ហេតុការណ៍នេះកើតឡើងនៅក្នុងបរិវេណវត្តអណ្ដូងមាសស្ថិតនៅក្នុងឃុំម៉ាលិច កាលពីវេលាម៉ោង៨និង៤០នាទីយប់ថ្ងៃទី២៩ ខែកញ្ញា ឆ្នាំ២០០៨ ខណៈដែលប្រជាពលរដ្ឋក្នុងមូលដ្ឋានប្រមូលផ្ដុំគ្នារាំលេងកម្សាន្តក្នុងពិធីបុណ្យភ្ជុំបិណ្ឌ។
អ្នកភូមិឈ្មោះ វី សារុន អាយុ៤៨ឆ្នាំ និយាយថា ហេតុការណ៍នេះកើតចេញពីលោក ឡាក់ សុវណ្ណរិទ្ធិ ហើយកេណ្ឌបក្សពួកជាក្មេងស្ទាវជាដៃជើងវាយលោករហូតសន្លប់ និងធ្វើឲ្យកូនប្រុសមានរបួសក្នុងចំណោមហ្វូងមនុស្សជាច្រើនដែលឃើញហេតុការណ៍។
លោក វី សារុន បានឲ្យដឹងថា ៖ «គេឃើញគ្រប់គ្នាទាំងចាស់ទុំព្រោះមនុស្សរាប់រយនាក់។ កុំតែបានប៉ូលិសម្នាក់មកជួយ កុំអីគេអូសខ្ញុំចូលផ្ទះគេ វ៉ៃខ្ញុំ គេចោទខ្ញុំទៀត»។
ចំណែកមន្រ្តីប៉ូលិសស្រុកអណ្ដូងមាសម្នាក់ទៀត លោក សន ធន អះអាងដែរថា បានរងរបួសក្នុងការវាយប្រហារគ្នានោះដែរ ដោយសារលោកព្យាយាមសង្រ្គោះអ្នកភូមិដែលគេវាយសន្លប់។
លោក សន ធន បានមានប្រសាសន៍ថា ៖ «ក្មេង៧-៨នាក់ឯណោះ រួចបងនោះតែម្នាក់ឯង រួចខ្ញុំឃើញអ៊ីចឹងខ្ញុំជួយកុំឲ្យវ៉ៃ គេមិនស្ដាប់ទេ ព្រោះវាកំពុងប្រតាយប្រតប់គ្នា យូរណាស់ទម្រាំយកបានអ្នកសន្លប់ចេញមក បានបែកគ្នា»។
ឆ្លើយតបចំពោះការចោទប្រកាន់ខាងលើអធិការប៉ូលិសស្ដីទី លោក ឡាក់ សុវណ្ណរិទ្ធិ បានបដិសេធការចោទប្រកាន់ ហើយថាមិនបានដឹកនាំការវាយប្រហារនោះទេ។ លោកថាជាជម្លោះរវាងក្រុមក្មេងស្ទាវនៅក្នុងភូមិ ហើយលោកបានបង្រ្កាបដោយបានវាយក្មេងស្ទាវជាភ្នាក់ងារប៉ូលិស តែលោកមិនបានវាយបុរសជាឪពុកទេ។
លោក ឡាក់ សុវណ្ណរិទ្ធិ បានឲ្យដឹងថា ៖ «វ៉ៃដែរ វ៉ៃជនល្មើសទាំងពីរ ជាក្មេងស្ទាវ។ រួចទៅផ្សព្វផ្សាយថា ខ្ញុំវាយសន្លប់អី មិនជាក់ស្ដែង ខ្ញុំប្ដឹងវិញ»។
ស្នងការប៉ូលិសស្ដីទី លោក ចៅ នាង មានប្រសាសន៍ដែរថា លោកមិនមានព័ត៌មានជាក់លាក់ពីហេតុការណ៍វាយប្រហារគ្នានោះទេ ហើយលោកថានឹងធ្វើការស្រាវជ្រាវករណីនេះបន្ត ៖ «ស្នងការឲ្យព័ត៌មានដែរថា ករណីអធិការរងវ៉ៃគ្នាយ៉ាងម៉េច»។
លោកនាយករដ្ឋមន្រ្តី ហ៊ុន សែន កាលពីសប្ដាហ៍មុនបានថ្លែងជាសាធារណៈរិះគន់មន្រ្តីមានអំណាចទាក់ទិនទៅនឹងសកម្មភាពបងតូចបងធំអុកឡុកទីសាធារណៈតាមបណ្ដាខេត្តក្រុង ក៏ប៉ុន្តែក្រុមមន្រ្តីសិទ្ធិមនុស្សសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ កត់សម្គាល់ថា សកម្មភាពក្រុមបងតូចបងធំកាន់តែកើតមានច្រើនឡើងៗមិនអាចទប់ស្កាត់បាន។
លោក ប៉ែន ប៊ុណ្ណារ៍ បានមានប្រសាសន៍ថា ៖ «ឥឡូវរាលដាលដល់ជនបទឆ្ងាយៗ។ លោកនាយករដ្ឋមន្រ្តី ហ៊ុន សែន លោកធ្លាប់ព្រមានហើយថា បើសិនជាខេត្តណារឿងបងតូចបងធំបានជោគជ័យទេ ឲ្យបងតូចបងធំឡើងធ្វើអ្នកដឹកនាំតែម្ដងទៅ»។
នៅក្នុងឱកាសបុណ្យភ្ជុំបិណ្ឌនៅឆ្នាំនេះមន្រ្តីឃ្លាំមើលសិទ្ធិមនុស្សខាងលើរាយការណ៍ដែរថា សន្តិសុខ សណ្ដាប់ធ្នាប់សាធារណៈទូទៅក្នុងខេត្ត មិនមានសភាពការណ៍លួចប្លន់ កាប់សម្លាប់ជាធំដុំទេ ក៏ប៉ុន្តែមានលេចចេញនូវការវាយតប់បង្កជម្លោះដោយក្រុមបងតូចបងធំកើតមាននៅតាមទីរាំលេងកម្សាន្ត។
យ៉ាងនេះក្ដីស្នងការដ្ឋានប៉ូលិសខេត្តរតនគិរីទទួលស្គាល់ដែរថា ពិតជាមានហេតុការណ៍វាយតប់ដោយក្រុមបងធំខ្លះៗមែន ក៏ប៉ុន្តែរបាយការណ៍បូកសរុបពីបាតុភាពកើតមានឡើងក្នុងឱកាសបុណ្យភ្ជុំបិណ្ឌមិនទាន់បញ្ចប់នៅឡើយ៕