មន្ត្រីស្រុកអូរយ៉ាដាវ ខេត្តរតនគិរី ឲ្យដឹងនៅថ្ងៃចន្ទទី ១៦ ខែឧសភា ឆ្នាំ ២០១១ ថា ការចោទប្រកាន់ទៅលើជំនឿអាបធ្មប់ធ្វើឲ្យមនុស្សឈឺ ឬស្លាប់ គឺជាបញ្ហាមិនពិតដូចការចោទប្រកាន់នោះឡើយ។
សេចក្ដីអះអាងនេះធ្វើឡើងបន្ទាប់ពីក្រុមសមត្ថកិច្ចស្រុកអូរយ៉ាដាវ ខេត្តរតនគិរី មានអភិបាលស្រុក អធិការនគរបាលស្រុក មន្ត្រីកងកងរាជអាវុធហត្ថ មន្ត្រីយោធាស្រុក និងប្រជាពលរដ្ឋប្រមាណ ២០០ នាក់ បានប្រជុំគ្នានៅភូមិសោមគល់ នៅព្រឹកថ្ងៃទី ១៦ ខែឧសភា ឆ្នាំ ២០១១ ដើម្បីបញ្ជាក់អំពីសេចក្ដីរាយការណ៍ ដែលចោទប្រកាន់គ្នារវាងអ្នកភូមិសោមគល់ចំនួនពីរក្រុមក្នុងរឿងជំនឿអាបធ្មប់នេះ។
អធិការនគរបាលស្រុកអូរយ៉ាដាវ លោក ម៉ា វិចិត្រ មានប្រសាសន៍ ថាមិនមានភស្តុតាងណាមួយជាក់លាក់ក្នុងការចោទប្រកាន់ពីរឿងអាបធ្មប់ធ្វើឲ្យមនុស្សឈឺ និងស្លាប់នៅក្នុងភូមិនោះទេពីព្រោះការបំភ្លឺរបស់ក្រុមអ្នកភូមិ ដែលជាអ្នកចោទក្នុងរឿងនេះសុទ្ធតែជាការយល់ខុសទៅតាមជំនឿអប្បិយរួបទាំងអស់។
លោក ម៉ា វិចិត្រ ៖ «ប្រាំពីរប្រាំបីនាក់ទេ ដែលគាត់មានគំនុំ ឬក៏គាត់ខឹងយូរហើយ។ សួរទៅម្ខាងអ្នកចោទហ្នឹងឲ្យនិយាយឲ្យអស់ ហើយខាងជនរងគ្រោះហ្នឹងឲ្យនិយាយមួយសាទៅ។ ពេលស្ដាប់ហេតុផលមកសរុបចុងក្រោយ ឲ្យគាត់ផ្អាកសិន កុំអាលខឹងទៅកាប់គេ។ ពេលសួររកអ្នកឈឺហ្នឹងវាអត់មានទៀត។ ពាក់ព័ន្ធផ្លូវច្បាប់ធ្វើម្ដេចនឹងកើត»។
កាលពីថ្ងៃទី ១៤ ខែឧសភា ឆ្នាំ ២០១១ អ្នកភូមិសោមគុលប្រមាណ ២០០ នាក់បាននាំគ្នាផ្ដិតមេដៃទាមទារបណ្ដេញអ្នកភូមិជាមួយគ្នាចំនួន ៥ គ្រួសារមានសមាជិកគ្រួសារជាង ៣០ នាក់ ដែលអ្នកភូមិចោទថាជាត្រកូលអាបធ្មប់ ដែលបានធ្វើឲ្យអ្នកភូមិឈឺពីម្នាក់ទៅម្នាក់ ហើយរយៈពេលប៉ុន្មានឆ្នាំកន្លងទៅ មានអ្នកភូមិប្រមាណ ១០ នាក់ បានស្លាប់ដោយសារអាបធ្មប់នៃត្រកូលលោក សេវ ឡន។
អ្នកភូមិសោមគល់ម្នាក់ឈ្មោះ រចំ ជីន មានប្រសាសន៍បញ្ជាក់ពីហេតុផល ដែលធ្វើឲ្យអ្នកភូមិចោទត្រកូលគ្រួសារលោក សេវ ឡន ថាជាអ្នកធ្វើឲ្យអ្នកភូមិឈឺស្លាប់ «ពួកខ្ញុំរកប្រពៃណីហើយ (គេ)ឆ្លើយថាវាៗ អាប។ ឈឺសែនវាជា។ អ្នកខ្លះគេអត់ទាន់សែន វាងាប់ទៅអ៊ីចឹងណា!»។
លោក រចំ ចា ជាបងរបស់លោក សេវ ឡន បានបដិសេធថា ត្រកូលលោកមិនបានចេះអាបធ្មប់ ឬធ្វើអ្វីឲ្យអ្នកភូមិឈឺស្លាប់នោះទេ។ ក៏ប៉ុន្តែ មានអ្នកភូមិខ្លះមានគំនុំនឹងក្រុមគ្រួសារលោកហើយលើកយកបញ្ហាអាបធ្មប់នេះអូសទាញឲ្យអ្នកភូមិជឿតាមជំនឿអរូបី ដើម្បីបណ្ដេញគ្រួសារលោកឲ្យចាកចេញតែប៉ុណ្ណោះ។
លោក រចំ ចា ៖ «គេថាឲ្យខ្ញុំលូកសំណខ្ញុំធ្វើរួចហើយតាមប្រពៃណី អត់រលាកអត់ខូចទេដៃ។មកពីគេរកគ្រួទាយអីហ្នឹងហើយ»។
បុគ្គលិកផ្នែកអង្កេតសមាគមអាដហុក ខេត្តរតនគិរី លោក ឆាយ ធី មានប្រសាសន៍បញ្ជាក់ថា ការអង្កេតរបស់សមាគម អាដហុក ក៏ដូចជាមន្ត្រីអាជ្ញាធរដែរ គឺការចោទពីបញ្ហាអាបធ្មប់មិនមានលក្ខណៈពិតប្រាកដឡើយ។
លោក ឆាយ ធី ៖ «ផ្នត់គំនិតរបស់អ្នកភូមិហ្នឹង គឺមានជំនឿស៊ប់ទៅលើអាបធ្មប់។ អ៊ីចឹងហើយមានការញុះញង់ពីបុគ្គលបួនប្រាំនាក់ហ្នឹងទៅ គាត់ជឿទៅលើបុគ្គលដែលធ្វើការញុះញង់ហ្នឹងទេ»។
អភិបាលស្រុកអូរយ៉ាដាវ លោក ដក ស មានប្រសាសន៍បញ្ជាក់ថា ក្រុមអ្នកភូមិជាអ្នកចោទប្រកាន់នៅតែបន្តទាមទារបណ្ដេញគ្រួសារ លោក សេវ ឡន ឲ្យចេញពីភូមិ បើទោះបីក្រុមអាជ្ញាធរព្យាយាមអប់រំពូកគេពីបញ្ហាច្បាប់ និងបញ្ហាជំនឿអរូបីក៏ដោយ។
ទោះជាយ៉ាងនេះក្ដី លោកបន្តថាភាគីទាំងពីរយល់ព្រមរក្សាស្ថានភាពរស់នៅធម្មតាមិនប្រើអំពើហិង្សារង់ចាំដំណោះស្រាយជំហានទីពីររបស់អាជ្ញាធរពាក់ព័ន្ធបន្តទៀត៕