ក្រុមអធិការកិច្ចនិងអាជ្ញាធរមូលដ្ឋាននៅព្រឹកថ្ងៃច័ន្ទ ទី១១ ខែមករានេះ បានជួបប្រជុំគ្នានៅសាលាស្រុកបាណន់ ដើម្បីជជែកគ្នារកដំណោះស្រាយលើករណីវិវាទដីធ្លីរ៉ាំរ៉ៃមួយរវាងអ្នកភូមិជាច្រើនគ្រួសារ និងមន្ត្រីយោធាម្នាក់ក្នុងខេត្តបាត់ដំបង។
លោក ស្រេង ស៊្រាង អភិបាលស្រុកបាណន់ បានមានប្រសាសន៍ថា កិច្ចប្រជុំមានគោលបំណងបញ្ចប់ជម្លោះនិងចង់ឲ្យអ្នកភូមិទទួលបានផលស្រូវដែលពួកគេបានបង្កបង្កើនផលលើដីមានទំនាស់ជាមួយមន្ត្រីយោធាឈ្មោះ ឌឿ សាវិន ដោយលោកបានបញ្ជាក់ថា ៖ «គោលដៅគឺយើងចង់សម្របសម្រួលឲ្យបានផលស្រូវយកទៅហូបយកទៅប្រើប្រាស់រៀងៗខ្លួន ព្រោះមកទល់ថ្ងៃហ្នឹងប្រជាជនយើងបង្កបង្កើនផលហើយអត់មានស្រូវហូបសឹងតែប្រើពាក្យថា អត់បាយក៏បានដែរ។ គាត់ទៅពឹងគេ ទៅខ្ចីគេហូបដោយសារអី? ដោយសារពេលច្រូតហើយលោក ឌឿ សាវិន គាត់ប្រមូលទុកមួយកណ្តុបទៅ»។
កន្លងទៅថ្មីៗនេះអ្នកភូមិបានស្នើសុំឲ្យអាជ្ញាធរខេត្តជួយពួកគេឲ្យទទួលបានផលស្រូវបន្ទាប់ពីលោក ឌឿ សាវិន ដែលជាមន្ត្រីយោធាបានដឹកនាំ កម្មករ ២៥នាក់ចុះច្រូតយកស្រូវលើផ្ទៃដីទំហំ ៣២ហិកតាស្ថិតនៅចំណុចបឹងខ្ចាស់ ឃុំកន្ទឺ១ ស្រុកបាណន់ ខេត្តបាត់ដំបង កាលចុងឆ្នាំ២០០៩។
លោក អ៊ិន ប៊ុនម៉ាត់ មន្ត្រីអធិការកិច្ចខេត្តបាត់ដំបងបានមានប្រសាសន៍ថា លោក ឌឿ សាវិន ពុំបានចូលខ្លួនទៅជួបចរចាជាមួយគណៈកម្មការទេ។
លោក អ៊ិន ប៊ុនម៉ាត់ មានប្រសាសន៍បន្តថា ៖ «មិនទាន់មានការសម្រេចទេចាំមើលល្ងាចសិនចាំមើលគណៈកម្មការចុះទៅដល់ទីតាំងសិន»។
លោក មឿន ស្រិល អាយុ៤៨ឆ្នាំបានទទូចសុំឲ្យអាជ្ញាធរជួយដល់ក្រុមអ្នកភូមិ ហើយលោកបានត្អូញត្អែរថា ៖ «ដើម្បីការដោះស្រាយក្នុងក្រុមគ្រួសារធ្វើជាកម្មសិទ្ធិបង្កបង្កើនផលចិញ្ចឹមគ្រួសារ»។
លោក ឌឿ សាវិន អតីតជាមន្ត្រីយោធាតំបន់ប្រតិបត្តិការសឹករងស្រុកបាណន់បច្ចុប្បន្នត្រូវគេដឹងថា បានផ្លាស់មកធ្វើការនៅយោធភូមិភាគទី៥ មិនអាចទាក់ទងសុំការបញ្ជាក់បានទេ។
សមាគមការពារសិទ្ធិមនុស្ស អាដហុក ធ្លាប់បានស្នើអាជ្ញាធរខេត្តជួយក្រុមអ្នកភូមិឲ្យពួកគេទទួលបានផលស្រូវ និងជំរុញឲ្យមានការសើរើសំណុំរឿងនៅឯតុលាការឡើងវិញ។
លោក យិន ម៉េងលី បានបញ្ជាក់ថា ទំនាស់ខាងលើកើតចេញពីការជំពាក់លុយគ្នារវាងលោក ឌឿ សាវិន និង ចាយ សាវេន ជាមន្ត្រីយោធាដូចគ្នារហូតមានការប្តឹងផ្តល់មកតុលាការ។ លោកបន្តថា ក្រោយមកតុលាការបានធ្វើការកាត់សេចក្តីដោយពុំបានធ្វើការស្រាវជ្រាវច្បាស់លាស់ទេ ជុំវិញករណីនេះ។
លោក យិន ម៉េងលី បានឲ្យដឹងថា ៖ «កាត់សេចក្តីនៅលើតុដោយគ្មានមើលអីទាំងអស់សម្រេចទាំងងងឹតងងុល ខ្ញុំប្រើពាក្យអញ្ជឹងចុះលោកចៅក្រមគាត់សម្រេចហើយបង្កភាពលំបាក»។
គណៈកម្មការដោះស្រាយវិវាទដីធ្លីខេត្តបាត់ដំបង កាលពីឆ្នាំ២០០១ បានប្រគល់ដីទំហំ ៣២ហិកតាឲ្យអ្នកភូមិចំនួន ៦គ្រួសារ។ អ្នកភូមិ ៦គ្រួសារបានចែកដីនោះបន្តជា ១២គ្រួសារ ដោយបានបង្កបង្កើនផលលើដីនោះរហូតមក៕