ខណៈពេលវេលានៃកិច្ចប្រជុំរកដំណោះស្រាយព្រំដែននៃប្រទេសទាំងពីរខិតជិតចូលមកដល់ ឧត្ដមសេនីយ៍មេបញ្ជាការយោធាជាន់ខ្ពស់ថៃ លោក ស៊ុងគិទិ ចាហ្គាបាតតារ៉ា (Songkitti Jaggabatara) បានបញ្ជាក់នៅថ្ងៃអង្គារ ទី៥ ខែមេសានេះម្ដងទៀត អំពីជំហរខាងគណៈកម្មាធិការព្រំដែនទូទៅកម្ពុជា-ថៃ ថា នឹងមិនទៅចូលរួមនៅប្រទេសឥណ្ឌូណេស៊ីឡើយ។
ឧត្ដមសេនីយ៍រូបនេះបានផ្ដល់ហេតុផលថា ភាគីថៃ មិនព្រមទៅចូលរួមកិច្ចប្រជុំនៃគណៈកម្មាធិការព្រំដែនទូទៅកម្ពុជា-ថៃ ពីព្រោះថៃ និងកម្ពុជា បានចុះហត្ថលេខាលើអនុស្សរណៈនៃការយោគយល់គ្នាកាលពីឆ្នាំ១៩៩៥ ដែលបានព្រមព្រៀងគ្នាថា នឹងចាត់ឲ្យមានកិច្ចប្រជុំរៀងរាល់ឆ្នាំដោយរដ្ឋមន្ត្រីក្រសួងការពារជាតិនៃប្រទេសទាំងពីរ ហើយក៏បានព្រមព្រៀងថា នឹងផ្លាស់វេនគ្នាធ្វើជាម្ចាស់ផ្ទះមួយឆ្នាំម្ដងទៀតផង។
លោកឧត្ដមសេនីយ៍ ស៊ុងគិទិ បន្តថា ថៃក៏នឹងមិនអនុញ្ញាតឲ្យមានវត្តមានរបស់អ្នកសង្កេតការណ៍ឥណ្ឌូណេស៊ី នៅតំបន់ជម្លោះព្រំដែនកម្ពុជា-ថៃ នោះដែរ។ ចំណែកខាងភាគីកម្ពុជាវិញ នឹងទៅចូលរួមក្នុងកិច្ចប្រជុំទាំងពីរនោះ តាមការកោះអញ្ជើញរបស់ប្រទេសឥណ្ឌូណេស៊ី។
សេចក្ដីប្រកាសព័ត៌មានរបស់ក្រសួងការបរទេសខ្មែរនៅថ្ងៃទី៥ ខែមេសា បានឲ្យដឹងថា គណៈប្រតិភូកម្ពុជា ដែលដឹកនាំដោយរដ្ឋមន្ត្រីការពារជាតិ លោក ទៀ បាញ់ និងលោក វ៉ា គឹមហុង ទេសរដ្ឋមន្ត្រី រដ្ឋមន្ត្រីទទួលបន្ទុកការងារពិសេស និងជាប្រធានគណៈកម្មការចម្រុះព្រំដែនកម្ពុជា-ថៃ នឹងទៅចូលរួមក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ និងគណៈកម្មការចម្រុះព្រំដែនកម្ពុជា-ថៃ។
ទាក់ទងនឹងកិច្ចប្រជុំ២ថ្ងៃនៅឥណ្ឌូណេស៊ី នៅថ្ងៃទី៧-៨ ខែមេសានេះ លោក កុយ គួង មន្ត្រីនាំពាក្យក្រសួងការបរទេសខ្មែរ បានមានប្រសាសន៍បញ្ជាក់ពីជំហរកម្ពុជាយ៉ាងដូច្នេះ ៖ «ជំហរកម្ពុជាយើងគឺបានបញ្ជាក់ច្បាស់ហើយ គឺយើងព្រមទៅប្រជុំ កិច្ចប្រជុំទាំងឡាយណាដែលស្នើសុំដោយឥណ្ឌូណេស៊ី។ កន្លងមកមានថ្នាក់រដ្ឋមន្ត្រីទាំងបី កម្ពុជា ឥណ្ឌូណេស៊ី និងថៃ មួយកិច្ចប្រជុំ JBC ពីរកិច្ចប្រជុំ GBC បី គឺទាំងបីស្នើឡើងដោយឥណ្ឌូណេស៊ីហ្នឹង គឺយើងព្រម រីឯការព្រម ឬមិនព្រមរបស់ថៃហ្នឹង គឺជារឿងរបស់ថៃ»។
សូមបញ្ជាក់ជូនផងដែរថា ការសម្រួលចាត់ចែងឲ្យមានកិច្ចប្រជុំរវាងភាគីកម្ពុជា-ថៃ នៅក្នុងប្រទេសឥណ្ឌូណេស៊ី និងឲ្យវត្តមានអ្នកសង្កេតការណ៍ឥណ្ឌូណេស៊ី នៅតំបន់ជម្លោះជិតប្រាសាទព្រះវិហារនោះ គឺធ្វើឡើងបន្ទាប់ពីមានកិច្ចប្រជុំបន្ទាន់មួយនៅឯក្រុមប្រឹក្សាសន្តិសុខអង្គការសហប្រជាជាតិ នាបុរីញូវយ៉ក សហរដ្ឋអាមេរិក កាលពីថ្ងៃ១៤ កុម្ភៈ និងកិច្ចប្រជុំអាស៊ានកាលពីថ្ងៃទី២២ កុម្ភៈ ស្ដីពីការរកដំណោះស្រាយបញ្ចប់វិបត្តិព្រំដែនកម្ពុជា-ថៃ៕