ប្រសាសន៍ប្រតិកម្មរបស់លោក វ៉ា គឹមហុង នេះ បានធ្វើឡើងបន្ទាប់ពីលោក ភីបផប ថុងឆៃ (Pipop Thongchai) ប្រធានគណបក្សសម្ព័ន្ធភាពដើម្បីប្រជាធិបតេយ្យនៃប្រទេសថៃ (PAD) បានអំពាវនាវកាលពីថ្ងៃច័ន្ទ សុំឲ្យលោកនាយករដ្ឋមន្ត្រីថៃ អាភីស៊ិត វេតឆាឈីវ៉ាក់ (Abhisit Vejjajiva) លុបចោលសន្ធិសញ្ញាថៃបារាំង ហើយបណ្តេញទាហានខ្មែរចេញពីទឹកដីរបស់ថៃ។
លោក វ៉ា គឹមហុង បានមានប្រសាសន៍បញ្ជាក់ប្រាប់ថា តាមផ្លូវច្បាប់ ប្រទេសថៃមិនអាចធ្វើអ្វីបានទេ ពីព្រោះមេដឹកនាំប្រទេសថៃកាលពីជំនាន់នោះបានទទួលស្គាល់សាលក្រមសម្រេចរបស់តុលាការអន្តរជាតិក្រុងឡាអេកាលពីឆ្នាំ១៩៦២ ហើយខ្មែរនិងថៃក៏បានចុះហត្ថលេខាលើកិច្ចព្រមព្រៀងអនុស្សរណៈ MOU ជាច្រើនកន្លងរួចមកហើយ។
លោក វ៉ា គឹមហុង បានបញ្ជាក់ថា ៖ «ឥឡូវរដ្ឋាភិបាលអាភីស៊ិតមិនទទួលស្គាល់ផែនទីឆ្នាំ១៩០៧? និយាយអ៊ីចឹងម៉េចនឹងកើត បើតុលាការក្រុងឡាអេគេកាត់រួចហើយ ហើយថៃទទួលស្គាល់ប៉ុន្មានឆ្នាំទៅហើយ រួចសាលក្រមឆ្នាំ១៩៦២ យោងយកផែនទីឆ្នាំ១៩០៧ ផែនទីដងរែកដែលថៃទទួលស្គាល់នៅឆ្នាំ១៩០៧... អ៊ីចឹងបានន័យថា អត់ទទួលស្គាល់សាលក្រមហើយ។ ជាសមាជិកអង្គការសហប្រជាជាតិ ថៃមិនអាចធ្វើអ៊ីចឹងកើតទេ! តាមលិខិតរបស់លោក ថារ៉ាត់ កូម៉ាន់ នៅឆ្នាំ១៩៦២ បន្ទាប់ពីសាលក្រមតុលាការចេញមក លោកទទួលស្គាល់។ ថៃត្រូវទទួលយកសាលក្រមរបស់តុលាការស្ដីពីប្រាសាទព្រះវិហារ។ ខ្ញុំមិនដឹងថា គាត់ធ្វើម៉េចទេលើផ្លូវច្បាប់ វាពិបាកណាស់ ព្រោះគាត់ទទួលស្គាល់កិច្ចការហ្នឹងទៅហើយ។ រួចមួយទៀត យើងធ្វើកិច្ចការព្រំដែនជាមួយគ្នារហូតដល់ប្រើ MOU អនុស្សរណៈឆ្នាំ២០០៣ ក៏យើងនិយាយច្បាស់ យោងច្បាស់ទៅលើផែនទីខ្នាត១:២០០ពាន់របស់គណៈកម្មការបារាំងសៀម កំណត់ព្រំដែនរវាងកម្ពុជានិងសៀម»។
លោក វ៉ា គឹមហុង បានមានប្រសាសន៍បន្ថែមថា ប្រទេសថៃបានទទួលផលប្រយោជន៍ជាច្រើនពីសន្ធិសញ្ញាបារាំងសៀមឆ្នាំ១៩០៧ អស់ជាងមួយសតវត្សរ៍រួចមកហើយ ឥឡូវបែរជាថាមិនចង់ទទួលស្គាល់ទៅវិញ។
លោក វ៉ា គឹមហុង បានថ្លែងថា ៖ «ធ្វើមិនកើតទេ ខ្ញុំគិតថាគាត់ធ្វើមិនកើតទេ ព្រោះផ្លូវច្បាប់គាត់មានគ្មានធ្វើអីកើត? ច្បាប់អន្តរជាតិថាអ៊ីចឹងហើយ រួចមួយទៀតវាបញ្ជាក់តាំងពីសាលក្រមឆ្នាំ១៩៦២ និយាយច្បាស់ទៅហើយ។ ឥឡូវសូមអ៊ីចេះ បើលោកថាអ៊ីចឹង សួរថា លោកមានព្រំដែនជាមួយខ្មែរទេ? ហើយលោកទាមទារថា លុបចោលមិនទទួលស្គាល់ផែនទី១:២០០ពាន់ សៀម ឥណ្ឌូចិននិងបារាំង។ លោកបានទទួលសុខសាន្តត្រាណជាងមួយសតវត្សរ៍ តាំងពីឆ្នាំ១៩០៤, ១៩០៧ ជាមួយនឹងបារាំង មានព្រំដែននឹងន ស្ថិរភាពព្រំដែនជាមួយនឹងឥណ្ឌូចិន បារាំង និងព្រះរាជាណាចក្រសៀមនៅជំនាន់ហ្នុង មួយសតវត្សរ៍ទៅហើយ ឥឡូវលោកថាលែងទទួលស្គាល់ផែនទីហ្នឹង វាអត់កើត លែងទទួលស្គាល់ព្រំដែនហ្នឹង វាអត់បាន! គឺថា លោកបានទទួលផលនៃសន្ធិសញ្ញាព្រំដែនរវាងឥណ្ឌូចិននិងសៀម រហូតដល់ឥឡូវស្រាប់តែលោកថា អត់មានព្រំដែនអត់មានអី អត់កើតទេ! កិច្ចព្រមព្រៀងច្រើនណាស់ទទួលស្គាល់ផែនទី ទទួលស្គាល់ព្រំដែនហ្នឹង អត់មានលុបអីកើតទេ»។
កាសែតថៃ The Nation បានឲ្យដឹងផងដែរថា គណបក្សសម្ព័ន្ធភាពដើម្បីប្រជាធិបតេយ្យថៃបានដាក់ជូនសំណុំឯកសារចំនួន១១ ដែលបញ្ជាក់ពិស្តារអំពីកិច្ចព្រមព្រៀងចុះហត្ថលេខារវាងខ្មែរថៃតាំងពីរាជ្យស្តេចថៃ រ៉ាម៉ាទី៥មកម៉្លេះ។
ជាមួយគ្នានេះដែរគណបក្ស PAD ក៏បានស្នើសុំដល់រាជរដ្ឋាភិបាលខ្លួនដើម្បីធ្វើការត្រួតពិនិត្យបញ្ហាចំនួន៨ករណីដែលនាំឲ្យប្រទេសថៃទទួលការខាតបង់ ដោយសារតែរាជរដ្ឋាភិបាលថៃមុនបានចុះហត្ថលេខាលើកតិកាសញ្ញាជាច្រើនជាមួយប្រទេសកម្ពុជាកន្លងមក។
តាមកាសែត The Nation ដំណាលពេលគ្នានេះលោកនាយករដ្ឋមន្រ្តី ហ៊ុន សែន មានប្រសាសន៍តាមទូរទស្សន៍រាជធានីប៉ុស្តិ៍លេខ៣ កាលពីថ្ងៃអាទិត្យថា បើនាយករដ្ឋមន្រ្តីថៃ អាភីស៊ិត វេតឆាឈីវ៉ាក់ ហ៊ានរំលាយរដ្ឋសភាហើយបោះឆ្នោតពេលនេះ គណបក្ស ភឿថៃ នៃក្រុមលោក ថាក់ស៊ីន ឈីនណាវ៉ាត្រ (Thaksin Shinawatra) ពិតជាឈ្នះឆ្នោត។
កាសែតដដែលបានស្រង់ការស្ទង់មតិថៃឲ្យដឹងថា នាយករដ្ឋមន្រ្តីថៃបច្ចុប្បន្ននេះមានប្រជាប្រិយភាពក្នុងចំណោមពលរដ្ឋថៃដល់ទៅជិត៧០% រីឯលោក ថាក់ស៊ីន មានពលរដ្ឋគាំទ្រតែ២១%ប៉ុណ្ណោះ៕