លោកនាយករដ្ឋមន្ត្រី ហ៊ុន សែន ទំនងជាក្លាយជាមេដឹកនាំផ្តាច់ការឈានមុខគេ និងបំបែកឯកទគ្គកម្មពិភពលោកខាងប្រជែងការងារប្រចាំថ្ងៃរបស់រដ្ឋមន្ត្រីក្រសួងអប់រំ ឬសកលវិទ្យាធិការក្នុងការចែកសញ្ញាបត្រដល់និស្សិតដែលទើបបញ្ចប់ពីការសិក្សានៅតាមសាកលវិទ្យាល័យនានា។ លោកកម្រប្រើប្រាស់ឱកាសទាំងនោះដើម្បីចែករំលែកចំណេះដឹង អនុសាសន៍ ឬបទពិសោធន៍ល្អៗជូនដល់យុវជនជំនាន់ក្រោយឡើយ។ ក៏ប៉ុន្តែ លោកតែងប្រើឱកាសទាំងនោះកេងចំណេញនយោបាយ សាបព្រួសនូវពាក្យសម្តីអសុរស ឬមនោគមវិជ្ជាបែបបំបែកបំបាក់ពូជសាសន៍ខ្មែរគ្នាឯង ដែលពេលខ្លះបង្កប់ដោយអំពើហិង្សា សារគំរាមកាប់សម្លាប់ ចាប់ដៃគូនយោបាយ និងក្រុមអ្នកប្រឆាំងនឹងលោកដាក់គុកច្រវាក់ជាដើម។ ឱកាសទំពាំងស្នងឬស្សីទំនងជាពិបាកសម្រេចបានក្នុងចំណោមយុវជនជំនាន់ក្រោយនៅកម្ពុជា ខណៈលោក ហ៊ុន សែន កំពុងដឹកនាំប្រទេសឆ្ពោះទៅរកការបន្តក្តោបក្តាប់អំណាចតពូជត្រកូល«ហ៊ុន»៕
---
