រយៈពេល១០០ថ្ងៃដំបូងនៃការឡើងកាន់អំណាចរបស់នាយករដ្ឋមន្ត្រី ហ៊ុន ម៉ាណែត សមិទ្ធផលដ៏ធំមួយដែលលោកបាននាំមកជូនសង្គមជាតិនោះ គឺការធ្វើដំណើរឆ្លងកាត់ទ្វីបចំនួន៣ និងប្រទេសចំនួន៥ សរុបជិត៦ម៉ឺនគីឡូម៉ែត្រ ដើម្បី «ទាក់ម៉ូយ»។ ទោះយ៉ាងណា គ្មានឡើយការប្រកាសពីតួលេខជាក់លាក់នៃទឹកប្រាក់វិនិយោគបរទេសដោយផ្ទាល់ពីសំណាក់ក្រុមអ្នកវិនិយោគនៅប្រទេសលោកខាងលិច។ ប៉ុន្តែ ម៉ូយដែលលោកទាក់បាននោះ ភាគច្រើនសុទ្ធតែជាម៉ូយមកពីប្រទេសកុម្មុយនិស្តចិន ក្នុងពេលដែលពួកគេមួយចំនួននៅតែរួញរាមិនហ៊ានមកវិនិយោគនៅកម្ពុជាវិញនៅឡើយ។ នេះគឺដោយសារតែក្រោមការដឹកនាំរបស់ឪពុករបស់លោក គឺអតីតនាយករដ្ឋមន្ត្រី ហ៊ុន សែន កម្ពុជាបានក្លាយជាកន្លែងលាងលុយកខ្វក់ និងជា «មជ្ឈមណ្ឌលប្រព្រឹត្តអំពើឆបោកតាមអនឡាញ» ដ៏កក្រើកនៅតំបន់អាស៊ីអាគ្នេយ៍ ប្រព្រឹត្តដោយជនជាតិចិន។
ក្រុមអ្នកឃ្លាំមើលថា លោក ហ៊ុន ម៉ាណែត ប្រើរយៈពេល១០០ថ្ងៃដំបូងគ្រាន់តែដើម្បីធ្វើទេសចរណ៍ការទូតអួតប្រាប់បរទេសថា លោកជានាយករដ្ឋមន្ត្រីថ្មីរបស់កម្ពុជា។ ពួកគេរិះគន់ថា លោក ហ៊ុន ម៉ាណែត ប្រើពេល១០០ថ្ងៃដំបូងដើម្បីរៀនថ្លែងសុន្ទរកថាសាធារណៈឱ្យបានរត់មាត់ និងពិរោះស្តាប់ ជាជាងដោះស្រាយវិបត្តិចំពោះមុខនៅក្នុងសង្គម ដូចជា វិបត្តិពលរដ្ឋជំពាក់បំណុលវ័ន្តករ និងវិបត្តិពលរដ្ឋធ្វើចំណាកស្រុកខុសច្បាប់ទៅក្រៅប្រទេសជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។