កម្មករ​២០០​នាក់​ធ្វើ​កូដកម្ម​ដើម្បី​សុំ​ឲ្យ​តំណាង​សហជីព​ចូល​ធ្វើ​ការ​វិញ

កម្មករ​ប្រមាណ ២០០​នាក់ ធ្វើ​បាតុកម្ម​អហិង្សា​នៅ​មុខ​រោងចក្រ​តម្បាញ​សម្លៀក​បំពាក់ ប្លូសាម ស៊ីនជូរី ខេមបូឌា (Blossom Century Cambodia) នៅ​ក្នុង​ស្រុក​បាទី ខេត្ត​តាកែវ ដើម្បី​សុំ​ឲ្យ​ថៅកែ​រោងចក្រ​ទទួល​យក​តំណាង​សហជីព ៣​នាក់ មាន​ឈ្មោះ ខឹម វណ្ណា អ៊ិន ចាន់ថន និង ឡេង ណារិត បាន​ចូល​ធ្វើការ​វិញ បន្ទាប់​ពី​រោងចក្រ​បាន​បញ្ឈប់​តាំង​ពី​ថ្ងៃ​ទី​១០ ខែ​កញ្ញា។
ដោយ អ៊ុក សាវបូរី
2010-09-28
អ៊ីម៉ែល
មតិ
Share
បោះពុម្ព

លោក ខឹម វណ្ណា អះអាង​ថា រោងចក្រ​បញ្ឈប់​ការងារ​ពួកគេ​ទាំង ៣​នាក់ បន្ទាប់​ពី​កម្មករ​តែងតាំង​ពួកគាត់​ឲ្យ​បង្កើត​សហជីព ដែល​មាន​ឈ្មោះ ​សហជីព​សំឡេង​​យុវជន​ខ្មែរ នៅ​រោងចក្រ​នោះ។

លោក​ថា ក្រុម​កម្មករ​តវ៉ា​ផ្នែក​ត្បាញ​បាន​ធ្វើ​បាតុកម្ម​អហិង្សា​តាំង​ពី​ថ្ងៃ​ទី​១០ ខែ​កញ្ញា រហូត​មក​ដល់​ពេល​នេះ។ ការ​ធ្វើ​បាតុកម្ម​កន្លង​មក​មិន​មាន​ការ​បង្ក្រាប​កម្មករ​ទេ ប៉ុន្តែ​នៅ​ថ្ងៃ​អង្គារ ទី​២៨ ខែ​កញ្ញា សមត្ថកិច្ច​បាន​ចុះ​មក​បង្ក្រាប​បាតុកម្ម​របស់​កម្មករ។

លោក ខឹម វណ្ណា មាន​ប្រសាសន៍​ថា ៖ «កូដកម្ម​ថ្ងៃ​នេះ ខាង​ក្រុមហ៊ុន​គេ​ជួល​ខាង​សមត្ថកិច្ច​មក គេ​ចោទ​ថា ទាមទារ​ប្រាក់​ឈ្នួល ៩៣​ដុល្លារ ប៉ុន្តែ​ពួក​ខ្ញុំ​អត់​មាន​ទាមទារ​ប្រាក់​ឈ្នួល ៩៣​ដុល្លារ​ទេ ពួក​ខ្ញុំ​ទាមទារ​ឲ្យ​តំណាង​ចូល​វិញ​តែប៉ុណ្ណោះ»

អនុ​ប្រធាន​​​សហជីព​សំឡេង​​យុវជន​ខ្មែរ លោក អ៊ិន ចាន់ថន ឲ្យ​ដឹង​ថា នៅ​ព្រឹក​ថ្ងៃ​អង្គារ សមត្ថកិច្ច​ប្រមាណ ៥០​នាក់​បាន​ចាប់​ពួកគាត់​យក​ទៅ​សាលា​ស្រុក​បាទី ប៉ុន្តែ​ក្រុម​កម្មករ​បាន​ដណ្ដើម​ពួកគាត់​មក​វិញ។ ការ​ប្រទាញ​ប្រទង់​គ្នា​ធ្វើ​ឲ្យ​អាវ​គាត់​កំពុង​ពាក់​បាន​ដាច់​រហែក។ លោក​ថា សមត្ថកិច្ច​នៅ​តែ​ដាក់​ពង្រាយ​ជុំវិញ​កម្មករ​ដែល​តវ៉ា ប៉ុន្តែ​មិន​មាន​ការ​ប្រើ​ហិង្សា​ទៀត​ឡើយ៕

ព័ត៌មាន (0)
Share
គេហទំព័រ​ទាំងមូល