ក្រុមប្រជាសហគមន៍ដែលអភិរក្សរមណីយដ្ឋានទឹកជ្រោះកាចាញឲ្យដឹងថា ឆ្នាំនេះទីតាំងនេះមានការរៀបចំកែលម្អកន្លែងកម្សាន្ត មានបង្កើតបន្ថែមស្ពានយោល ការប្រគំតន្ត្រីសិល្បៈរបាំជនជាតិដើម បង្កើតខ្ចុះអង្គុយសម្រាកកាយហូបអាហារនៅក្បែរទឹកជ្រោះជាដើម។
តំណាងសហគមន៍លោក បាវ ពា មានប្រសាសន៍ថា នេះជាការចាប់ផ្តើមអភិវឌ្ឍកែលម្អការទាក់ទាញអ្នកទេសចរតាមរយៈការបញ្ជូលសិល្បៈវប្បធម៌ប្រពៃណីជនជាតិដើមក្នុងវិស័យទេសចរណ៍...។
ចំណែកយុវនារីជនជាតិគ្រឹង អាយុ១៨ឆ្នាំ ឈ្មោះ កាន់ថាង សុភឿន រៀបរាប់ដែរថា នាងស្លៀកពាក់និងតុបតែងខ្លួនជាសិល្បៈការិនីរបាំជនជាតិដើមជាមួយនឹងយុវនារីជាច្រើននាក់ដើម្បីបំផុសភាពស្រស់បំព្រងនៃតំបន់រមណីយដ្ឋាន និងរំឭកឡើងវិញពីវប្បធម៌សិល្បៈជនជាតិភាគតិចដែលកម្របានឃើញដើម្បីរួមចំណែកការកម្សាន្តរបស់អ្នកទេសចរឆ្នាំនេះ។
យុវនារី កាន់ថាង សុភឿន បានឲ្យដឹងដូច្នេះ ៖ «យើងមកសម្ដែងដើម្បីទាក់ទាញភ្ញៀវ គាត់ឃើញយើងសប្បាយគាត់មកបានច្រើនដែរ»។
អ្នកទេសចរមកពីខេត្តបាត់ដំបង លោក ស៊ី ងួន មានប្រសាសន៍ថា នេះជាលើកទីមួយហើយដែលលោកនិងក្រុមគ្រួសារបានមកកម្សាន្តនៅរមណីយដ្ឋានធម្មជាតិនៅខេត្តរតនគិរី ៖ «គ្រាន់តែឃើញជនជាតិខ្ញុំមានអារម្មណ៍រីករាយ សប្បាយចិត្ត ខ្ញុំមិនដែលមកទេពីមុន។ ខេត្តរតនគិរីអស្ចារ្យមែន»។
ចំណែកអ្នកទេសចរឈ្មោះ សុខ គឹមអៀង ដែលកំពុងមុជទឹកជ្រោះបញ្ជាក់ពីអារម្មណ៍លោកយ៉ាងដូច្នេះ ៖ «ក្រុមគ្រួសារខ្ញុំមានសុភមង្គលពេលដែលបានមកលេងឃើញទឹកជ្រោះស្អាតអ៊ីចឹង។ ខេត្តរតនគិរីគឺជាតំបន់ធម្មជាតិពិតៗ។ មកលេងទឹកនៅទីនេះត្រជាក់»។
មិនមែនតែអ្នកទេសចរទេដែលសម្ដែងការសប្បាយរីករាយ អ្នកលក់នំចំណីឈ្មោះ ចាន់ ស៊ីនុន មានប្រសាសន៍បញ្ជាក់ពីអារម្មណ៍សម្បាយរីករាយថា ៖ «មានអារម្មណ៍ថា ត្រេកអរដែលបានភ្ញៀវទេសចរមកច្រើនមកជួយទិញ»។
មេឃុំកាចាញ លោក ទន់ ពៅ មានប្រសាសន៍ដែរថា អាជ្ញាធរមូលដ្ឋានបានចូលរួមរៀងចំរមណីយដ្ឋានទឹកជ្រោះកាចាញជាថ្មី ទាំងការរក្សាសុវត្ថិភាព សណ្តាប់ធ្នាប់និងអនាម័យក្នុងឱកាសបុណ្យចូលឆ្នាំចិនវៀតណាម ហើយការរៀបចំបែបនេះនឹងបន្តរហូតដល់ឱកាសបុណ្យចូលឆ្នាំខ្មែរនៅពេលខាងមុខនេះទៀត។
នៅខេត្តរតនគិរី ក្រៅពីរមណីយដ្ឋានទឹកជ្រោះកាចាញ មានតំបន់ទឹកជ្រោះកាទៀង ចាអ៊ុង ទឹកជ្រោះតាត់តៃ ទឹកជ្រោះពីរជាន់ បឹងលង្គត់និងបឹងយក្ខលោមដ៏ល្បីល្បាញ។
សេចក្តីរាយការណ៍ពីប្រជាសហគមន៍នៅតាមរមណីយដ្ឋានទាំងនោះឲ្យដឹងថា មានអ្នកទេសចររាប់ពាន់នាក់ក្នុងមួយថ្ងៃៗបាននាំគ្នាមកកម្សាន្តក្នុងឱកាសបុណ្យចូលឆ្នាំចិន-វៀតណាម ចាប់ពីថ្ងៃទី១៣ ខែកុម្ភៈ រហូតមក៕