គ្រោះថ្នាក់ទាំងនោះ កើតឡើងដោយសារ ការបើកបរហួសល្បឿនកំណត់ ស្រវឹង និងការធ្វេសប្រហែស មិនគោរពតាមច្បាប់ចរាចរណ៍ជាដើម។
កម្លាំងនគរបាលចរាចរផ្លូវគោកបានត្រៀមរៀបចំសម្រាប់ពិធីបុណ្យចូលឆ្នាំថ្មី ដើម្បីបញ្ចៀសការកកស្ទះ និងធានាសុវត្ថិភាពចរាចរណ៍។
ចំណែកសេចក្ដីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ដែលមាន ១០ចំណុច បានដាស់តឿនអ្នកធ្វើដំណើរបង្កើនការប្រុងប្រយ័ត្នក្នុងពេលបើកបរ ត្រូវគោរពច្បាប់ចរាចរណ៍ និងចេះយោគយល់អធ្យាស្រ័យក្នុងពេលធ្វើដំណើរនៅក្នុងឱកាសបុណ្យចូលឆ្នាំថ្មីប្រពៃណីជាតិ។
នាយកការិយាល័យនគរបាលរាជធានីភ្នំពេញ លោក ហេង ចាន់ធារី។ លោកមានប្រសាសន៍ថា ចាប់ពីថ្ងៃ ទី១៣ ខែមេសា ដែលជាថ្ងៃទី១ នៃពិធីបុណ្យចូលឆ្នាំ ក្រុមសមត្ថកិច្ចនគរបាលនឹងចាប់ផ្ដើមការរឹតបន្តឹង ដើម្បីសម្រួលដល់ការធ្វើដំណើរ និងណែនាំច្បាប់ចរាចរណ៍ដល់អ្នកបើកបរ។
លោក ហេង ចាន់ធារី៖ «ណែនាំទៅអ្នកបើកបរ គឺទី១ ពេលដែលគាត់ធ្វើអាជីវកម្មដឹកប្រជាពលរដ្ឋដែលចេញទៅស្រុកកំណើតហ្នឹង ចៀសវាងកុំអោយហូបជាតិស្រវឹង រថយន្តរបស់គាត់មិនអោយដឹងសំពីងសំពោង ធ្វើម៉េចអោយធានាសុវត្ថិភាព ...កុំអោយលើសចំណុះ។ បើយើងវាយតម្លៃទៅលើប្រជាពលរដ្ឋយើង គាត់មានការគោរពច្បាប់ច្រើនណាស់ ប៉ុន្តែយើងអំពាវនាវបន្ថែមទៀតទៅអោយប្រជាពលរដ្ឋយើងចូលរួម»។
សេចក្ដីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកចុះហត្ថលេខាដោយរដ្ឋមន្ត្រីក្រសួងសាធារណការ និងដឹកជញ្ជូន លោក ត្រាំ អ៊ីវតឹក ធ្វើឡើងបន្ទាប់ពីបានរកឃើញថា គ្រោះថ្នាក់ចរាចរណ៍តែងតែកើតមានឡើង គឺដោយសារតែអ្នកបញ្ជាយានយន្ដខ្លះ បើកបរក្នុងល្បឿនលឿនហួសកំណត់។ បើកបរក្រោមឥទ្ធិពលជាតិស្រវឹង ធ្វេសប្រហែស មិនគោរពច្បាប់ចរាចរណ៍ មិនពាក់មួកសុវត្ថិភាព មិនប្រកាន់ខ្ជាប់តាមគន្លងផ្លូវ ឬចំណែកផ្លូវ ដែលតម្រូវសម្រាប់យានរបស់ខ្លួនជាដើម។
រីឯអ្នកថ្មើរជើងក៏មានការធ្វេសប្រហែស មិនបានដើរអែបចិញ្ចើមថ្នល់ និងនៅពេលឆ្លងកាត់ថ្នល់មិនបានប្រុងប្រយ័ត្ន។
ប្រធានកម្មវិធីសុវត្ថិភាពចរាចរណ៍ផ្លូវគោករបស់អង្គការជនពិការអន្តរជាតិបែលហ្សិក កញ្ញា សាន សុជាតា។ កញ្ញាមានប្រសាសន៍ថា មានការផ្សព្វផ្សាយពីការទប់ស្កាត់គ្រោះថ្នាក់ចរាចរណ៍គឺជាការរួមចំណែកដ៏ល្អមួយ ប៉ុន្តែការរឹតបន្តឹងការអនុវត្តច្បាប់គឺជាករណីចាំបាច់។
កញ្ញា សាន សុជាតា៖ «ប្រជាពលរដ្ឋតែកាលណាគាត់ធ្វើដំណើរច្រើនកំរិតនៃការប្រព្រឹត្តល្មើសនៃច្បាប់ហ្នឹង ប្រាកដជាមានច្រើន ហេតុនេះហើយការអប់រំផ្សព្វផ្សាយត្រូវគួបផ្សំនឹងការរឹតបន្តឹងការអនុវត្តច្បាប់ចរាចរណ៍»។
សេចក្ដីអំពាវនាវបានបញ្ជាក់ថា រយៈពេល ៥ថ្ងៃ ក្នុងពិធីបុណ្យចូលឆ្នាំក្នុងឆ្នាំ២០១១ កន្លងទៅនេះ មានមនុស្ស ៥៨នាក់ ស្លាប់ដោយគ្រោះថ្នាក់ចរាចរណ៍គឺជាមធ្យមមនុស្សជាង ១១នាក់ទៀត បានស្លាប់ក្នុងមួយថ្ងៃ និងមានអ្នករងរបួសធ្ងន់ចំនួន ២៧៩នាក់ ព្រមទាំងអ្នករបួសស្រាលចំនួន ២០៥នាក់ទៀត ដែលជាលទ្ធផលកើតឡើងពីគ្រោះថ្នាក់ចរាចរណ៍ចំនួន ២១១ករណី៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។