សកម្មជនការពារសិទ្ធិ និងសេរីភាពខ្មែរកម្ពុជាក្រោម នៅក្នុងប្រទេសកម្ពុជា បានឲ្យដឹងថា ពួកគាត់នឹងសុំស្នើក្រសួងធម្មការ និងសាសនាកម្ពុជា តែងតាំងព្រះសង្ឃចៅអធិការថ្មី ដែលមានដើមកំណើតខ្មែរកម្ពុជាក្រោម នៅវត្តសាមគ្គីរង្សី ដើម្បីបន្តវេនដឹកនាំ ក្រោយពីព្រះចៅអធិការ គឺព្រះសង្ឃ យឿង ស៊ិន បានសុគតទៅ កាលពីថ្ងៃទី២៨ ខែកញ្ញាថ្មីៗ នេះ ដោយរោគាពាធ។
ព្រះសង្ឃ យឿង ស៊ិន ដែលមានដើមកំណើតជាខ្មែរកម្ពុជាក្រោម បានដឹកនាំវត្តសាមគ្គីរង្សី នៅជាយទីក្រុងភ្នំពេញ តាំងពីឆ្នាំ១៩៩២ មក គឺជាវត្តរបស់ខ្មែរកម្ពុជាក្រោមតែមួយគត់ នៅក្នុងប្រទេសកម្ពុជា។ ព្រះអង្គក៏ជាប្រធានសមាគមព្រះសង្ឃខ្មែរកម្ពុជាក្រោម នៅក្នុងប្រទេសកម្ពុជាផងដែរ។
ប្រធានមិត្តសមាគមខ្មែរកម្ពុជាក្រោម នៅក្នុងប្រទេសកម្ពុជា លោក ថាច់ សាង បានមានប្រសាសន៍ប្រាប់វិទ្យុអាស៊ីសេរីនៅថ្ងៃទី៤ ខែតុលាថា លោកចង់រក្សាអត្តសញ្ញាណខ្មែរកម្ពុជាក្រោម នៅវត្តសាមគ្គីរង្សីនោះ។ លោកបានជួបប្រជុំជាច្រើនលើកថ្មីៗ នេះ ដើម្បីសម្រេចស្នើសុំ។
ប្រភពពីសកម្មជនការពារសិទ្ធិសេរីភាពខ្មែរកម្ពុជាក្រោម បានឲ្យដឹងថា នៅក្នុងវត្តសាមគ្គីរង្សី មានព្រះសង្ឃខ្មែរកម្ពុជាក្រោមចំនួនប្រមាណ ៣០អង្គ។
តំណាងរាស្ត្រគណបក្សប្រឆាំងសមរង្ស៊ី លោក យន្ត ថារូ និងជាប្រធានមជ្ឈមណ្ឌលវប្បធម៌ខ្មែរកម្ពុជាក្រោម នៅក្នុងប្រទេសកម្ពុជា បានមានប្រសាសន៍ថា លោកគាំទ្រសំណើនេះ។
រដ្ឋលេខាធិការក្រសួងធម្មការ និងសាសនា លោក ឈន អៀម បានមានប្រសាសន៍ថា សំណើពីមិត្តសមាគមខ្មែរកម្ពុជាក្រោមនោះ គឺថ្នាក់លើជាអ្នកសម្រេច។
ប្រភពមន្ត្រីជាន់ខ្ពស់ក្រសួងធម្មការ និងសាសនា បានឲ្យដឹងថា បច្ចុប្បន្នមានវត្តព្រះពុទ្ធសាសនាចំនួន ៤.៣៩២វត្ត នៅក្នុងប្រទេសកម្ពុជា និងមានព្រះសង្ឃចំនួន ៥៦.០០០អង្គ។ ក្រៅពីនេះ កម្ពុជាមានព្រះវិហារកាតូលិក ព្រះវិហារចាម ព្រះវិហារចិន និងព្រះវិហារវៀតណាមជាច្រើនទៀត៕
[ Slideshows: ភ្ជុំបិណ្ឌនៅវត្តសាមគ្គីរង្សីOpens in new window ]