អាជ្ញាធរ​ដោះ​លែង​ជន​ជាតិ​វៀតណាម​កាប់​ឈើ​នៅ​មណ្ឌលគិរី

ជន​ជាតិ​វៀតណាម​ដែល​ឆ្លង​ដែន​ខុស​ច្បាប់​ចូល​មក​អារ​ឈើ​នៅ​ក្នុង​ស្រុក​កែវ​សីមា ខេត្ត​មណ្ឌលគិរី ត្រូវ​គេ​ដោះ​លែង​ទៅ​វិញ​ហើយ។
ដោយ គង់ យុទ្ធនា
2010-08-01
Share
មណ្ឌលគិរី ៣០៥ អ្នក​ភូមិ​ជនជាតិ​ភាគ​តិច​ព្នង នៅ​ខែត្រ​មណ្ឌលគិរី
RFA/Kong Youthana

ចាប់​ខ្លួន​ជន​ជាតិ​វៀតណាម​កាប់​ឈើ រួច​ដោះ​លែង​ស្ងាត់ៗ

តំណាង​សហគមន៍ និង​ប្រជា​ពលរដ្ឋ​ភូមិ​អូរ​អាម​ជា​ច្រើន​នាក់ បាន​បញ្ជាក់​ប្រាប់​វិទ្យុ​អាស៊ី​សេរី នៅ​ថ្ងៃ​ទី​១ ខែ​សីហា​ថា មាន​សាក្សី​ច្រើន​នាក់​បាន​ឃើញ​សកម្មភាព​ក្រុម​មន្ត្រី​អភិរក្ស​ជីវចម្រុះ​កែវ​សីមា ចាប់​ខ្លួន​បុរស​ជន​ជាតិ​វៀតណាម ៣​នាក់ រួម​ជា​មួយ​ម៉ូតូ ២​គ្រឿង និង​ម៉ាស៊ីន​អារ​ឈើ​ប្រភេទ​ត្រង់សឺន័រ​ចំនួន ២​គ្រឿង នៅ​វេលា​ម៉ោង​១២ ថ្ងៃ​ទី​២៩ ខែ​កក្កដា ហើយ​មក​ទល់​នឹង​ថ្ងៃ​នេះ ជន​ជាតិ​វៀតណាម​ទាំង​នោះ​ត្រូវ​បាន​គេ​ដោះ​លែង​ទៅ​វិញ​អស់​យ៉ាង​ស្ងាត់​កំបាំង ក្នុង​មូលហេតុ​ទាក់​ទង​នឹង​ប្រាក់​សំណូក។

តំណាង​សហគមន៍​ម្នាក់ បាន​រៀប​រាប់​ថា ជន​ជាតិ​វៀតណាម ៣​នាក់ ត្រូវ​ចាប់​ខ្លួន​បាន​ក្នុង​ពេល​កំពុង​ធ្វើ​សកម្មភាព​អារ​ឈើ នៅ​ចំណុច​ត្រពាំង​ផល្លា និង​អូរ​ថ្ម​ដា ចម្ងាយ​ប្រមាណ ៥​គីឡូ​ម៉ែត្រ ពី​ភូមិ​អូរ​អាម ក្នុង​ឃុំ​ស្រែ​ខ្ទុម ស្រុក​កែវ​សីមា ខេត្ត​មណ្ឌលគិរី ៖ «បី​នាក់​ហ្នឹង មាន​ម៉ាស៊ីន​ត្រង់សឺន័រ ហើយ​និង​ម៉ូតូ ២​គ្រឿង​ហ្នឹង អភិរក្ស​គេ​ចុះ​ទៅ​ព័ទ្ធ​ចាប់​ជាក់​ស្ដែង​នៅ​កន្លែង​អារ​ឈើ​ហ្មង។ សាក្សី​មាន​ប្រជា​ពលរដ្ឋ​ឃើញ​ហូរ​ហែ​តាម​ដង​ផ្លូវ បណ្ដើរ​អា​បី​នាក់​ហ្នឹង​មក​ដាក់​ឡាន មាន​ប៉េអិម​ជិះ​ម៉ូតូ​ដាក់​ខ្នោះ​ដាក់​អី ឃើញ​ភាគ​ច្រើន។ បើ​តាម​ព័ត៌មាន​ថា អភិរក្ស​ហ្នឹង​ពិន័យ​ជា​ប្រាក់ ក្នុង​ម្នាក់​មួយ​ពាន់​ដុល្លារ»

អាជ្ញាធរ​មូលដ្ឋាន​ដែល​សុំ​មិន​បញ្ចេញ​ឈ្មោះ បាន​បញ្ជាក់​ថា ពិត​ជា​មាន​ករណី​ចាប់​ជន​ជាតិ​វៀតណាម រួម​ទាំង​សម្ភារៈ​អារ​ឈើ​នោះ​មែន ៖ «ពួក​អា​ហ្នឹង​វា​ចូល​មក​លួច​ដាក់​អន្ទាក់​អារ​ឈើ ព្រោះ​ទាហាន​នៅ​តាម​ព្រំដែន​វា​បង់​កង់​រុញ​ឈើ​អី​អ៊ីចឹង​ទៅ»

មន្ត្រី​ថា ឃើញ​តែ​ឧបករណ៍

ក៏​ប៉ុន្តែ​អនុ​ប្រធាន​ក្រុម​អភិរក្ស​ជីវចម្រុះ​កែវ​សីមា លោក ប៉ែត ភក្រ្តា បដិសេធ​ថា មិន​មាន​ករណី​ចាប់​ជន​ជាតិ​វៀតណាម​ទេ នេះ​បើ​តាម​សេចក្ដី​រាយការណ៍​ពី​មន្ត្រី​របស់​លោក។ មន្ត្រី​ដដែល​ឲ្យ​ដឹង​ថា មាន​ត្រឹម​តែ​ករណី​ចាប់​បាន​ម៉ូតូ ២​គ្រឿង និង​ម៉ាស៊ីន​អារ​ឈើ​ត្រង់សឺន័រ ២​គ្រឿង​ប៉ុណ្ណោះ ៖ «ចាំ​មើល​អឺ​ខ្ញុំ​ព្យាយាម​បើ​សិន​ជា​ព័ត៌មាន​ហ្នឹង​ធ្ងន់ធ្ងរ ខ្ញុំ​អាច​ព្យាយាម​តាម​ជ្រាវ​ព័ត៌មាន​ហ្នឹង​បន្ត​ទៀត ព្រោះ​អី​ករណី​វៀតណាម​ករណី​អី​នេះ វា​ជា​រឿង​មួយ​ផ្សេង​ពី​ហ្នឹង​ទៀត»

ដោយ​ឡែក​មន្ត្រី​ដែល​មាន​បេសកកម្ម​ស៊ើប​អង្កេត​នៅ​ស្រុក​កែវ​សីមា បាន​បញ្ជាក់​ថា​ក្រុម​មន្ត្រី​អភិរក្ស​បាន​ជាប់​ពាក់ព័ន្ធ​និង​ប្រាក់​សំណូក ៣០០០​ដុល្លារ ហើយ​ធ្វើ​ការ​ដោះ​លែង​ក្រុម​វៀតណាម​ខុស​ច្បាប់​នោះ​មែន ៖ «អភិរក្ស​ព្រៃ​ឈើ​ស្រុក​កែវ​សីមា បាន​ចាប់​យួន​បី​នាក់​អារ​ឈើ ហើយ​បាន​ទទួល​លុយ​ពី​យួន​ហ្នឹង ចំនួន​បី​ពាន់​ដុល្លារ ដោះ​លែង​គេ អា​នេះ​គឺ​ច្បាស់​ហើយ អភិរក្ស​ហ្នឹង​វា​យ៉ាង​ម៉េច​ចុះ​បើ​ត្រង់​តែ​ខ្មែរ​គ្នា​ឯង មិន​ដែល​ទៅ​ចូល​កាប់​ឈើ​ផង គ្រាន់​មាន​តែ​គោយន្ត​មួយ​ស៊ី​ឈ្នួល​ដឹក​ឈើ​គេ​បន្តិច​បន្ទួច ចាប់​គោយន្ត យក​ទៅ​គ្នា​អត់​បាយ​អត់​ទឹក​រហូត​ទល់​ឥឡូវ​នេះ»

ទាក់ទង​នឹង​ការ​អះ​អាង​ថា មាន​ករណី​ចាប់​បាន​ជន​ជាតិ​វៀតណាម​ល្មើស​ច្បាប់ ហើយ​ត្រូវ​បាន​ដោះ​លែង​ទៅ​វិញ​នោះ ប្រធាន​រដ្ឋបាល​ព្រៃ​ឈើ​ខេត្ត​មណ្ឌលគិរី លោក សុង ភាង មាន​ប្រសាសន៍​ថា ក្រុម​មន្ត្រី​អភិរក្ស​បាន​រាយ​ការណ៍​មក​ថា មាន​តែ​ករណី​ចាប់​បាន​ម៉ូតូ​របស់​ជន​ល្មើស​ចំនួន ២​គ្រឿង និង​រណា​យន្ត ២​គ្រឿង​ប៉ុណ្ណោះ មិន​មាន​ចាប់​បាន​ជន​ល្មើស​ទេ។ តែ​យ៉ាង​នេះ​ក្តី លោក​នឹង​ស៊ើប​អង្កេត​បន្ត​ទៀត ៖ «អត់​មាន​របាយ​ការណ៍​មក​ថា​ចាប់​បាន​មនុស្ស​ទេ ប៉ុន្តែ​ជា​ច្បាប់​កាល​ណា​តែ​មាន​ឃាត់​មនុស្ស ត្រូវ​តែ​បញ្ជូន​មក​តុលាការ​ដើម្បី​ផ្តន្ទា​ទោស»

សកម្មភាព​កាប់​ឈើ​ខុស​ច្បាប់​នៅ​ស្រុក​កែវ​សីមា បាន​កម្រើក​ឡើង​វិញ​ចាប់​តាំង​ពី​ខែ​មិថុនា​ដល់​ពេល​បច្ចុប្បន្ន។ ភាគ​ច្រើន​នៃ​ក្រុម​កាប់​ឈើ​ខុស​ច្បាប់​ទាំង​នោះ ជា​ជន​ជាតិ​វៀតណាម៕

ព័ត៌មាន (1)

មើល​មតិ​ទាំង​អស់.

Anonymous says:
Aug 01, 2010 04:56 PM

This action is not fair for our people. The laws is for all people. So, the justice is for all. The Vietnamese illegally acrossed the border to rob our timbers. They have to be punished by laws.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។