ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន
2020.05.01
សេចក្ដីព្រាងច្បាប់គ្រប់គ្រងប្រទេសជាតិក្នុងភាពអាសន្នដែលរបបលោក ហ៊ុន សែន ធ្វើឡើងដោយប្រញាប់ប្រញាល់ អំឡុងវិបត្តិជំងឺកូវីដ-១៩ នេះ បានក្លាយជាច្បាប់ពេញលេញហើយ កាលថ្ងៃទី២៩ មេសា។ ប៉ុន្តែ ដើម្បីឱ្យអនុវត្តច្បាប់នេះបាន គឺចាំបាច់ទាល់តែព្រះមហាក្សត្រប្រកាសដាក់ប្រទេសក្នុងភាពអាសន្នជាមុនសិន។
អង្គការយូមែន រ៉ៃត៍ វ៉ច្ឆ (Human Rights Watch) សំដែងក្តីបារម្ភថា ច្បាប់ថ្មីនេះនឹងក្លាយជាគ្រោះមហន្តរាយសម្រាប់វិស័យសិទ្ធិមនុស្សនៅកម្ពុជា ព្រោះសិទ្ធិពលរដ្ឋ និងសិទ្ធនយោបាយរបស់ប្រជាពលរដ្ឋខ្មែរនឹងត្រូវបានដកហូត។ អង្គការដដែលនេះថា ច្បាប់នេះនឹងបើកដៃឱ្យរដ្ឋាភិបាលលោក ហ៊ុន សែន គាបសង្កត់សិទ្ធិសេរីភាពជាមូលដ្ឋានរបស់ពលរដ្ឋ មានដូចជា ការបញ្ចេញមតិ ការជួបប្រជុំ និងការប្រមូលផ្តុំជាដើម។ រីឯ អង្គការអ្នកសារព័ត៌មានគ្មានព្រំដែន RSF ថាច្បាប់ដាក់ប្រទេសក្នុងភាពអាសន្ននេះ រំលោភសេរីភាពនៃការផ្ដល់ព័ត៌មាន និងសេរីភាពនៃការទទួលបានព័ត៌មាន ព្រោះច្បាប់នេះ នឹងបង្កើតឱ្យមាននូវប្រព័ន្ធនៃការតាមដានឈ្លបយកការណ៍ និង ការរឹតត្បិតសេរីភាពនៃការបញ្ចេញមតិ មិនធ្លាប់មានពីមុនមក ក្នុងរយៈពេល ៣០ឆ្នាំ កន្លងមក៕