិច្ចមួយចំនួន។ ខ្ញុំថា កត្តាច្បាស់ជាងគេ យើងចាំមើលថា មានថវិកាថ្មីៗចូលមកវិនិយោគក្នុងស្រុកយើងច្រើនជាងឬទេ? បើសិនជាមាន នោះទីផ្សារអចលនទ្រព្យនឹងឈានទៅមុខទៀត បើមិនអ៊ីចឹងទេ អាចប្រហែលជាមួយឆ្នាំ ទៅ ២ឆ្នាំ ទើបបានកើនឡើងវិញខ្លាំងទៀត»។
គួរជម្រាបថា ក្នុងរយៈពេលប៉ុន្មានឆ្នាំចុងក្រោយនេះ ការវិនិយោគខាងផ្នែកសំណង់និងអចលនទ្រព្យបានកើនឡើងយ៉ាងគំហុក នៅក្នុងប្រទេសកម្ពុជា។
នាយករងភ្នាក់ងារសេវាអចលនទ្រព្យកម្ពុជា លោក ឡន ស៊ីណារ៉ា បានឲ្យដឹងថា គុណភាពសំណង់ភាគច្រើនបំផុត គឺមិនអាចទទួលយកបានឡើយ ដោយការសាងសង់មិនត្រូវតាមបច្ចេកទេសនិងគ្មានប្រព័ន្ធបង្ហូរទឹកជាដើម៕