ភាគីដើមបណ្ដឹងនៅក្នុងឱកាសនោះមានលោក រី ម៉ាត់ ដែលជាហាកឹម ឬអ្នកគ្រប់គ្រងសាសនាឥស្លាមនៅភូមិកំពង់យោល ឃុំគោកពោធិ៍ ស្រុកបូរីជលសារ និងមានលោក ឯក កន់តារា ជាមេធាវីដើមបណ្តឹង លោក មួង សុគន្ធ ជាមេធាវីចុងចោទ។
ពាក្យបណ្តឹងរបស់ដើមចោទគឺលោក រី ម៉ាត់ ទាក់ទងជាមួយការផ្សាយព័ត៌មានមិនពិតនិងបំផ្លាញទ្រព្យសម្បត្តិសាធារណៈដោយមានចុងចោទសរុបទាំងអស់ចំនួន៥នាក់ រួមមានលោក សុខ សេរី អ្នកយកព័ត៌មានវិទ្យុអាស៊ីសេរីម្នាក់ផង។ ចៅក្រមសវនាការមានលោក ចេង ប៊ុនលី និងលោក សាយ ណូរ៉ា ជាព្រះរាជអាជ្ញានៃសវនាការ។
ព្រះរាជអាជ្ញាសវនាការគឺលោក សាយ ណូរ៉ា បានចោទប្រកាន់មនុស្ស២នាក់ គឺលោក នីសាន់ និងលោក ស៊ឹប សេន ត្រូវចោទពីបទបំផ្លាញទ្រព្យសម្បត្តិសាធារណៈនិងផ្សាយព័ត៌មានមិនពិត។ ចំណែកមនុស្ស៣នាក់ទៀត គឺលោក សុខ សេរី លោកស្រី ខឹម សារ៉ុម លោក ជៀប ចៀវ ត្រូវចោទប្រកាន់ពីបទផ្សាយព័ត៌មានមិនពិតតែមួយមុខប៉ុណ្ណោះ។
ក្រោយពីមានការសាកសួរអស់រយៈពេលមួយថ្ងៃមក នៅរសៀលថ្ងៃទី៩ កុម្ភៈ ចៅក្រមសវនាការលោក ចេង ប៊ុនលី ប្រកាសឲ្យដឹងថា ភាគីដើមបណ្តឹងបានទាមទារសំណងប្រាក់ចំនួន១០លានរៀលពីឈ្មោះ នីសាន់ និងលោក ស៊ឹប សេន និងសូមឲ្យផ្តន្ទាទោសតាមច្បាប់ ហើយសាលក្រមទាក់ទងពាក្យបណ្តឹងនេះនឹងប្រកាសនៅថ្ងៃទី១៩ កុម្ភៈ ខាងមុខ។
សវនាការជំនុំជម្រះក្ដីលើអ្នកកាសែតនិងសកម្មជនសិទ្ធិមនុស្សនៅខេត្តតាកែវនេះ មានអ្នកចូលរួមប្រហែល៣០នាក់ ដែលមានមន្រ្តីតំណាងការិយាល័យអង្គការសហប្រជាជាតិទទួលបន្ទុកការងារសិទ្ធិមនុស្សនៅកម្ពុជា មានអ្នកកាសែតជាតិនិងអន្តរជាតិ និងបុគ្គលិកអង្គការសិទ្ធិមនុស្សសរុបប្រមាណ៣០នាក់បានចូលរួមស្តាប់និងសង្កេតការណ៍៕