នាយកកម្មវិធីស្បៀងអាហារពិភពលោកប្រចាំកម្ពុជាលោក Thomas Keusters បានមានប្រសាសន៍បញ្ជាក់ថា ការផ្អាកស្បៀងនោះ គឺបណ្តាលមកពីតម្លៃអង្ករឡើងថ្លៃតែម្តង ។
សកម្មភាពផ្អាកស្បៀងទាក់ទងនឹងអាហារពេលព្រឹកដល់កុមារក្រីក្រកម្ពុជានោះបានធ្វើឲ្យមានការព្រួយបារម្ភដល់អ្នកគ្រប់គ្រងអង្គការកុមារទាំងនោះ ។
នាយកប្រតិបត្តិនៃអង្គការសមាគមកុមារកម្ពុជាប្រឆាំងទុរ្ភិក្សនិងអំពើហិង្សា ដែលរងការផ្អាកជំនួយ លោក ភោគ ប៊ុនរើឿន បានមានប្រសាសន៍ថា លោកបារម្ភខ្លាចក្រែងសកម្មភាពនោះ នឹងធ្វើឲ្យមានវិបត្តិដល់កុមារនិងគ្រួសាររបស់គេដោយសារតែមានបទពិសោធន៍ដូចគ្នានេះ បានកើតឡើងម្តងរួចទៅហើយ កាលពីឆ្នាំទៅ ៖ «វាប៉ះពាល់ព្រោះការងាររបស់ខ្ញុំកុមារជិត១ពាន់នាក់ ដែលនៅក្នុងការទទួលរបស់ស្បៀងអាហារពិភពលោកហ្នឹង ។ ហើយក្នុងខែ៥ នេះ យើងមានការព្រួយបារម្ភ កាលពីឆ្នាំទៅមិញប្រហែលខ្ទង់ខែ៤ ខែ៥ហ្នឹងដែរ ការផ្ដាច់ស្បៀងហ្នឹងធ្វើឲ្យជាពិសេសសកុមារ គ្រួសារដែលផ្ទុកមេរោគអេដស៍ហ្នឹងគាត់មានបញ្ហា ។ ហើយគាត់ខ្វះ ធ្វើឲ្យគាត់ទៅរកចំណូល ពេលទៅរកចំណូល ការព្យាបាលជំងឺរបស់គាត់អត់ទៀងទាត់ កាលណាអត់ទៀងទាត់ធ្វើឲ្យមានបញ្ហាជំងឺហ្នឹងវារើឡើងវិញ ធ្វើឲ្យគាត់មានអាយុខ្លី ឆាប់ស្លាប់ ។ ហើយកុមារមួយចំនួនទៀតបោះបង់ចោលការសិក្សា ដោយសារតែខ្វះស្បៀងអាហារគេមិនអាចទៅរៀនបាន គេអត់មានហូបអាហារ គេបោះបង់ការសិក្សាដោយគេទៅរកចំណូលនៅទីប្រជុំជន ដែលគេត្រូវចាកចោលភូមិស្រុកមកទីក្រុងភ្នំពេញ» ៕