ទាហានខ្មែរមួយរូបដែលកំពុងប៉ះប្រយុទ្ធជាមួយទាហានថៃនៅតំបន់វាលឥន្រ្ទីបានឲ្យដឹងថា ការប៉ះប្រយុទ្ធគ្នាបានចាប់ផ្តើមឡើងកាលពីម៉ោងប្រមាណ២និង៥នាទីរសៀលថ្ងៃសុក្រ ដោយមានការប៉ះប្រយុទ្ធជាច្រើនកន្លែងចាប់ពីចំណុចចង្កេះភ្នំទ្រព្យ វាលឥន្រ្តី រហូតដល់ចំណុចសំបុកឃ្មុំនៅទល់មុខប្រាសាទព្រះវិហារ។
ទាហានដដែលបាននិយាយថា គេឃើញទាហានថៃបានរងរបួសនិងស្លាប់ជាច្រើនបន្ទាប់ពីមានការប្រយុទ្ធគ្នាជាង៤០នាទី ហើយទាហានខ្មែរបានដណ្តើមកាន់កាប់បន្ទាយ២០ខ្នងរបស់ទាហានថៃដែលនៅចម្ងាយប្រមាណ២គីឡូម៉ែត្រភាគខាងលិចវាលឥន្ទ្រី។
ទាហានដដែលបានបញ្ជាក់ថា ៖ «វាលើកទង់ជ័យសទៀត ម៉ោង២:៤០នាទី។ ទាំងងាប់ទាំងរបួសច្រើនជាងមុនឆ្ងាយណាស់ គុណជាពីរ... វាកំពុងអូសសាកសពឡើងយន្តហោះ។ យកបានទីតាំងវាហើយ ឥឡូវឈរជើងនៅទីតាំងវា ដល់បន្ទាយវាអាផ្ទះ២០ខ្នង»។
ចំណែកនៅឯមុខប្រាសាទព្រះវិហារ មន្ត្រីប៉ូលិសខ្មែរបានអះអាងថា ផ្ទះនិងផ្សាររបស់ប្រជាពលរដ្ឋខ្មែរជាច្រើននៅភូមិខាងក្រោមប្រាសាទបានឆេះដោយសារទាហានថៃបានបាញ់គ្រាប់កាំភ្លើងធំដាក់ជាច្រើនគ្រាប់។
មន្ត្រីប៉ូលិសដដែលបានមានប្រសាសន៍ថា ៖ «វ៉ៃឡើងឆេះផ្សារអស់ហើយ ថៃបាញ់ចូលមក ថៃផ្លោងគ្រាប់៦០មីលីម៉ែត្រ។ ខ្ញុំរត់គេចថ្លោះជើងអស់ អា១២បាញ់ដូចម្រាមដៃអ៊ីចឹង»។
ការប៉ះប្រយុទ្ធគ្នារវាងទាហានខ្មែរថៃជាលើកទីពីរនៅថ្ងៃសុក្របានកើតឡើងប្រមាណជាពីរម៉ោងក្រោយពេលដែលមេបញ្ជាការយោធាខ្មែរថៃគ្រប់គ្រងតំបន់ជម្លោះបានជួបជជែកគ្នានៅជិតទីវត្តកែវសិក្ខាគិរីស្វៈរៈដើម្បីស្វែងរកការបន្ធូរបន្ថយភាពតានតឹងផ្នែកយោធាកាលពីម៉ោង១១រហូតដល់ម៉ោង១២ព្រឹក។
ទោះយ៉ាងណាមេបញ្ជាការយោធាខ្មែរគ្រប់គ្រងតំបន់ជម្លោះ លោកឧត្តមសេនីយ៍ទោ ស្រី ឌឹក មិនបានអធិប្បាយអំពីហេតុការណ៍នោះទេ ដោយលោកគ្រាន់តែមានប្រសាសន៍ថា លោកព្យាយាមរកដំណោះស្រាយបញ្ហានោះឲ្យប្រសើរ ៖ «យើងចេះតែសម្រួលៗគ្នាទៅណា៎ អត់អីទេ ធម្មតាៗ»។
កាលពីវេលាម៉ោងប្រមាណ៧:១០នាទីព្រឹក ទាហានខ្មែរនិងទាហានប៉ារ៉ាថៃបានប៉ះប្រយុទ្ធគ្នាម្តងមកហើយនៅវាលឥន្ទ្រីដែលតាមប្រភពទាហានខ្មែរអះអាងមិនផ្លូវការឲ្យដឹងថា ទាហានថៃ២នាក់ស្លាប់និង៤នាក់រងរបួស។
សូមបញ្ជាក់ថា នេះជាការប៉ះប្រយុទ្ធគ្នារវាងទាហានខ្មែរនិងថៃជាលើកទីបីហើយនៅតំបន់ជម្លោះជិតប្រាសាទព្រះវិហារ ដោយកាលពីថ្ងៃទី៣ ខែតុលា ឆ្នាំ២០០៨ ទាហានថៃឈុតខ្មៅបានប៉ះប្រយុទ្ធជាមួយទាហានខ្មែរមួយក្រុមនៅវាលឥន្ទ្រីបណ្តាលឲ្យទាហានខ្មែរម្នាក់បានរងរបួស ហើយកាលពីថ្ងៃទី១៥ ខែតុលា ឆ្នាំ២០០៨ បានប៉ះប្រយុទ្ធគ្នានៅវាលឥន្ទ្រី ភ្នំទ្រព្យ និងមុខប្រាសាទព្រះវិហារ បណ្តាលឲ្យទាហានខ្មែរ៣នាក់ស្លាប់ ២នាក់រងរបួស និងទាហានថៃ៣នាក់ស្លាប់និង៥នាក់រងរបួស។
ប្រតិកម្មប្រទេសថៃជុំវិញការប៉ះប្រយុទ្ធគ្នានៅក្បែរប្រាសាទព្រះវិហារ
អ្នកនាំពាក្យក្រសួងការបរទេសថៃ ឈ្មោះ ថារីត ឆារុងវ៉ាត់ ថ្លែងប្រាប់ទីភ្នាក់ងារព័ត៌មានអាអេហ្វប៉េផ្សាយបន្តនៅថ្ងៃសុក្រនេះថា ពិតជាមានការប៉ះអាវុធប្រយុទ្ធគ្នារវាងកងទ័ពថៃនិងខ្មែរនៅតំបន់ព្រំដែនជម្លោះនោះមែន។
អ្នកនាំពាក្យក្រសួងការបរទេសថៃបញ្ជាក់ថា ប៉ុន្តែការប៉ះអាវុធបានបញ្ឈប់ហើយគឺគ្មានការរបួសឬស្លាប់ទាហានថៃណាម្នាក់ទេ។
ចំណែកចៅហ្វាយខេត្តស៊ីសាកេត ខេត្តថៃដែលជាប់តំបន់ជម្លោះនោះ គឺលោក ស៊ីនី ជីតាកា ស៊ិម និយាយថា ការប៉ះអាវុធប្រយុទ្ធគ្នានោះបានផ្តើមឡើងនាម៉ោង៧និង១០នាទីព្រឹកម៉ោងនៅតំបន់នោះ ផ្ទុះឡើងក្នុងគ្រាដែលកងទ័ពខ្មែរបានចូលទៅពិនិត្យមើលទីចំណុចដែលកងទ័ពថៃម្នាក់ជាន់មីនរបួសកាលពីម្សិលមិញ។
ចៅហ្វាយខេត្តថៃរូបនោះចោទថា កងទ័ពខ្មែរជាអ្នកបង្កការផ្ទុះអាវុធនោះមុន និងថាកងទ័ពថៃតបតវិញក្នុងការបង្ហាញថាដែនដីនោះជាកម្មសិទ្ធិរបស់ថៃ។
រីឯអ្នកនាំពាក្យកងទ័ពថៃ លោកស្រី ម៉ៃ ស៊ីរីយ៉ា ឃីនស៊ីរីគុល ថ្លែងប្រាប់ទីភ្នាក់ងារព័ត៌មានអេភីផ្សាយនៅថ្ងៃនេះឲ្យដឹងថា ការប៉ះអាវុធប្រយុទ្ធគ្នានោះបានបញ្ឈប់ហើយ ប៉ុន្តែអ្នកនាំពាក្យកងទ័ពថៃថ្លែងចោទថា ភាគីកម្ពុជាជាអ្នកផ្តើមការផ្ទុះអាវុធ ប៉ុន្តែថា លោកស្រីពុំមានព័ត៌មានលម្អិតអំពីការប៉ះអាវុធប្រយុទ្ធគ្នាជាលើកទីពីរនៅថ្ងៃសុក្រដដែលនេះទេ៕