មន្ត្រីគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា មានមនុស្សចំនួន ៥៦នាក់ស្លាប់ និង៥៣នាក់ទៀតរងរបួស ព្រមទាំងមានគោក្របីចំនួន ៤៣ក្បាលស្លាប់ និងមានផ្ទះចំនួន ២ខ្នង ទៀតឆេះ ដោយសាររន្ទះបាញ់ ក្នុងរយៈពេល ៥ខែ ដើមឆ្នាំ នៅឆ្នាំ២០១១ នេះ។
លោក កែវ វី អនុប្រធាននៃគណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់នៅថ្ងៃទី២២ ឧសភាថា បើគិតក្នុងរយៈពេល ៥ខែ ដូចគ្នា ប្រៀបធៀបឆ្នាំមុន ចំនួនអ្នកស្លាប់ដោយសាររន្ទះបាញ់មានតិចជាងនេះ គឺត្រឹម ៣៦នាក់ស្លាប់ប៉ុណ្ណោះ នៅក្នុងចំនួនសរុបនៃអ្នកស្លាប់ដោយសាររន្ទះបាញ់ទាំងអស់ចំនួន ១១៤នាក់ ក្នុងឆ្នាំ២០១០។
លោក កែវ វី បានពន្យល់អំពីការកើនឡើងនៃចំនួនអ្នកស្លាប់ដោយសាររន្ទះបាញ់ដូច្នេះ ៖ "កើនឡើងនេះ ដោយសារតែភ្លៀងកក់ខែ កាលពីឆ្នាំ២០១០ វាកើតឡើងដល់តែពាក់កណ្ដាលខែ៤។ កាលណាភ្លៀងកក់ខែ មានខ្យល់បោកបក់ណឹងហើយ ដែលបណ្ដាលឲ្យមានរន្ទះ ប៉ុន្តែនៅឆ្នាំនេះ ២០១១ នេះ ភ្លៀងកក់ខែមានតាំងពីពាក់កណ្ដាលខែ២ មកម្ល៉េះ"។
ខេត្តពោធិ៍សាត់ កំពង់ចាម និងខេត្តបាត់ដំបង ត្រូវគេរាយការណ៍ថា មានអ្នករងគ្រោះដោយសារបាតុភូតរន្ទះបាញ់ច្រើនជាងគេនៅឆ្នាំនេះ។
ប្រធាននាយកដ្ឋានឧតុនិយម លោក អ៊ុម រីណា ថ្លែងថា បាតុភូតធម្មជាតិមិនត្រឹមតែរន្ទះទេ សូម្បីតែខ្យល់ព្យុះ និងបាតុភូតផ្សេងទៀត បានកើនឡើងឥទ្ធិពលរបស់វា ដោយសារតែបញ្ហាបម្រែបម្រួលអាកាសធាតុ ៖ "យើងចង់ផ្ដោតទៅលើការកើនឡើងនៃសីតុណ្ហភាពនៅលើផ្ទៃដី ពីព្រោះថា នៅពេលដែលឆ្លងរដូវ ពីរដូវប្រាំងចូលរដូវវស្សា ឲ្យតែពេលមានភ្លៀង មានផ្គររន្ទះ នៅលាយឡំជាមួយ ហើយមានឥទ្ធិពលខ្លាំង ប៉ុន្តែនៅពេលដែលរដូវវស្សាចូលមកដល់ រន្ទះកើតមានជារឿយៗ ប៉ុន្តែមិនសូវខ្លាំង"។
មកដល់ពេលនេះ គេមិនទាន់មានឧបករណ៍អ្វីមួយដើម្បីការពាររន្ទះនោះទេ។ អ្នកជំនាញផ្នែកឧតុនិយមដដែលបានឲ្យយោបល់ថា ដើម្បីការពារគ្រោះថ្នាក់ចៃដន្យ ដោយសាររន្ទះបាញ់ កសិករខ្មែរត្រូវតែរួសរាន់ប្រញាប់រកផ្ទះជ្រកមុនភ្លៀង បើសិនជាគាត់បានចេញទៅវាល។ ប៉ុន្តែក្នុងករណីគាត់កំពុងធ្វើការ ស្រាប់តែមានភ្លៀងមកដល់ រកកន្លែងជ្រកមិនបាន អ្នកជំនាញរូបនេះបានឲ្យយោបល់ថា គេគួរតែក្រាបនៅលើភ្លឺស្រែ កុំឲ្យឈរខ្ពស់ជាងទឹក។ មួយវិញទៀតនោះ នៅពេលភ្លៀងធ្លាក់ អ្នកជំនាញដដែលបានណែនាំមិនឲ្យជ្រកនៅក្រោមដើមឈើធំឡើយ មិនឲ្យកាន់ឧបករណ៍ធ្វើអំពីដែក មិនឲ្យប្រើទូរស័ព្ទដៃ មិនឲ្យបើកវិទ្យុ និងទូរទស្សន៍ឡើយ ហើយត្រូវស្ថិតនៅឲ្យឆ្ងាយទីសារធាតុដែលអាចស្រូបអគ្គិសនីបាន៕