ក្រុមអ្នកភូមិនៅក្រុងប៉ៃលិនបានថ្លែងក្នុងលក្ខខណ្ឌមិនបញ្ចេញឈ្មោះនាព្រឹកថ្ងៃសុក្រ ទី២៦ ខែមិថុនា ថាផ្ទះបនស្រីជាច្រើនកន្លែងនៅក្នុងភូមិអូរច្រា សង្កាត់អូរតាវ៉ៅ និងទីកន្លែងមួយចំនួនទៀត នៅតាមទីប្រជុំជនក្នុងខេត្តប៉ៃលិននៅតែបើករកស៊ីទទួលភ្ញៀវជាធម្មតា។
កាលពីថ្ងៃទី១៩ ខែមិថុនា អភិបាលខេត្តប៉ៃលិន លោក អ៊ី ឈាន ក្នុងពិធីបំពាក់ស័ក្តិនាយនគរបាលនិងមន្ត្រីនគរបាលនៅស្នងការដ្ឋាននគរបាលខេត្តប៉ៃលិន បានដាក់បញ្ជាឲ្យបង្ក្រាបផ្ទះបនស្រីរកស៊ីផ្លូវភេទ។
លោក អ៊ី ឈាន បញ្ជាក់ថា នៅខេត្តប៉ៃលិនមានបនស្រីប៉ុន្មាន ស្នងការនគរបាលត្រូវចេញបទបញ្ជាបិទទាំងអស់កុំឲ្យសល់។
លោក ប៊ូ សារិន ស្នងការរងនគរបាលខេត្តប៉ៃលិនបានថ្លែងថា ការបិទផ្ទះបនស្រីមិនមែនជាបន្ទុករបស់លោកទេ ប៉ុន្តែតាមអ្វីដែលលោកបានដឹងគឺសមត្ថកិច្ចនគរបាលកំពុងធ្វើការក្នុងរឿងនេះ។
លោក ប៊ូ សារិន បានឲ្យដឹងថា ៖ «អាហ្នឹងយើងរៀបចំឯកសារឲ្យមានការស៊ីញ៉េទទួលស្គាល់ដឹងឮ ធ្វើការស្រង់ស្ថិតិចំនួនហាង ចំនួនទីកន្លែង ទីតាំង»។
ទាក់ទិននឹងបទបញ្ជាឲ្យបិទផ្ទះបនស្រីនៅខេត្តប៉ៃលិននេះ លោក សួស ស៊ីយ៉ាត អភិបាលក្រុងប៉ៃលិនបានថ្លែងយ៉ាងដូច្នេះថា ៖ «បើសិនយើង គាត់គ្រាន់តែមានប្រសាសន៍ហើយយើងយកទៅអនុវត្ត យើងមានលិខិតបទដ្ឋានណាដែលសំអាងផ្លូវការ»។
បុគ្គលិកអង្គការ Afeship លោកស្រី គង់ សុភ័ក្រ្ត បានថ្លែងថា ការបិទផ្ទះបនស្រីទាំងនោះនឹងធ្វើឲ្យប៉ះពាល់មុខរបរស្ត្រីរកស៊ីបម្រើផ្លូវភេទទាំងនោះ។
លោកស្រីបានបញ្ជាក់ដូច្នេះថា ៖ «ខ្ញុំក៏សំណូមពរទៅអធិការថា បើសិនណាវាទៅស្រុកកំណើតវាជារឿងមួយល្អប្រសើរ តែបើមិនទៅស្រុកកំណើតវាទេ បើសិនជាក្មេងស្រីទាំងអស់នោះផ្លាស់ប្តូរមុខរបរ ចង់រកជំនាញវិជ្ជាជីវៈសម្រាប់អនាគត ខ្ញុំមានមណ្ឌលបីនៅខាងអង្គការ Afeship ខ្ញុំនឹងយកចូលមជ្ឈមណ្ឌលខ្ញុំ»។
ក្រុមអ្នករកស៊ីផ្លូវភេទនិងអ្នកភូមិរស់នៅក្នុងខេត្តប៉ៃលិនធ្លាប់បានចោទថា ប៉ូលិសក្រុងប៉ៃលិនបានយកលុយប្រចាំខែពីបនស្រីជាច្រើនកន្លែង ដោយក្នុងមួយខែៗយកពី១៥ម៉ឺនទៅ៣០ម៉ឺនរៀលតាមចំនួនស្រី្តតិចឬច្រើនដែលរកស៊ីផ្លូវក្នុងហាង។
ប៉ុន្តែអធិការនៃអធិការដ្ឋាននគរបាលក្រុងប៉ៃលិន លោក អ៊ួន វិន បានថ្លែងបដិសេធ ហើយបានទម្លាក់កំហុសនេះទៅលើមន្ទីរទេសចរណ៍ មន្ទីរព័ត៌មាន និងមន្ទីរពន្ធដារខេត្ត ថាជាអ្នកយកលុយប្រចាំថ្ងៃនិងប្រចាំឆ្នាំ។
យោងតាមស្ថិតិពីអង្គការ Afeship ដែលមានមូលដ្ឋាននៅខេត្តប៉ៃលិនបានបង្ហាញថា នៅខេត្តប៉ៃលិនមានផ្ទះបនស្រីចំនួន១២ មានស្រី្តបម្រើផ្លូវភេទ៩៤នាក់ ហាងខារ៉ាអូខេ១២ មានស្រ្តីបម្រើសេវាផ្លូវភេទ៩១នាក់ ហាងម៉ាស្សា១ ស្រ្តីបម្រើផ្លូវភេទ៥នាក់ និងភោជនីយដ្ឋានចំនួន២ ស្រ្តី១៥នាក់ដែលភ្ញៀវអាចចរចាយកទៅបម្រើផ្លូវភេទបាននៅក្រោយការទទួលទានអាហាររួច៕