ក្រៅពីនេះ លោក ជូង ជូងី បានប្ដឹងទៅឧត្ដមក្រុមប្រឹក្សានៃអង្គចៅក្រម និងក្រសួងយុត្តិធម៌ ដើម្បីឲ្យជួយអន្តរាគមន៍ដោះស្រាយករណីរបស់លោក។
ប្រធានគណៈមេធាវីកម្ពុជា លោក ជីវ សុងហាក់ បានផ្ញើលិខិតមួយច្បាប់ ចុះថ្ងៃទី ៦ ខែធ្នូ ឆ្នាំ ២០១១ សុំឲ្យព្រះរាជអាជ្ញានៃតុលាការកណ្ដាលឲ្យបញ្ជូនសំណុំរឿង និងឯកសារពាក់ព័ន្ធករណីមេធាវី ជូង ជូងី នោះ មកគណៈមេធាវី ដើម្បីចាត់ការជាសមត្ថកិច្ច។
មេធាវីការពារក្ដីឲ្យសកម្មជនគណបក្ស សម រង្ស៊ី គឺលោក ជូង ជូងី កំពុងព្រួយបារម្ភអំពីសុវត្ថិភាពផ្ទាល់ខ្លួន បន្ទាប់ពីលោកបានទទួលដំណឹងក្រៅផ្លូវការថា តុលាការនៅខេត្តកណ្ដាលគ្រោងចោទប្រកាន់ ដើម្បីចាប់ខ្លួនលោក ក្រោមបទព្រហ្មទណ្ឌ ដោយសារតែលោកបានរំដោះសកម្មជនគណបក្ស សម រង្ស៊ី ម្នាក់ឈ្មោះ មាស ប៉េង ចេញពីពន្ធនាគារ នៅខេត្តកណ្ដាលកន្លងទៅនេះ។
ព្រះរាជអាជ្ញានៃតុលាការខេត្តកណ្ដាល លោក អ៊ុក គឹមសិទ្ធិ បានចេញដីកាកោះហៅលោក ជូង ជូងី ទៅសាកសួរម្ដងរួចទៅហើយ កាលពីថ្ងៃទី ២៥ ខែ វិច្ឆិកា ឆ្នាំ ២០១១ ពីបទរំដោះជនជាប់ចោទឈ្មោះ មាស ប៉េង ចេញពីពន្ធនាគារខេត្តកណ្ដាល។ ប៉ុន្តែ លោក ជូង ជូងី បានបដិសេធមិនទៅឆ្លើយបំភ្លឺទេ។ កូនក្ដីរបស់លោក ជូង ជូងី ឈ្មោះ មាស ប៉េង នោះ គឺជាជំទប់ទី២ ឃុំបន្ទាយដែក ស្រុកកៀនស្វាយ ខេត្តកណ្ដាល ខាងគណបក្ស សម រង្ស៊ី។
នៅឯការិយាល័យរបស់លោកក្នុងរាជធានីភ្នំពេញ នៅថ្ងៃទី ២៦ ខែធ្នូ ឆ្នាំ ២០១១ មេធាវីការពារក្ដីឲ្យលោក មាស ប៉េង គឺលោក ជូង ជូងី មានប្រសាសន៍ថា លោកមិនបានធ្វើអ្វីខុសដូចការចោទប្រកាន់នោះទេ៖ «រឿងនេះ បើធ្វើទៅតាមផ្លូវច្បាប់ ខ្ញុំត្រូវ ១០០%។ គឺចៅក្រម និងតំណាងអយ្យការឃុំខ្លួនកូនក្តីខ្ញុំ មិនបានសម្រេចមករករឿងខ្ញុំជាមេធាវី»។
លោកបានអះអាងថា ព្រះរាជអាជ្ញានៃតុលាការខេត្តកណ្ដាល បានចាប់ខ្លួនកូនក្ដីរបស់លោក ឈ្មោះ មាស ប៉េង ដោយគ្មានដីកា ដើម្បីសាកសួរក្រោមបទញុះញង់ឲ្យមានអំពើហិង្សា ជុំវិញការតវ៉ាទាមទារដី នៅស្រុកកៀនស្វាយ ខេត្តកណ្ដាលកន្លងមក។ ដូច្នេះហើយ បានជារូបលោកមានសិទ្ធិរំដោះលោក មាស ប៉េង ចេញពីពន្ធនាគារនោះ។
ពាក់ព័ន្ធនឹងសំណុំរឿងនេះ ប្រធានគណៈមេធាវីកម្ពុជា លោក ជីវ សុងហាក់ មានប្រសាសន៍ថា លោកបានបង្កើតក្រុមអធិការកិច្ចមួយ ដើម្បីស្រាវជ្រាវឲ្យដឹងថា តើលោក ជូង ជូងី បានបំពេញតួនាទីតាមវិជ្ជាជីវៈត្រឹមត្រូវដែរឬទេ ជុំវិញករណីការពារក្ដីឲ្យលោក មាស ប៉េង នោះ។
លោក ជីវ សុងហាក់៖ «តុលាការ (ខេត្តកណ្ដាល) គេធ្វើលិខិតមកមួយ ឆ្លើយមកថា គេមិនអាចផ្ញើសំណុំរឿងហ្នឹងមកបានទេ។ ពីព្រោះ អាហ្នឹងមិនមែនជារឿងវិជ្ជាជីវៈ ដែលត្រូវដាក់ពិន័យតាមច្បាប់លក្ខន្តិកៈមេធាវីទេ។ រឿងនេះ ជារឿងព្រហ្មទណ្ឌ។ បើគាត់ (លោក ជូង ជូងី) បំពេញភារកិច្ចគាត់ ក្នុងក្របខណ្ឌវិជ្ជាជីវៈជាមេធាវី គណៈមេធាវីមានតួនាទីការពារគាត់»។
មូលហេតុសំខាន់ ដែលនាំឲ្យតុលាការខេត្តកណ្ដាលប៉ុនប៉ងចោទប្រកាន់ និងចាប់ខ្លួនមេធាវី ជូង ជូងី គឺដោយសារតែកាលពីថ្ងៃទី ២៣ ខែកញ្ញា ឆ្នាំ ២០១១ កន្លងទៅនេះ សកម្មជនគណបក្ស សម រង្ស៊ី ឈ្មោះ មាស ប៉េង នៅស្រុកកៀនស្វាយ ខេត្តកណ្ដាល ត្រូវបានគេចាប់ខ្លួននាំមកតុលាការ ហើយសាកសួរដោយលោកចៅក្រមស៊ើបសួរ លឹម សុគន្ថា និងត្រូវនគរបាលឃុំខ្លួនលោក នៅពន្ធនាគារខេត្តកណ្ដាល ក្រោយការសួរចម្លើយចប់។ លោក ជូង ជូងី បានរំដោះលោក មាស ប៉េង ចេញពីពន្ធនាគារដោយសម្អាងថា តុលាការខេត្តកណ្ដាលចាប់ និងឃុំខ្លួនកូនក្ដីរបស់លោកដោយគ្មានដីកា។
លោក មាស ប៉េង ត្រូវបានតុលាការខេត្តកណ្ដាលចោទប្រកាន់ពីបទញុះញង់ឲ្យមានអំពើហិង្សានៅក្នុងជម្លោះដីមួយកន្លែងទំហំជាង ៤៣ ហិកតាររវាងអតីតអភិបាលរងខេត្តកណ្ដាល លោក ប្រាក់ សាវុធ ជាមួយប្រជាពលរដ្ឋចំនួន ១១៥ គ្រួសារ នៅស្រុកកៀនស្វាយ ខេត្តកណ្ដាល។
តំណាងរាស្ត្រ គណបក្ស សម រង្ស៊ី នៅខេត្តកណ្ដាល លោក ចាន់ ចេង ត្រូវបានសភាជាតិដកអភ័យឯកសិទ្ធិជាតំណាងរាស្ត្រ នៅថ្ងៃទី ២០ ខែធ្នូកន្លងទៅនេះ តាមសំណើរបស់ក្រសួងយុត្តិធម៌ ដើម្បីឲ្យតុលាការខេត្តកណ្ដាលចោទប្រកាន់ និងចាប់ខ្លួនក្រោមបទចូលរួមរំដោះលោក មាស ប៉េង ចេញពីពន្ធនាគារខេត្តកណ្ដាលនោះ។
លោក ចាន់ ចេង បានរត់គេចខ្លួនទៅក្រៅប្រទេសកម្ពុជា បន្ទាប់ពីសភាដកអភ័យឯកសិទ្ធិ៕