ព្រែកជីកហ្វូណនតេជោ ប្រវែង ១៨០គីឡូម៉ែត្រ ឆ្លងកាត់ខេត្តចំនួន ៤ រួមមានខេត្តកណ្តាល តាកែវ កំពត និងខេត្តកែប គឺជាគម្រោងសាងសង់ហេដ្ឋារចនាសម្ព័ន្ធផ្លូវទឹកខ្នាតយក្សមិនធ្លាប់មានពីមុនមកនៅកម្ពុជាតាំងពីក្រោយសម័យអង្គរ។ គម្រោងដែលគ្រោងចំណាយទឹកប្រាក់ប្រមាណ ១ពាន់៧រយលានដុល្លារនេះ ទទួលបាននូវការសាទរ និងមោទនភាពពីសំណាក់ពលរដ្ឋខ្មែរស្ទើរគ្រប់មជ្ឈដ្ឋាន ព្រោះបង្ហាញឱ្យឃើញពីមហិច្ឆតាឯករាជ្យផ្នែកសេដ្ឋកិច្ចរបស់កម្ពុជា ដោយឈប់ពឹងផ្អែកលើការដឹកជញ្ជូនទំនិញតាមផ្លូវទឹកពីសមុទ្រចូលមករាជធានីភ្នំពេញ ឬបញ្ច្រាសពីនេះ ដោយត្រូវឆ្លងកាត់ប្រទេសវៀតណាមតទៅទៀត។
ទោះយ៉ាងណា គម្រោងដែលអាចប្រើពេល៤ឆ្នាំ ដើម្បីសាងសង់នេះ កំពុងបង្កឱ្យមានការប៉ះទង្គិចគ្នានៃដែនឥទ្ធិពលអំណាចរបស់ចិន និងវៀតណាមនៅកម្ពុជា។ វៀតណាមបានលើកឡើងពីកង្វល់ខ្លួនប្រាប់ទៅលោកនាយករដ្ឋមន្ត្រី ហ៊ុន ម៉ាណែត ដោយយកហេតុផលថា គម្រោងនេះធ្វើឱ្យប៉ះពាល់ធ្ងន់ធ្ងរដល់ប្រព័ន្ធអេកូឡូស៊ី ជីវចម្រុះ និងបរិស្ថាននៃលំហូរទឹកទន្លេមេគង្គ។ កម្ពុជាបានបដិសេធពីកង្វល់នេះ។ រីឯ ភាគីចិនឯណោះវិញ ក៏ត្រូវគេមើលឃើញថា កំពុងព្យាយាមតភ្ជាប់គម្រោងនេះ ទៅនឹងគំនិតផ្តួចផ្តើមខ្សែក្រវាត់និងផ្លូវ (BRI) ដែលជាមហិច្ឆតាប្រចាំសតវត្សរបស់ខ្លួន ស្របពេលដែលចិនកំពុងអភិវឌ្ឍតំបន់តារាសាគរនៅខេត្តកោះកុង និងនៅកំពង់ផែរាម ខេត្តព្រះសីហនុដ៏ចម្រូងចម្រាសស្រាប់។ វៀតណាមដែលជាអតីតចៅហ្វាយនាយធំរបស់កម្ពុជា មិនសប្បាយចិត្តព្រោះការធ្វើដូច្នេះមិនត្រឹមតែប៉ះពាល់ដល់ផលប្រយោជន៍សេដ្ឋកិច្ចរបស់ខ្លួនប៉ុណ្ណោះទេ តែក៏អាចប៉ះពាល់ដល់ផលប្រយោជន៍សន្តិសុខជាតិរបស់វៀតណាមផងដែរ។ ទោះជាយ៉ាងណា កម្ពុជាមើលឃើញថា គម្រោងព្រែកជីកដ៏សំខាន់នេះ គឺជាផលប្រយោជន៍ធំធេងរបស់ប្រជាជាតិខ្មែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។