ប្រភពឲ្យដឹងថា ជនរងគ្រោះដែលស្លាប់និងរបួស សុទ្ធសឹងតែជាក្រុមកម្មករលក់ពលកម្ម ដែលត្រូវបានគេនាំមកពីខេត្តកំពង់ចាមនិងខេត្តតាកែវ ដោយក្រុមហ៊ុនក្នុងស្រុកមួយ ឈ្មោះ ឌីអឹមហ្រ្គុប ដើម្បីដាំកៅស៊ូ។
សាក្សីក្នុងហេតុការណ៍ ឈ្មោះ ព្រំ សារី ដែលកូនគាត់អាយុ ៣ឆ្នាំ បានស្លាប់និងប្រពន្ធគាត់ រងរបួសបាក់ជើង មានប្រសាសន៍បញ្ជាក់ពីហេតុការណ៍ ៖ «គេចង់ឲ្យតៃកុងចាស់បើក អ្នកហ្នុង គេមិនសុខចិត្ត គេឡើងមកបើកខ្លួនឯងតែម្ដង រហូតមកដល់ចំណុចគ្រោះថ្នាក់ហ្នឹង កម្មករទាំងអស់ ឲ្យតៃកុងហ្នឹងឈប់ តៃកុងហ្នឹងអត់ឈប់ទេ បើកបោកកន្ទុយក្រឡាប់ ទាញអាត្រាក់ហ្នឹងបោកក្រឡាប់តែម្ដង សង្កត់លើសាកសពទាំង ៤ហ្នឹង»។
ស្នងការប៉ូលិសខេត្តរតនគិរី លោក ផែន ឌីណា មានប្រសាសន៍ថា តាមរបាយការណ៍ពីប៉ូលិសមូលដ្ឋាន ឲ្យដឹងថា គ្រោះថ្នាក់នេះ កើតឡើងនៅចំណុចជម្រាលផ្លូវចង្កេះភ្នំមួយ នៅភូមិលើហន់ ខណៈពេលត្រាក់ទ័រដឹកជញ្ជូន ក្រុមគ្រួសារកម្មករពីការដ្ឋានដាំកៅស៊ូ ក្នុងបំណងទៅផ្សារឯទីរួមស្រុកបរកែវ ដើម្បីទិញសម្ភារៈប្រើប្រាស់ផ្ទាល់ខ្លួន។ លោកថា ប៉ូលិសបានអន្តរាគមន៍សង្រ្គោះអ្នករបួសមកកាន់មន្ទីរពេទ្យខេត្តជាបឋម និងធ្វើរបាយការណ៍អំពីករណីនេះតាមផ្លូវច្បាប់។
លោក ផែន ឌីណា មានប្រសាសន៍ដូច្នេះថា ៖ «គេយកចិត្តទុកដាក់ហើយ ម៉េចៗ យើងទាក់ទងតាមហ្នឹងឲ្យមែនទែន ព្រោះអីតៃកុងវាស្លាប់ហើយ អ៊ីចឹងខាងក្រុមហ៊ុនហ្នឹងហើយ អ្នកទទួលខុសត្រូវហ្នឹង»។
តាមសាក្សីបញ្ជាក់ថា ជនរងគ្រោះដែលស្លាប់មានឈ្មោះ ឌឿន ជាអ្នកបើកបរមានទីលំនៅនៅភូមិព្រៃធំ ឃុំពេជ្រផ្សារ ស្រុកកោះអណ្ដែត ខេត្តតាកែវ ឈ្មោះ ភារៈ អាយុ ៣ឆ្នាំ រស់នៅភូមិត្រពាំងឈូក ឃុំត្រឡាច ស្រុកត្រាំង ខេត្តតាកែវ និងពីរនាក់ទៀត ជាម្ដាយកូន ឈ្មោះ យឹម សុខា អាយុ ៣៩ឆ្នាំ និងកូនស្រីឈ្មោះ ជិត ណៃគ្រី អាយុ ១៥ឆ្នាំ មកពីខេត្តកំពង់ចាម។ បច្ចុប្បន្ន សាកសពពួកគេត្រូវបានរក្សាទុកនៅវត្តឯទីរួមស្រុក រង់ចាំស្វែងរកក្រុមគ្រួសារ។
ប្រធានការដ្ឋានក្រុមហ៊ុន ឌីអឹម ហ្រ្គុប ឈ្មោះ ម៉ុល មានប្រសាសន៍ថា ក្រុមហ៊ុនកំពុងទទួលខុសត្រូវក្នុងការរៀបចំសាកសពអ្នកស្លាប់ ក៏ប៉ុន្តែទាក់ទិនចំពោះការទទួលខុសត្រូវក្នុងហេតុការណ៍គ្រោះថ្នាក់នេះ លោកពុំទាន់ធ្វើអត្ថាធិប្បាយនៅឡើយទេ ៖ «មិនដឹងសង ឬយ៉ាងម៉េច ខ្ញុំមិនទាន់បានជួបនិយាយគ្នាទេ។ ឥឡូវមធ្យោបាយ យើងរៀបចំសាកសពស្រួលបួលសិន បើបងប្អូនព្រមថា ឥឡូវធ្វើបុណ្យនៅហ្នឹង ក៏យើងក្រុមហ៊ុនធ្វើបុណ្យទៅ»។
គួរបញ្ជាក់ដែរថា នៅខេត្តរតនគិរី ផ្លូវគមនាគមន៍ចេញទៅតាមស្រុកគឺជាផ្លូវក្រាលក្រួសក្រហម ហើយត្រូវឡើងចំណោទភ្នំខ្ពស់ៗទៀតផង។
បច្ចុប្បន្ននេះ គេសង្កេតឃើញមានការដឹកជញ្ជូនកម្មករពីបណ្ដាខេត្តមកធ្វើការតាមការដ្ឋាននានា ក្នុងខេត្តនេះ ហើយការដឹកជញ្ជូនច្រើនធ្វើឡើងតាមរយៈរទេះគោយន្ត ឬត្រាក់ទ័រសណ្ដោងរ៉ឺម៉ក ឡើងជម្រាលភ្នំ ធ្វើឲ្យរអិលគ្រោះថ្នាក់ជាញឹកញាប់។
ក្រុមឃ្លាំមើលសិទ្ធិមនុស្ស រាយការណ៍ថា ការទទួលខុសត្រូវខាងសំណង ភាគច្រើនមិនបានធ្វើត្រឹមត្រូវសម្រាប់ជនរងគ្រោះនោះឡើយ៕