មេបញ្ជាការកងពលអន្តរាគមន៍លេខ១២ លោកឧត្ដមសេនីយ៍ទោ ស្រី ឌឹក បានមានប្រសាសន៍ កាលពីរសៀលថ្ងៃចន្ទ ទី១៨ សីហា ថា កងទ័ពទាំងសងខាងកំពុងរង់ចាំស្ដាប់លទ្ធផលនៃកិច្ចចរចារវាងមន្រ្តីរដ្ឋាភិបាលនៃប្រទេសទាំងពីរ នៅឯទីក្រុងហួហ៊ីន ប្រទេសថៃ ហើយបើមានការបញ្ជាឲ្យដកកងទ័ពទាំងសងខាង លោកនឹងដាក់បញ្ជានោះភ្លាម។
លោកឧត្ដមសេនីយ៍ទោ ស្រី ឌឹក បានមានប្រសាសន៍បន្ថែមថា តាមការជួបជជែកគ្នារួចមកហើយ កងទ័ពខ្មែរនិងថៃ នៅខ្សែត្រៀមជួរមុខទាំងអស់ នឹងត្រូវដកចេញដោយទុកឲ្យនៅម្ខាងៗ តែ២០នាក់ប៉ុណ្ណោះ ៖ «ចាំស្ដាប់ដំណឹងទាំងអស់គ្នាហ្នឹង។ ក្រោយកិច្ចប្រជុំហើយ គាត់និយាយថា ថ្ងៃ១៩ ថ្ងៃ២០ [សីហា]»។
ចំណែកមេបញ្ជាការកងកម្លាំងស៊ុរៈនារីរបស់ថៃ លោកឧត្ដមសេនីយ៍ត្រី កាណុនេត្រៈ ថៈវ៉េសនៈ បានមានប្រសាសន៍កាលពីថ្ងៃអាទិត្យ ខណៈដែលចូលមកត្រួតពិនិត្យកងទ័ពថៃថា កងទាហានថៃនៅខ្សែត្រៀមជួរមុខនឹងដកចេញជាលើកទី២ បន្ទាប់ពីលទ្ធផលនៃកិច្ចចរចាបានព្រមព្រៀងគ្នានោះ។
ទោះយ៉ាងណាកងទាហានថៃ ដែលនៅតំបន់ខ្សែត្រៀមជួរមុខ បាននិយាយថា គេនៅមិនទាន់ដឹងពីពេលវេលាដកចេញពីទឹកដីខ្មែរពិតប្រាកដនៅឡើយទេ ៖ «ទាល់តែមេធំប្រាប់មក អត់ស្គាល់ អត់ចេះ មិនដឹងម៉ោងប៉ុន្មានទេ»។
កាលពីថ្ងៃទី១៦ ខែសីហា កន្លងមក កងទាហានឈុតខ្មៅថៃ ប្រមាណជាង ៣៣០នាក់ និងកងទ័ពខ្មែរ ប្រហាក់ប្រហែលគ្នា បានដកចេញពីបរិវេណវត្តកែវសិក្ខាគិរីស្វារៈ ដោយបានបន្សល់ទុកតែទាហានថៃ ១០នាក់និងទាហានខ្មែរ ១០នាក់ប៉ុណ្ណោះ។
ព្រះគ្រូអនុគណសង្ឃ ប្រចាំស្រុកជាំក្សាន្ត ព្រះនាម ស្ងួន រដ្ឋា ដែលកំពុងគង់នៅក្នុងទីវត្ត បានមានព្រះថេរដីកាថា ការដកចេញពីទីវត្តរបស់កងទាហានទាំងសងខាង បានធ្វើឲ្យព្រះសង្ឃនិងពុទ្ធបរិស័ទ អស់ការព្រួយបារម្ភនិងភ័យខ្លាច ហើយព្រះអង្គចង់ឲ្យកងទាហានដែលនៅសេសសល់ដកចេញទាំងអស់។
ព្រះតេជគុណ ស្ងួន រដ្ឋា មានថេរដីកាដូច្នេះថា ៖ «ថ្វាយបង្គំព្រះ មានទាហាននៅអ៊ីចឹង ក៏មានការពិបាក ព្រោះត្រូវការស្ងប់ស្ងាត់។ ដល់ពេលមានការដកថយ សម្រួលកម្លាំងអ៊ីចឹងទៅ គឺមានការងាយស្រួលក្នុងការគោរពប្រតិបត្តិណាមួយ ញាតិញោមគាត់មកធ្វើបុណ្យ ធ្វើទាន ក៏ងាយស្រួល វាមិនជាបញ្ហា មិនសូវជាភ័យខ្លាច មិនរញ៉េរញ៉ៃ»។
កាលពីថ្ងៃចន្ទ ស្របពេលដែលមន្រ្តីរដ្ឋាភិបាលកម្ពុជា-ថៃ ជួបចរចាគ្នាស្ដីពីបញ្ហាជម្លោះព្រំដែនក្បែរប្រាសាទព្រះវិហារ កងទាហានថៃបានឲ្យដឹងថា នាយករដ្ឋមន្រ្តីថៃ លោក សាម៉ាក់ សុដារ៉ាវេទ បានមកជួបប្រជុំជាមួយមន្រ្តីយោធាថៃ នៅក្នុងបន្ទាយយោធា ជិតតំបន់ជម្លោះ ក៏ប៉ុន្តែ លោកមិនបានចូលមកពិនិត្យស្ថានការណ៍ជាក់ស្ដែងនៃការប្រឈមមុខដាក់គ្នារវាងយោធាខ្មែរ-ថៃនោះទេ៕